Indi mga Manuglibod sang Pulong sang Dios

GINBALIGYA namon ang amon ministeryo tungod sa kuwarta.” Amo sina ang ginsiling sang isa anay ka “telephone prayer minister” nga gin-interbyu sa nagaimbestigar nga report sa mga ebanghelisador sa telebisyon sa Amerika sang talipuspusan sang 1991.

Ining programa ginhugod sa tatlo ka nagaebanghelyo nga ministeryo sa telebisyon sa Estados Unidos. Ginbuyagyag sini nga ang mga tawo ginakawatan sing milyon-milyon ka dolyar kada tuig sining tatlo lamang. Ang isa ka “ministeryo” ginlaragway subong “pinakabag-o nga pabrika para sa mga donasyon.” Ang tanan naulamid sa madamo nga pangdaya. Nakibot ka bala sa sini?

Ang Relihion Ginausisa

Indi lamang ang ebanghelismo sa telebisyon kundi bisan ang ortodokso, kinaandan nga mga relihion ginausisa man sang mga gobierno, sang pribado nga mga ahensia batok sa ilegal nga mga buhat, kag sang mga tawo sa kabilugan. Sa iban nga mga kaso ang pagpanag-iya sang simbahan sing mga stock certificate, paggasto sang relihion para sa mga intereses sang politika, kag ang maluho nga pangabuhi sang mataas sing suweldo nga klerigo nagpautwas sing mga pangduhaduha kon bala nagakaigo ini.

Kumusta ang pila ka relihioso nga lider kon takson sa dungganon nga paglaragway sang Cristianong ministeryo nga ginhatag ni apostol Pablo sang halos 2,000 ka tuig ang nagligad? Sia nagsulat: “Indi kita mga manuglibod sang pulong sang Dios subong sang madamo nga tawo, kundi nga subong nga maminatud-on, huo, subong nga ginpadala halin sa Dios, sa atubangan sang Dios, nga kaupod kay Cristo, nagahambal kita.” (2 Corinto 2:17) Sin-o ang nagakaigo sa sinang paglaragway sa karon?

Agod buligan ka nga mabulubanta ini, tan-awon naton sing maid-id kon paano gingastuhan anay ang Cristianong ministeryo ni Pablo kag sang iya mga kaupdanan. Sa anong paagi ini tuhay gikan sa iban sang adlaw niya?

Nagalakbay nga mga Manugwali sang Nahaunang Siglo

Subong nagalakbay nga manugwali, si Pablo indi pinasahi. Sadto anay madamo ang nagalakbay agod ipalapnag ang ila mga pagtamod tuhoy sa relihion kag pilosopiya. Ang manunulat sang Biblia nga si Lucas nagahambal tuhoy sa “nagalibod nga mga Judiyo nga mga manugsubol sang yawa.” (Binuhatan 19:13) Sang gintagudilian ni Jesucristo ang mga Fariseo, sia nagdugang: “Nagalibot kamo sa kadagatan kag sa kadutaan sa paghimo sing isa ka proselita.” (Mateo 23:15) Si Jesus mismo isa anay ka nagalakbay nga ministro. Ginhanas niya ang iya mga apostoles kag mga disipulo sa pag-ilog sa iya paagi sa pagbantala indi lamang sa Judea kag Samaria kundi “tubtob sa ukbong sang duta.”—Binuhatan 1:8.

Sa ila mga paglakbay, ang mga sumulunod ni Jesus nakasugilanon sa di-Judiyo nga mga manugwali. Sa Atenas, si Pablo nakigbais sa Epicureanhon kag Estoico nga mga pilosopo. (Binuhatan 17:18) Sa bug-os nga Emperyo sang Roma, ang mga Cynic nagpanghaylo paagi sa malawig kag mainit nga pamulongpulong. Ang mga debotado kay Isis kag kay Serapis nagpalapnag sang ila impluwensia sa mga kababayin-an kag mga ulipon paagi sa pagpanaad sing relihioso kag sosyal nga pagkatupong sa hilway nga mga kalalakin-an. Ang mga kulto sa pertilidad sa Sidlangan amo ang gin-ilog sang madamong makatalanhaga nga mga relihion sa kalibutan sang Greco-Romano. Ang saad nga mahilway sa sala kag ang handum nga masugiran sang balaan nga mga sekreto nagganyat sa mga sumulunod sa butig nga mga diosdios nga sanday Demeter, Dionysus, kag Cybele.

