Indi Pagwasiha ang Katuyuan sang Hinatag-sang-Dios nga Kahilwayan
“Kag diin ang espiritu ni Jehova, didto ang kahilwayan.”—2 CORINTO 3:17.
1. Ngaa ang Isaias 65:13, 14 naaplikar sa mga Saksi ni Jehova?
SI Jehova Dios sang kahilwayan. Kag daw ano gid nga pagpakamaayo ang hinatag-sang-Dios nga kahilwayan! Bangod ang iya dedikado nga mga alagad may amo sina nga kahilwayan, ining mga pinamulong sang Soberanong Ginuo nga si Jehova naaplikar sa ila: “Yari karon! Ang akon mga alagad magakaon, apang kamo gutumon. Yari karon! Ang akon mga alagad magainum, apang kamo uhawon. Yari karon! Ang akon mga alagad magakalipay, apang pakahuy-an kamo. Yari karon! Ang akon mga alagad magaamba sa kalipay sang tagipusuon, apang kamo magahibi sa kasubo sang tagipusuon kag magahaya sa kagamo sang espiritu.”—Isaias 65:13,14.
2. Ngaa bugana sa espirituwal ang katawhan ni Jehova?
2 Ang katawhan sang Dios nagaagom sining bugana sa espirituwal nga kahimtangan bangod ginatuytuyan sila sang iya espiritu, ukon aktibo nga kusog. Si apostol Pablo nagsiling: “Si Jehova amo ang Espiritu; kag diin ang espiritu ni Jehova, didto ang kahilwayan.” (2 Corinto 3:17) Ano ang katuyuan sang hinatag-sang-Dios nga kahilwayan? Kag ano ang ginakinahanglan sa aton agod mahimuslan ini sing bug-os?
Ang Kahilwayan sang Dios
3. May ano nga sahi sang kahilwayan ang Dios, kag ngaa?
3 Si Jehova lamang ang may bug-os nga kahilwayan. Indi malatiran sang iya mga tinuga ang iya kahilwayan bangod sia amo ang Labing Gamhanan nga Dios kag ang Soberano sa Bug-os nga Uniberso. Subong sang ginsiling sang matutom nga si Job, “sin-o bala ang makapugong sa iya? Sin-o bala ang magasiling sa iya, ‘Ano bala ang ginahimo mo?’” (Job 9:12) Sa kaanggid, ang hari sang Babilonia nga si Nabocodonosor napilitan sa pagbaton: “Wala gid sing makapugong sang kamot [sang Dios] ukon makasiling sa iya, ‘Ano bala ang ginahimo mo?’”—Daniel 4:35.
4. Paano ginahuptan ni Jehova ang iya kahilwayan sa sulod sang dulunan?
4 Apang, ang matarong mismo nga mga prinsipio ni Jehova nagahupot sinang bug-os nga kahilwayan sa sulod sang dulunan. Ginlaragway ini sang si Abraham nagpakita sing kabalaka sa mga pumuluyo sang Sodoma kag nagpamangkot: “Indi bala maghimo sing matarong ang Hukom sang bug-os nga duta?” Ang sabat sang Dios nagapakita nga ginakilala niya ang responsabilidad sa paghimo kon ano ang matarong. Wala niya kuntani paglaglaga ang Sodoma kon may matarong nga pumuluyo nga nabilin sa sini. (Genesis 18:22-33) Ginahuptan man sang Dios ang iya kahilwayan sa sulod sang dulunan bangod ang iya gugma kag kaalam nagahimo sa iya nga makuli sa pagpangakig kag nagapakita sia sing pagpugong sa kaugalingon.—Isaias 42:14.
Mga Limitasyon sang Tawhanon nga Kahilwayan
5. Ano ang pila ka butang nga nagalatid sang kahilwayan sang tawo?
5 Bisan pa nga si Jehova may bug-os nga kahilwayan, ang tanan pa nga iban nagapanghikot sa sulod sang mga limitasyon nga gintangdo sang ila kinaugali, mga ikasarang, kag duog nga ginapuy-an, subong man sang mga butang subong sang limitado karon nga kalawigon sang kabuhi sang makasasala nga mga tawo. Gintuga sang Dios ang tawo nga may himpit nga kahilwayan sa pagpanghikot sa sulod sang duog nga gintangdo para sa iya ni Jehova. Madamo sing rason kon ngaa ang tawhanon nga kahilwayan limitado, indi bug-os.
