“Magpailob”

¹ Samtang nakita naton nga labi pa gid nga nagalapit ang katapusan sang daan nga sistema ni Satanas, kinahanglan nga “magpailob” kita samtang nagahulat sang adlaw ni Jehova sa pagluwas. Ilabi na sa sining ulihi nga tinion, ang malauton nga mga kaaway determinado sa pagpahilayo sang aton igtalupangod sa panguna nga hulusayon tuhoy sa pagkasoberano ni Jehova kag nagasulay sa aton nga matublag sang madamong personal nga mga intereses. Sa sining paagi, si Satanas nagatiplang sa aton nga mag-untat ukon maghinay sa hilikuton nga pagbantala sing Ginharian. (Sant. 5:​7, 8; Mat. 24:​13, 14) Sa anong mga paagi naton mapakita ining kinahanglanon nga pagpailob?

² Paagi sa Pagpaumod: Kon kita wala ginasapak ukon ginapamatukan sa aton ministeryo, ang pagpaumod magabulig sa aton nga magpadayon sa pagbantala. Indi kita gilayon mahadlukan ukon maakig kon ang mga tawo nga masumalang naton masakit maghambal ukon dimalulo. (1 Ped. 2:23) Ining nasulod nga kusog magapugong sa aton sa paghambal sing negatibo tuhoy sa mga tawo sa aton teritoryo nga wala nagasapak ukon nagapamatok sa aton hilikuton, sa pagkahibalo nga ini nga hambalanon magapaluya sang aton buot kag sang mga nagapangabudlay upod sa aton sa ministeryo.

³ Paagi sa Mapailubon nga Pagpadayon: Halos nagakaubos ang aton pailob kon pagkatapos sang maayo nga paghambalanay sa pag-alagad sa latagon, indi naton liwat masalapuan sa balay ang isa ka interesado. Amo man kon ang aton ginatun-an mahinay ang pag-uswag ukon ang pagpanindugan sa kamatuoran. Apang, ang mapailubon nga pagpadayon masunson ginapadyaan sing maayo nga mga resulta. (Gal. 6:9) Ang isa ka utod nga babayi madamo nga beses nga nagduaw liwat sa isa ka hoben nga babayi antes nasugdan ang isa ka pagtuon sa Biblia. Sa nahaunang lima ka pagduaw, ang babayi masako sa iban nga mga butang. Sa ikan-om nga pagtilaw, ang utod nga babayi nabasa sa isa ka unos, kag wala pa sia sing naabtan nga tawo sa balay. Walay sapayan sina, determinado nga hatagan sing isa pa ka kahigayunan ang babayi, ang utod nagduaw liwat kag naabtan ang babayi nga handa sa pagtuon. Pagkatapos sadto, ang estudyante padayon nga nag-uswag kag sa malip-ot lamang nga tion nagdedikar sang iya kabuhi kay Jehova.

⁴ Nahibaluan naton nga ang adlaw ni Jehova indi mapalantang. Gani nagahulat kita sa iya pagtapos sa mga bagay, nakahibalo nga ang pagpailob sang Dios magapatubas sing maayo nga bunga. (Hab. 2:​3; 2 Ped. 3:​9-15) Dapat kita magpailob kaangay ni Jehova kag indi mag-untat sa ministeryo. “Sa kalalangan sang pagtuo kag pagpailob,” magsalig nga padyaan ikaw ni Jehova tungod sang imo lakas nga pagpangabudlay.​—⁠Heb. 6:​10-12.