Paano Ginabayaran ang mga Gasto?

Apang, ang paglakbay magastos. Luwas sa mga gasto sa karga, tol, kag paglayag, ang mga nagalakbay nagakinahanglan sing pagkaon, dalayunan, gatong, panapton, kag pag-atipan sa lawas. Agod may igasto sa sining mga kinahanglanon, ang mga manugwali, mga manunudlo, mga pilosopo, kag mga mistiko may lima ka pangunang paagi. Sila (1) nagtudlo nga may bayad; (2) nagtrabaho nga nagabuhat sing manubo ang sahi nga trabaho kag obra; (3) nagbaton sing pagkamasinapupuhon kag kinabubut-on nga mga donasyon; (4) nagsuod sa manggaranon nga mga sumalakdag, sa masami subong mga manunudlo sang mga bata; kag (5) nagpakilimos. Agod ihanda ang iya kaugalingon para sa hinali nga pagsikway, ang bantog nga manugpakilimos nga Cynic nga si Diogenes nangayo sing limos bisan sa walay kabuhi nga mga estatwa.

Kilala ni Pablo ang mga manugwali nga nagpangangkon nga Cristianong mga ministro, apang kaangay sang pila ka Griegong pisolopo, nakig-abyan sa mga manggaranon kag nagkawat sa mga imol. Ginbadlong niya ang kongregasyon sang Corinto, nga nagasiling: “Ginabatas ninyo . . . ang bisan sin-o nga nagalamon sang kon ano ang yara sa inyo, ang bisan sin-o nga nagaagaw sang kon ano ang yara sa inyo.” (2 Corinto 11:20) Si Jesucristo wala sing gin-agaw nga bisan ano, kag amo man si Pablo kag ang iya mga masigkamanugpangabudlay. Apang ang makagod nga mga ebanghelisador sang Corinto “mga dimatuod nga mga apostoles, madaya nga mga manugpangabudlay,” kag mga ministro ni Satanas.—2 Corinto 11:13-15.

Ang mga instruksion ni Jesus sa iya mga disipulo wala maglakip sing pagpanudlo nga may bayad. “Ginbaton ninyo sa walay bayad, ihatag sa walay bayad,” laygay niya. (Mateo 10:8) Bisan nga ang pagpakilimos kinaandan, ginpakanubo ini sadto anay. Sa isa sang iya mga ilustrasyon, si Jesus nagalaragway sa isa ka tinugyanan subong nagasiling, “Nahuya ako magpakilimos.” (Lucas 16:3) Gani, indi gid naton makita sa sugilanon sang Biblia nga ang matutom nga mga sumulunod ni Jesus nangayo sing kuwarta ukon mga pagkabutang. Nagkabuhi sila paagi sa prinsipio: “Kon sin-o ang indi magpangabudlay, indi sia magkaon.”—2 Tesalonica 3:10.

Ginpalig-on ni Jesus ang iya mga disipulo nga tatapon ang ila mga kinahanglanon sa duha ka paagi. Una, mahimo sila, subong sang ginsiling ni Pablo, “magkabuhi sa maayong balita.” Paano? Paagi sa pagbaton sang pagkamasinapupuhon nga kinabubut-on nga ginahatag. (1 Corinto 9:14; Lucas 10:7) Ikaduha, mahimo nila maamanan ang ila kaugalingon sa materyal.—Lucas 22:36.

Mga Prinsipio nga Gin-aplikar ni Pablo

Paano gin-aplikar ni Pablo ang nasambit nga mga prinsipio? Ti, nahanungod sa ikaduhang misyonero nga paglakbay sang apostol, si Lucas nagsulat: “Nagpalayag kami gikan sa Troas kag gintuhoy namon ang Samotracia, kag sa madason nga adlaw ang Neapolis, kag gikan didto sa Filipos, nga isa ka koloniya, nga amo ang pangunang siudad sa distrito sang Macedonia. Nagpabilin kami sa sining siudad, naghinguyang sing pila ka adlaw.” Ang tanan nga paglakbay, pagkaon, kag dalayunan nga nadalahig gintatap nila sing personal.—Binuhatan 16:11, 12.