6. Ano ang labot sa aton kahilwayan sang pagkamaysalabton sa Dios?
6 Una, ang tawhanon nga kahilwayan limitado bangod gintuga sang Dios ang tawo sa paghimo sang Iya katuyuan. Si Jehova ‘takus sa pagbaton sang himaya kag dungog kag gahom bangod sia ang nagtuga sang tanan nga butang kag bangod sang iya kabubut-on nangin amo kag gintuga sila.’ (Bugna 4:11) Gani ang tawo may salabton sa iya Mahughimo, nga makatarunganon nga naghimo sing mga kasuguan nga dapat tumanon sang tawo. Sa dumaan nga Israel sa idalom sang Mosaikong Kasuguan, ang Dios nagsugo nga ang mga indibiduwal pagapatyon kon ginapasipalahan nila ang iya ngalan ukon ginalapas ang kasuguan sa Inugpahuway. (Exodo 20:7; 31:14, 15; Levitico 24:13-16; Numeros 15:32-36) Bisan pa kita subong mga Cristiano wala napaidalom sa Kasuguan, ang aton kahilwayan limitado bangod may salabton kita kay Jehova, nga amo ang aton Hukom, Manughatag-sing-Kasuguan, kag Hari.—Isaias 33:22; Roma 14:12.
7, 8. (a) Paano ginalatiran sang pisikal nga mga kasuguan ang kahilwayan sang tawo? (b) Ano ang iban pa nga mga kasuguan sang Dios ang nagalatid sang aton kahilwayan subong mga tawo?
7 Ikaduha, ang tawhanon nga kahilwayan limitado bangod sang pisikal nga mga kasuguan sang Dios. Halimbawa, bangod sang kasuguan sa grabidad, ang isa ka tawo indi mahimo makalumpat sa mataas nga tinukod nga wala ginahalitan ukon ginapatay ang iya kaugalingon. Sing maathag, ang pisikal nga mga kasuguan sang Dios nagalatid sang kahilwayan sang tawo sa paghimo sing pila ka butang.
8 Ikatlo, ang tawhanon nga kahilwayan limitado bangod sang moral nga mga kasuguan sang Dios. Mahimo nga nakita mo ang katumanan sang ginsulat ni Pablo sa Galacia 6:7,8: “Dili kamo magtalang: Ang Dios indi tiliawtiawan. Kay bisan ano ang ginasab-ug sang tawo, ina man ang iya anihon; kay ang nagasab-ug sa iya kaugalingon nga unod magaani sing kaduluntan gikan sa unod, apang ang nagasab-ug sa espiritu, magaani man sing kabuhi nga dayon gikan sa espiritu.” Sing dimabais, ang moral nga mga kasuguan ni Jehova nga Dios nagalatid man sang aton kahilwayan, apang ang pagtuman sa sini ginakinahanglan agod matigayon naton ang kabuhi.
9. Paano ang aton kahilwayan ginalatiran bangod bahin kita sang tawhanon nga katilingban?
9 Ikaapat, ang kahilwayan sang tawo limitado bangod bahin sia sang tawhanon nga katilingban. Gani, may kahilwayan lamang sia tubtob sa punto nga wala ini nagaupang sing dimakatarunganon sa iya sang iban. Ang mga Cristiano dapat magpasakop sa “superyor nga mga awtoridad” sang gobierno, nagatuman sa ila kon ang ila ginapatuman wala nagalapas sang mga kasuguan sang Dios. (Roma 13:1; Binuhatan 5:29) Halimbawa, dapat naton tumanon ang kasuguan nahanungod sa pagbayad sing buhis, sa kadasig sang aton pagpadalagan sang salakyan, kag iban pa. Ang kamatuoran nga dapat naton tumanon inang mga kasuguan ni “Cesar” nagapakita sing dugang nga ang hinatag-sang-Dios sa aton nga kahilwayan may latid.—Marcos 12:17; Roma 13:7.
