Isa ka Bag-ong Kalibutan Suno sa Ginsaad sang Dios

ANG Biblia, ang nasulat nga Pulong sang Dios, nagahatag sa aton sing paglaum sa pagsiling: “Suno sa iya saad nagahulat kita sing bag-ong mga langit kag bag-ong duta diin nagapuyo ang pagkamatarong.”—2 Pedro 3:13.

Ano ang “bag-ong mga langit”? Ginaangot sang Biblia ang langit sa paggahom. (Binuhatan 7:49) Ang “bag-ong mga langit” amo ang isa ka bag-o nga gobierno nga magagahom sa duta. Bag-o ini bangod magabulos ini sa karon nga sistema sang paggahom; isa man ini ka bag-o nga tikang sa pagtuman sa katuyuan sang Dios. Amo ini ang Ginharian nga gintudlo sa aton ni Jesus nga ipangamuyo. (Mateo 6:10) Sanglit ang Dios ang Tuburan sini kag nagapuyo sia sa langit, ginatawag ini nga “ginharian sang langit.”—Mateo 7:21.

Ano ang “bag-ong duta”? Indi ini isa ka bag-o nga globo, kay ang Biblia maathag nga nagasiling nga ang duta pagapuy-an sing dayon. Ang “bag-ong duta” amo ang bag-o nga katilingban sang tawo. Bag-o ini bangod wala na ang mga malauton. (Hulubaton 2:21, 22) Ang tanan nga magakabuhi sa sina nga tion magapadungog kag magatuman sa Manunuga kag magakabuhi nahisanto sa iya mga ginapatuman. (Salmo 22:27) Ang mga tawo gikan sa tanan nga kapungsuran ginaagda nga hibaluon kon ano ining mga ginapatuman kag ipahisanto ang ila kabuhi sa sini karon. Ginahimo mo bala ini?

Sa bag-ong kalibutan sang Dios, ang tanan magatahod sa Iya paggahom. Ginapahulag ka bala sang gugma sa Dios nga tumanon sia? (1 Juan 5:3) Kitaon gid bala ini sa imo puluy-an? sa trabaho ukon sa eskwelahan? sa imo pagkabuhi?

Sa sinang bag-ong kalibutan, ang katilingban sang tawo magahiusa sa pagsimba sa matuod nga Dios. Nagasimba ka bala sa Manunuga sang langit kag duta? Ang imo bala pagsimba nagapahiusa gid sa imo sa mga masigkasumilimba gikan sa tanan nga pungsod, rasa, kag hambal?—Salmo 86:9, 10; Isaias 2:2-4; Sofonias 3:9.

[Kahon sa pahina 17]

Ang Dios nga Nagasaad Sining mga Butang

Sia ang Manunuga sang pisikal nga mga langit kag sang planeta nga Duta. Sia ang ginpakilala ni Jesucristo nga ang ‘lamang matuod nga Dios.’—Juan 17:3.

Ang kalabanan nga tawo nagapadungog sa mga dios nga ila ginhimo. Minilyon ang nagayaub sa walay kabuhi nga mga imahen. Ang iban nagahimaya sa tawhanon nga mga institusyon, materyalistiko nga mga pilosopiya, ukon sa ila mismo mga handum. Bisan gani ang mga nagasiling nga ginagamit nila ang Biblia indi tanan nagapadungog sa ngalan sang isa nga ginapakilala sang Biblia nga “matuod nga Dios.”—Deuteronomio 4:35.

Tuhoy sa iya kaugalingon, ang Manunuga nagsiling: “Ako si Jehova. Ina amo ang akon ngalan.” (Isaias 42:5, 8, NW) Ini nga ngalan mga 7,000 ka beses nga nagalutaw sa Biblia sa orihinal nga mga hambal sini. Gintudluan ni Jesucristo ang iya mga sumulunod nga mangamuyo: “Amay namon nga yara sa langit, pakabalaanon ang imo ngalan.”—Mateo 6:9.

Ano nga sahi sang persona ang matuod nga Dios? Ginalaragway niya ang iya kaugalingon subong “maluluy-on kag mainayuhon, makuli sa pagpangakig, kag bugana sa malig-on nga paghigugma kag sa pagkatutom” kag subong isa nga indi gid magpaiway sang pagsilot sa mga hungod nga nagalapas sa iya mga sugo. (Exodo 34:6, 7) Ang maragtas sang iya pagpakig-angot sa katawhan nagapamatuod sa pagkamaminatud-on sina nga paglaragway.

Ang ngalan kag persona nga ginarepresentar sina nga ngalan dapat pakabalaanon. Subong ang Manunuga kag Bug-os Uniberso nga Soberano, takus sia nga tumanon naton kag simbahon sing bug-os. Personal bala nga ginahatag mo ini sa iya?

[Kahon/Retrato sa pahina 18]

Ano nga mga Pagbag-o ang Himuon Sang “Bag-ong mga Langit kag Bag-ong Duta”?

Ang duta mangin Paraiso Lucas 23:43

[Kahon/Retrato sa pahina 19]

Magabenepisyo Ka Bala?

Ang Dios indi makabutig!—Tito 1:2.

Si Jehova nagsiling: “Ang akon pulong . . . indi magbalik ini sa akon sa wala sing pulos, kundi magatigayon ini sang akon nahamut-an, kag magauswag ini sa butang nga akon ginpadal-an sini.”—Isaias 55:11.

Nagatuga na si Jehova sing “bag-ong mga langit kag bag-ong duta.” Nagapanghikot na ang langitnon nga gobierno. Napasad na ang pundasyon para sa “bag-ong duta.”

Sa tapos masugid ang pila sang dalayawon nga mga butang nga paluntaron sang “bag-ong langit kag bag-ong duta” para sa katawhan, ginabalikwat sang Bugna ang Dios mismo, ang Bug-os Uniberso nga Soberano, subong nagasiling: “Yari karon, ginabag-o ko ang tanan nga butang.” Subong man, sia nagsiling: “Isulat ini, kay ining mga pulong masaligan kag matuod.”—Bugna 21:1, 5.

Ang importante nga pamangkot amo, Ginahimo bala naton ang kinahanglanon nga mga pagpasibu agod takus kita nga mangin bahin sinang “bag-ong duta” sa idalom sang “bag-ong mga langit”?