Pagbag-o sa mga Kinahanglanon nga Oras Para sa mga Payunir
1 Ginaapresyar naton tanan ang mapisan nga mga regular kag mga auxiliary payunir sa kongregasyon. Bisan nga ang teritoryo diutay lamang kag masunson nga ginapangabudlayan sing maid-id, ang mga payunir nagapahamtang sing maayo nga huwaran paagi sa ila kakugi sa pag-alagad sa Ginharian. Ginapalig-on nila ang tanan nga manugbantala nga magpabilin nga masako sa pagpangita sa “mga nahuyog sing husto.”—Binuhatan 13:48.
2 Nakita sang Sosiedad ang dalagku nga mga kabudlayan nga gin-atubang sang mga payunir, ilabi na ang may kaangtanan sa pagpangita sing part-time nga trabaho nga magapahanugot sa ila nga maatipan sing nagakaigo ang ila personal nga mga kinahanglanon agod makapabilin sa bug-os tion nga pag-alagad. Ang karon nga kahimtangan sa ekonomiya sa madamo nga kadutaan labi man nga nagapabudlay sa iban nga makapayunir, bisan pa nga amo ini ang ila tinagipusuon nga handum. Sining ulihi nga binulan, ini kag ang iban pa nga mga rason ginbinagbinag sing maayo.
3 Busa, bangod sang nasambit na, ginbuhinan sang Sosiedad ang kinahanglanon nga oras para sa mga regular kag mga auxiliary payunir. Sugod sa 1999 nga tuig sang kalendaryo, ang kinahanglanon para sa mga regular payunir 70 ka oras kada bulan, ukon ang kabilugan nga 840 ka oras sa isa ka tuig. Ang binulan nga kinahanglanon para sa mga auxiliary payunir 50 ka oras. Ang kinahanglanon nga oras para sa mga espesyal payunir kag mga misyonero wala magbag-o, kay ang Sosiedad nagahatag sa ila sing aman agod buligan sila nga maatipan ang ila panguna nga mga kinahanglanon sa materyal. Gani, makakonsentrar sila sing labi pa sa ila hilikuton nga pagbantala kag paghimo sing disipulo.
4 Ginalauman nga ini nga pagbag-o sa mga kinahanglanon nga oras magabulig sa madamo pa nga payunir sa pagpabilin sa sining hamili nga pribilehiyo sang pag-alagad. Magabukas man ini sing dalan para sa madamo pa nga manugbantala nga magregular kag mag-auxiliary payunir. Isa gid ini ka pagpakamaayo para sa tanan sa kongregasyon!