Ngaa May Latid nga Kahilwayan?
10, 11. Ngaa ginhatagan ni Jehova ang mga tawo sing may latid nga kahilwayan?
10 Ngaa may latid nga kahilwayan ang ginhatag sang Dios sa mga tawo? Ang isa ka rason amo nga ang Manunuga mahimo nga may intelihente nga mga tinuga sa duta nga magadala sa iya sing kadungganan kag kadayawan paagi sa ila maayong mga pulong kag buhat. Sarang ini mahimo sang tawo, samtang ang sapat indi. Ang mga sapat, bangod ginagamhan sang pagkaduna, wala sing nahibaluan nahanungod sa moral nga paggawi. Sarang mo mahanas ang ido nga indi pagkuhaon ang isa ka butang, apang indi mo sia matudluan kon ngaa sala ang pagpangawat. Ang isa ka sapat upod ang mga buhat sini nga napat-od na nga daan, kon hambalon pa, indi makahimo sing mga desisyon nga nagahatag sing pagdayaw kag dungog sa Dios, samtang ang tawo hilway nga makapili sa pag-alagad sa iya Manughimo bangod sang gugma kag apresasyon.
11 Ang Dios nagahatag man sa mga tawo sining kahilwayan para sa ila kaayuhan kag kalipay. Magamit nila ang ila may latid nga kahilwayan paagi sa pagkamatugahon kag pagkamaimbentuhon, pagkamaluluy-on kag mabuligon. Ang tawo may kahilwayan man sa pagpili sing trabaho kag duog nga puy-an. Sa karon, ang ekonomiya kag politika masami nagalatid sinang kahilwayan sa pagpili, apang mahimo nga bangod ini sang kakagud sang tawo, indi bangod sa kon paano gintuga anay sang Dios ang tawo.
12. Ngaa ang kalabanan nga katawhan naulipon?
12 Bisan pa ginhatagan ni Jehova ang katawhan sing daku nga kahilwayan, ang kalabanan sa karon makabalang-aw nga naulipon. Ano ang natabo? Ang unang tawhanon nga mag-asawa, sanday Adan kag Eva, nagwasi sang katuyuan sang hinatag-sang-Dios nga kahilwayan. Naglabang sila sa mga latid sang Dios sa ila kahilwayan kag ginduhaduhaan ang makatarunganon nga paggahom sang Dios sa ibabaw nila subong Soberanong Ginuo, nga si Jehova. (Genesis 3:1-7; Jeremias 10:10; 50:31) Indi kontento sa paggamit sang ila kahilwayan sa pagpadungog sa Dios, gingamit nila ini sing makagud, sa pagdesisyon sing hilway sa kon ano ang husto kag kon ano ang sala, busa nagbuylog kay Satanas sa pagrebelde niya batok kay Jehova. Apang, sa baylo nga natigayon ang dugang nga kahilwayan, ang mga makasasala nga sanday Adan kag Eva napaidalom sa mabudlay nga mga pagdumili kag pagkaulipon, pagbuhin sang ila kahilwayan, kag sang ulihi sa kamatayon. Napanubli sang ila mga anak ining pagkawasi sing kahilwayan. “Ang tanan nagpakasala kag nawad-an sang himaya sang Dios.” “Ang bayad sang sala kamatayon.”—Roma 3:23; 5:12; 6:23.
13. Ngaa naulipon ni Satanas ang mga tawo?
13 Bangod sang pagrebelde sa Eden, si Adan kag ang iya mga anak naulipon man kay Satanas nga Yawa. Ti, “ang bug-os nga kalibutan yara sa gahom sang malauton”! (1 Juan 5:19) Bangod sang iya superyor nga gahom kag ikasarang nga nadaya kag naulipon ni Satanas ang tanan nga katawhan nga nahilayo sa Dios. Dugang pa, gingamhan sang makagud nga mga tawo ang ila isigkatawo sa ila kasamaran. (Manugwali 8:9) Gani, ang katawhan sa kabilugan naulipon karon sa sala kag kamatayon, kay Satanas kag sa iya mga demonyo, kag sa sistema sa politika, ekonomiya, kag relihion sang kalibutan.
