Gamita sing Maayo ang Imo Tion
1 Si Jehova mahunahunaon sa tion. Luyag niya nga mangin mahunahunaon man kita sa tion. Paagi sa iya organisasyon ginabuligan niya kita nga mangin mahunahunaon sa tion. Pirme kita ginalaygayan nga may “madamo nga himuon sa hilikuton sang Ginuo.” (1 Cor. 15:58) Sa sining paagi, mangin mas epektibo kita sa pag-alagad kay Jehova.
2 Ang tagsatagsa sa aton may pareho nga kadamuon sang tion kada semana—168 ka oras. Daw ano kaayo naton ginagamit ang aton tion? Ginapakita bala naton nga nahibaluan naton kon ano na ini nga oras gikan sa pagtamod ni Jehova? Ginatublag bala kita sang dikinahanglanon gid nga mga buluhaton?
3 Importante nga kita mangin organisado. Madamo ang nagatinguha sa paghupot sing listahan sang mga prioridad. Ang tagsa ka butang ginalista suno sa importansia sini. Paano ina mahibaluan? Ang Biblia nagasiling nga dapat ‘makita [sang tawo] ang kaayuhan sa tanan niya nga pinangabudlayan.’ (Manugw. 3:13) Ang iban nga mga hilikuton nagabunga sing mas maayo nga mga resulta sangsa iban. Binagbinaga ang mga resulta nga mahatag sang kada isa. Ang pagtapos bala sa hilikuton nagapatubas sing importante nga mga benepisyo? ‘Makita mo bala ang maayo’ sa imo lakas nga pinangabudlayan? Kon indi, ayhan indi ini isa ka hilikuton nga dapat unahon.
4 Sa Aton Ministeryo: Ginaapresyar naton kon ang iban magaabot sa mga miting antes mag-alagad sa latagon suno sa oras, magapamati sing maayo sa mga instruksion, kag magalakat gilayon para sa teritoryo. Dapat kita mangin masako sa pagbantala sangsa maghulat. Nakita gid ni Pablo ang kinahanglanon sang kahim-ong sang nagsulat sia: “Ang tanan nga butang himuon sing nagakaigo kag mahusay.”—1 Cor. 14:40.
5 Kon nagaalagad kita sa latagon, mahimo naton mawasi ang hamili nga mga tion sa pagpamahaw. Apang, ang malip-ot nga pagpahuway mahimo himuon pagkatapos sang pila ka oras nga pagpangabudlay sa latagon. Ukon ayhan kon malain gid ang tiempo, ang pagpahuway mahimo nga magaparepresko sa aton kag magabulig agod makapadayon kita. Apang, ginapakamaayo sang iban nga magpabilin nga masako sa pagpanaksi sa mga tawo kag sa pagpaiway sang pagpamahaw upod sa mga kauturan sa tion nga gintigana para sa pagministeryo. Ang pagkabalanse ginakinahanglan.
6 “Bisan ang mga tulabong . . . nakahibalo sang iya pinat-od nga mga tion” sa pagsaylo. kag ang subay “nagatigana sang iya kalan-on sa tingadlaw” agod mangin handa sa tigtulugnaw, siling sang Biblia. (Jer. 8:7; Hulu. 6:6-8) Amo ini ang sekreto sang paggamit sing maayo sang tion. Dapat man naton ‘mahibaluan ang aton pinat-od nga mga tion.’ Sing indi tuman ka estrikto, dapat kita mangin mahunahunaon sa tion. Dapat naton mahibaluan indi lamang kon ano ang dapat naton himuon kundi kon san-o man ini dapat matapos. Dapat naton ugalion ang magpangandam, ginahatagan sing tion ang posible nga pagkaatrasar. Kag dapat man kita mangin handa sa pagpalip-ot sang pila ka hilikuton agod may tion para sa mas importante nga butang, subong sang paghanda para sa aton mga miting, pag-alagad sa latagon, kag iban pa teokratikong mga hilikuton.
7 Luyag naton mangin kaangay sang aton langitnon nga Amay. si Jehova nga Dios, nga nagatudlo sa aton nga “sa tagsa ka butang may panag-on.’ (Manugw. 3:1) Paagi sa paggamit sing maayo sang aton tion, ‘matuman naton sing bug-os ang aton ministeryo.’—2 Tim. 4:5.