Mga Pagduaw Liwat nga May Katuyuan
1 Kon nagaduaw liwat, tinguhai nga maggamit sing isa ka teksto nga magadugang sa ihibalo sang tawo tuhoy sa tema sa Biblia nga ginhambalan ninyo sang nagligad.
2 Kon napahamtang mo ang artikulo nga “Isa ka Kalibutan nga Wala sing Inaway—San-o?” (Ang Lalantawan, Oktubre 1), mahimo ka makasiling:
◼ “Mangin ano ayhan ang kabuhi sa sining duta kon wala na sing mga inaway? [Pasabta sia.] Tuguti ako nga ipakita sa imo kon ano ang ginsaad sang Dios nga pagahimuon niya.” Basaha ang Salmo 37:10, 11. Pahanumduma sia kon ano ang gintudlo ni Jesus sa iya mga disipulo nga ipangamuyo subong sang narekord sa Mateo 6:9, 10. Buligi sia sa pagpangatarungan sa kahulugan sang pinamulong ni Jesus. Magtanyag sing suskripsion sa Ang Lalantawan ukon Magmata! kag maghimo sing mga kahigayunan nga makabalik para sa dugang pa nga paghambalanay.
3 Kon nagbalik ka para sa dugang pa nga paghambalanay sa artikulo nga “Why Is Life So Short?” (Awake!, Oktubre 22), mahimo ka magsugod sa sining paagi:
◼ “Sang nagduaw ako sang nagligad, ginhambalan naton ang tuhay sa kalawigon sang kabuhi sang tawo. Subong gid sang nabasa mo sa mga artikulo sa Awake!, ang mga sientipiko nagahatag lamang sa aton sing diutay nga paglaum agod buligan kita nga magkabuhi lampas sa 70 ukon 80 ka tuig. Apang ano ang opinyon mo sa mga saad sang Dios? [Pasabta sia.] Ginapakita sang Biblia nga ang Dios may ginahunahuna nga mas maayo pa para sa tawo.” Nian basaha kag ipaathag ang Juan 17:3. Sa sining punto mahimo mo matanyag ang isa ka pagtuon sa Biblia sa puluy-an ukon mahimos ang isa pa ka paghinun-anon sa Biblia.
4 Ang isa sa mga tulumuron sang mga pagduaw liwat sa mga napahamtangan sing magasin amo ang pagtukod sing isa ka ruta sa magasin. Ang simple nga presentasyon kaangay sini mahimo nga mangin epektibo:
◼ “Ginalauman ko nga naluyagan mo ang artikulo sang Lalantawan nga ginbilin ko sa imo nga nagapaathag kon ngaa dapat kita magkahadlok sa Dios. Sa karon gindala ko ang isa ka artikulo sa magasin nga Awake! nga nagapamangkot, ‘Why Is Life So Short?’ Maayo ina nga pamangkot, indi bala?” Mahimo ka magpadayon paagi sa pagsiling: “Ang bantog nga pinamulong ni Jesus sa Juan 3:16 nagasaad sing kabuhi nga walay katapusan.” Nian ipaathag nga magabalik ka sa pagdala sang masunod nga mga guwa kag ayhan hambalan sing dugang pa kon ano ang ginsaad sang Dios para sa matinumanon nga katawhan. Dumduma nga sa kada pagdul-ong mo sing mga magasin, mareport mo ini nga isa ka pagduaw liwat.
5 Ang pagsugod sing pagtuon sa Biblia isa ka importante nga tulumuron sa aton ministeryo. Ayhan naduaw mo na sing pila ka beses ang isa ka tawo nga nagbaton sing mga magasin. Ngaa indi mo tilawan ini nga pagpalapit sa masunod nga pagduaw mo?:
◼ “Madamo ang nagasumpakilay nga mga pagpati tuhoy sa kon ngaa ginpahanugutan sang Dios ang kalautan ukon kon ngaa nagatigulang kita kag nagakapatay.” Buksi ang isa sang aton mga publikasyon nga ginagamit sa pagtuon sa Biblia sa isa ka tema nga sa banta mo magawili sa tagbalay, ipasundayag sa malip-ot kon paano ginahimo ang isa ka pagtuon.
6 Si Jehova isa ka Dios sang katuyuan. Ilugon naton sia sa Oktubre paagi sa paghimo sing mga pagduaw liwat nga may katuyuan.