Sang ulihi, ang isa ka babayi nga ginhingalanan si Lidia nagbaton “sang ginpamulong ni Pablo. Kag sang nabawtismuhan sia, kag ang iya panimalay, nagpakiluoy sia sa amon, nga nagasiling: ‘Kon nagahunahuna kamo nga ako matinuuhon kay Jehova, sulod kamo sa akon balay kag magpabilin didto.’ Kag ginpilit niya kami.” (Binuhatan 16:13-15) Ayhan sa bahin bangod sang pagkamasinapupuhon ni Lidia, si Pablo nakasulat sa mga masigkatumuluo sa Filipos: “Nagapasalamat ako sa akon Dios sa tanan ko nga pagpanumdom sa inyo, sa gihapon sa tagsa ka pangamuyo nakon tungod sa inyo tanan ginahimo ko ang pangamuyo nga may kalipay, nga nagapasalamat tungod sang pagpakig-ambit ninyo sa pagpauswag sing maayong balita kutob sang nahaunang adlaw tubtob karon.”—Filipos 1:3-5.

Ginhatag ni Lucas ang madamong halimbawa sang mga tawo nga nag-abiabi sa sining nagalakbay nga Cristianong mga manugpangabudlay. (Binuhatan 16:33, 34; 17:7; 21:7, 8, 16; 28:2, 7, 10, 14) Sa iya ginbugna nga sulat, ginbaton kag ginpasalamatan ni Pablo ang pagkamasinapupuhon kag mga dulot nga nabaton niya. (Roma 16:23; 2 Corinto 11:9; Galacia 4:13, 14; Filipos 4:15-18) Apang, sia kag ang iya mga kaupdanan wala nagpabatibati nga dapat sila hatagan sing mga dulot ukon pinansial nga supurta. Ang mga Saksi ni Jehova makasiling nga ining maayo nga panimuot makita gihapon sa tunga sang ila nagalakbay nga mga manugtatap.

Wala Nagasandig sa Pagkamasinapupuhon

Si Pablo wala magsandig sa pagkamasinapupuhon. Nakatuon sia sing palangitan-an nga nagkinahanglan sing lakas nga pagpangabudlay kag malawig nga inoras apang manubo sing suweldo. Sang mag-abot ang apostol sa Corinto subong isa ka misyonero, “nakita niya ang isa ka Judiyo nga ginhingalanan si Aquila . . . kag ang iya asawa nga si Priscila. . . . Nagkadto sia sa pagpakigkita sa ila kag bangod nga pareho sila sing palangitan-an nagdayon sia sa ila, kag nagpangabudlay sila, kay sa ila palangitan-an manughimo sila sing mga layanglayang.”—Binuhatan 18:1-3.

Sang ulihi, sa Efeso, si Pablo nangabudlay gihapon sing lakas. (Ipaanggid ang Binuhatan 20:34; 1 Corinto 4:11, 12.) Mahimo nga lantip sia sa paggamit sing cilicium, isa ka mabahol nga balahibo sang kanding gikan sa iya tumandok nga lugar nga ginagamit sa paghimo sing layanglayang. Mahanduraw naton si Pablo nga nagalingkod sa isa ka bangko, nagaduko sa iya ulubrahan nga papag, nagagunting kag nagatahi tubtob sa kagab-ihon. Sanglit diutay lamang ang gahod sa talyer, nga nagapahapos sang pagsugilanon samtang nagapangabudlay, mahimo nga may kahigayunan si Pablo nga magpanaksi sa tag-iya sang talyer, sa iya mga empleyado, mga ulipon, mga bumalakal, kag mga abyan.—Ipaanggid ang 1 Tesalonica 2:9.

