Ang Aton Pamat-od—Maglakat sa Dalanon ni Jehova sa Kabuhi
1 Ang labi ka makakulunyag nga bahin sang “Dalanon Sang Dios sa Kabuhi” nga mga Kombension amo ang resolusyon nga ginhisugtan sing pormal sa katapusan nga pamulongpulong. Nagsugod ini paagi sa deklarasyon: “Kami . . . bug-os tagipusuon nga nagaugyon nga ang dalanon sang Dios amo ang labing maayo nga dalanon sa kabuhi.” Hinumduma ang importante nga mga bahin sadto nga resolusyon nga sa sini nagsiling kita, “HUO!”
2 Pamat-od naton nga magpabilin nga matinlo sa atubangan ni Jehova, nga wala sing dagta sang kalibutan. Padayon naton nga unahon sa aton kabuhi ang kabubut-on sang Dios. Nagagamit sang iya Pulong, ang Biblia, subong giya naton, indi kita magaliko sa tuo ukon sa wala, busa nagapamatuod nga ang dalanon sang Dios labaw gid sa dalanon sang kalibutan.
3 Sa kabilugan, ang kalibutan wala nagasapak sa dalanon sang Dios sa kabuhi kag nagaani sang mga resulta. (Jer. 10:23) Busa dapat kita padayon nga magpatudlo sa aton Dakung Manunudlo, si Jehova, nga nagasiling: “Amo ini ang dalan. Lakat sa sini, kamo nga katawhan.” (Isa. 30:21) Ang dalanon ni Jehova sa kabuhi, subong sang mabasa sa Kasulatan, labaw gid sa tanan nga bahin. Agod makalakat sa sina nga dalanon, kinahanglan naton himuslan sing bug-os ang tanan nga ginatudlo ni Jehova sa aton.
4 Ang Labaw Gid nga Programa ni Jehova sa Pagtudlo: Si Jehova nagatudlo sa aton sang matuod nga katuyuan sang kabuhi kag kon paano gamiton ang aton kabuhi sa pinakamaayo. Nagatudlo sia sa aton kon paano pauswagon ang kalidad sang aton kabuhi sa hunahuna, moral, kag espirituwal. Nagatudlo sia sa aton kon paano magkabuhi sing mahidaiton upod sa aton mga kauturan, sa aton pamilya, kag sa aton isigkatawo. Ginahimo niya ini paagi sa iya tulun-an, ang Biblia, kag paagi sa iya organisasyon.
5 Ang aton mga miting sa kongregasyon importante gid sa sini nga bahin. Samtang tayuyon kita nga nagatambong kag nagapakigbahin sa lima tanan ka miting, nagabaton kita sing tul-id nga paghanas subong mga ministro sang maayong balita kag sing timbang kaayo nga edukasyon sa Cristianong pagkabuhi. (2 Tim. 3:16, 17) Ang aton Daku nga Manunudlo nagaaman pa sing teokratikong edukasyon paagi sa mga asambleya kag mga kombension. Tulumuron naton nga indi gid pagwasihon ang isa ka miting ukon ang isa ka sesyon kon ginatugot sang aton panglawas kag mga kahimtangan nga makatambong kita.
6 Kabay nga makugi kita nga magapadayon sa paglakat sa dalanon sang Dios sa kabuhi sa ulihi nga mga adlaw, ang tanan sa kadayawan ni Jehova kag sa aton walay katapusan nga kaayuhan!—Isa. 48:17.