Ang misyonero nga si Pablo wala magnegosyo sang iya ministeryo ukon sa bisan ano nga paagi naghatag sing impresyon nga nagapangabuhi sia sa Pulong sang Dios. Nagsiling sia sa mga taga-Tesalonica: “Kamo inyo nakahibalo kon paano ang dapat pag-ilog ninyo sa amon, bangod wala kami magtinamad sang kaupod ninyo kami, wala kami magkaon sing kalan-on ni bisan sin-o nga walay bayad. Kundi, sa kabudlay kag sa kasakit nagpangabudlay kami sa adlaw kag gab-i, agod nga indi namon mapabug-atan ang bisan sin-o sa inyo. Indi bangod nga wala kami sing kinamatarong, kundi sa paghatag sing huwaran sa inyo sa amon paggawi nga ilugon ninyo.”—2 Tesalonica 3:7-9.

Ikabeinte-Siglo nga mga Manug-ilog

Tubtob karon ang mga Saksi ni Jehova nagasunod sang maayo nga halimbawa ni Pablo. Ang mga gulang kag ministeryal nga mga alagad wala nagabaton sing suweldo ukon bisan sing limos gikan sa mga kongregasyon nga ila ginaalagaran. Sa baylo ginaamanan nila ang ila mga pamilya kaangay kay bisan sin-o, ang kalabanan sa ila nagapamugon. Ang bug-os tion nga mga payunir nga ministro nagaaman man para sa ila kaugalingon, ang madamo nagapangabudlay sing igoigo lamang agod may igasto para sa pangunang mga kinahanglanon. Kada tuig ang iban nga mga Saksi nagalakbay sa ila kaugalingon nga gasto agod magbantala sa malayo nga mga lugar nga talagsa lang malab-ot sang maayong balita. Kon ang lokal nga mga pamilya nagaagda sa ila nga magkaon ukon magdayon, ginapasalamatan nila ini apang wala nila ginaabusuhan ina nga pagkamasinapupuhon.

Ang tanan nga pagbantala kag pagpanudlo nga ginahimo sang mga Saksi ni Jehova boluntaryo, kag wala gid sila nagapanukot para sa ila ministeryo. Apang, ang maarang-arang nga mga donasyon sa ila bug-os kalibutan nga pagbantala nga hilikuton ginabaton kag ginapadala sa Watch Tower Society para sa sina nga katuyuan. (Mateo 24:14) Ang ministeryo sang mga Saksi indi komersial sa tanan nga paagi. Kaangay ni Pablo ang kada isa sa ila makasiling sing matinuuron: “Nagwali ako sa inyo sang maayong balita sang Dios sa walay bayad.” (2 Corinto 11:7) Ang mga Saksi ni Jehova indi “mga manuglibod sang pulong sang Dios.”

[Kahon sa pahina 27]

KON PAANO ANG IBAN NAGAAMOT SA PAGBANTALA SANG GINHARIAN NGA HILIKUTON

◻ MGA AMOT SA BUG-OS KALIBUTAN NGA HILIKUTON: Madamo ang nagapain ukon nagabadyet sang kantidad nga ginahulog nila sa mga kahon-alamutan nga may ngalan: “Mga Amot Para sa Bug-os Kalibutan nga Hilikuton sang Sosiedad—Mateo 24:14.” Kada bulan ginapadala sang mga kongregasyon ini nga kantidad sa bug-os kalibutan nga ulong-talatapan sa Brook­lyn, New York, ukon sa pinakamalapit nga sanga talatapan.

◻ MGA REGALO: Ang boluntaryo nga mga amot nga kuwarta mahimo ipadala sing direkta sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, ukon sa lokal nga sanga talatapan sang Sosiedad. Ang mga alahas ukon iban pa nga mga bahandi mahimo maamot. Ang isa ka malip-ot nga sulat nga nagasiling nga ini isa ka donasyon dapat ilakip sa sining mga amot.

◻ KAHIMUSAN SANG PAGDONAR NGA MAY KONDISYON: Mahimo ihatag ang kuwarta sa Watch Tower Society subong patago tubtob mapatay ang donador, upod ang kondisyon nga sa tion sang personal nga pagkinahanglan, ibalik ini sa donador.

◻ PASIGURO: Ang Watch Tower Society mahimo amo ang hingadlan subong benepisyaryo sang isa ka pasiguro sa kabuhi nga polisa ukon sang isa ka plano sang pagretiro ukon pension. Dapat pahibaluon ang Sosiedad tuhoy sini nga kahimusan.

◻ MGA KWENTA SA BANGKO: Ang mga kwenta sa bangko, mga sertipiko sang deposito, ukon indibiduwal nga kwenta sa pagretiro mahimo ipatago subong butang nga ginapiyar ukon ibayad sa tion sang kamatayon sa Sosiedad, nahisuno sa mga kinahanglanon sang lokal nga bangko. Dapat pahibaluon ang Sosiedad tuhoy sini nga mga kahimusan.

◻ STOCKS KAG BONDS: Mahimo idonar ang stocks kag bonds sa Watch Tower Society ayhan subong isa ka donasyon ukon sa idalom sang kahimusan diin ang kita padayon nga ihatag sa donador.

◻ REAL ESTATE: Ang mahimo mabaligya nga real estate mahimo idonar sa Watch Tower Society paagi sa paghimo sing direkta nga regalo ukon paagi sa pagtigana sing bug-os kabuhi nga propiedad sa donador, nga padayon nga makaistar sa sini tubtob nga sia buhi. Dapat pakig-angutan sang isa ang Sosiedad antes himuan sing kasulatan ang bisan ano nga real estate sa Sosiedad.

◻ TESTAMENTO KAG MGA BUTANG NGA GINAPIYAR: Ang propiedad kag kuwarta mahimo ipapanubli sa Watch Tower Bible and Tract Society of Pennsylvania paagi sa ginhimo sing legal nga testamento, ukon ang Sosiedad mahimo hingadlan subong benepisyaryo sang isa ka kasugtanan sa mga butang nga ginapiyar. Ang isa ka butang nga ginapiyar nga nagabulig sa isa ka relihioso nga organisasyon mahimo hatagan sing mga bentaha sa buhis. Ang isa ka kopya sang testamento ukon sang kasugtanan sa butang nga ginapiyar dapat ipadala sa Sosiedad.

Para sa dugang pa nga kasayuran nahanungod sini, magsulat sa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, ukon sa lokal nga sanga talatapan sang Sosiedad.

[Kahon sa pahina 29]

LUYAG NIYA MAKABULIG

ANG onse-anyos nga si Tiffany isa ka bumulutho sa Baton Rouge, Loui­siana, E.U.A. Sining karon lang, ining bataon nga Saksi ni Jehova naghimo sing essay sa tema nga “Edukasyon sa Amerika.” Subong resulta, ang iya Saksi nga mga ginikanan nakabaton sining sulat gikan sa prinsipal sang eskwelahan:

“Sa sulod sang semana sang Edukasyon sang Amerika, isa ka talalupangdon nga essay para sa kada grado ang ginabasa sa intercom. Nalipay ako sa paggamit sang essay ni Tiffany sini nga aga. Isa gid sia ka tumalagsahon nga bata. Mabuot sia, may kompiansa sa kaugalingon, maalam, kag mainabyanon. Talagsa lang ako makakita sing isa ka grade six nga bata nga may tuman kadamo sini nga mga kinaiya. Si Tiffany isa ka bugal sang amon eskwelahan.”

Si Tiffany ang nagdaug sang nahaunang lugar sa paindis-indis sa essay. Sang ulihi nagsulat sia sa Watch Tower Society kag nagsiling: “Ayhan nagdaug lamang ako sa paindis-indis bangod sang publikasyon nga Questions Young People Ask—Answers That Work. . . . Gingamit ko ang mga kapitulo sa edukasyon. . . . Madamo nga salamat tungod sang pagbalhag sining mapuslanon kag makapulukaw nga libro. Bangod sang akon pagdaug sa essay, nakadaug ako sing pito ka dolyar. Ginaamot ko ining 7 ka dolyar kag ang 13 pa, sa kabug-usan nga 20 ka dolyar sa bug-os kalibutan nga hilikuton sa pagbantala. . . . Pagdaku ko, nagalaum man ako nga makaboluntaryo sa pag-alagad sa Bethel.”

[Laragway sa pahina 26]

Kon kaisa, si Pablo nangabuhi paagi sa paghimo sing mga layanglayang