Ang Matuod nga Kahilwayan Ginhimo nga Posible
14. Sa ano naangot sing suod ang paglaum sang katawhan para sa matuod nga kahilwayan?
14 Ang pagtigayon sing kahilwayan gikan sa sala, kamatayon, kag sa Yawa kag sa iya kalibutan naangot sing suod sa determinasyon sang Dios nga lubaron ang hulusayon nahanungod sa pagkamakatarunganon sang iya kaugalingon nga pagkasoberano sa bug-os nga uniberso. Bangod ginbangon ni Satanas ini nga hulusayon, gintugutan sia ni Jehova nga magpabilin nga buhi, subong sang pagpahanugot Niya anay kay Faraon nga magkabuhi sa pila ka tion. Ini agod mapakita sing bug-os ni Jehova ang iya gahom kag mabantala ang iya ngalan sa bug-os nga duta. (Exodo 9:15, 16) Ang Dios magabindikar sa ulihi sang iya kaugalingon subong ang Soberano sa Bug-os nga Uniberso kag magapakabalaan sang iya balaan nga ngalan paagi sa pagdula sang pasipala nga ginbutang sa sini paagi sa pagrebelde nanday Satanas, Adan, kag Eva. Busa, ang mga nagakahadlok kay Jehova pagahilwayon gikan sa pagkaulipon sa sala kag kamatayon kag pagapasudlon sa bag-ong kalibutan sang hinatag-sang-Dios nga kahilwayan.—Roma 8:19-23.
15. Ano ang papel ni Jesus sa pagpasag-uli sang kahilwayan sa katawhan?
15 Agod mapasag-uli ang kahilwayan sa katawhan, ginpadala sang Dios ang iya Anak sa duta subong isa ka tawo. Paagi sa boluntaryo nga paghatag sang iya himpit tawhanon nga kabuhi, ang Anak sang Dios, nga si Jesucristo, nag-aman sing halad gawad, ang sadsaran para mahilway ang katawhan. (Mateo 20:28) Ginbantala man niya ang mensahe sang kahilwayan. Sa pamuno sang iya ministeryo, ginpadapat niya sa iya kaugalingon ang mga pulong: “Ang espiritu sang Soberanong Ginuo nga si Jehova yari sa akon, bangod nga si Jehova naghaplas sa akon sa pagwali sang maayo nga mga balita sa mga mapainubuson. Ginpadala niya ako sa pagbugkos sang buong sing tagipusuon, sa pagbantala sing kahilwayan sa mga bihag kag sa pagbukas sang bilangguan sa mga binilanggo.”—Isaias 61:1; Lucas 4:16-21.
16. Anong mga tikang ang dapat himuon sang unang-siglo nga mga Judiyo agod matigayon ang matuod nga kahilwayan?
16 Paano matigayon sang katawhan ina nga kahilwayan? Si Jesus nagsiling: “Kon kamo magpadayon sa akon pulong, kamo matuod gid nga mga gintutun-an nakon, kag kamo makakilala sang kamatuoran, kag ang kamatuoran magahilway sa inyo.” Busa, ang mga sumulunod ni Jesus nakaagom sing espirituwal nga kahilwayan. (Juan 8:31, 32, 36) Dugang pa, si Jesus nagsiling sa Romanong gobernador nga si Poncio Pilato: “Tungod sini natawo ako, kag tungod sini nagkari ako sa kalibutan, agod nga magsaksi ako sa kamatuoran. Ang tagsatagsa nga yara sa kamatuoran nagapamati sang akon tingog.” (Juan 18:37) Ang mga Judiyo nga nagbaton sang kamatuoran subong sang ginbantala kag ginhalimbawa ni Jesus naghinulsol sa ila mga sala, nagtadlong sang ila sayop nga dalanon, nagpresentar sang ila kaugalingon kay Jehova, kag gintugmawan kaangay kay Jesus. (Mateo 3:13-17; Binuhatan 3:19) Sa sining paagi naagom nila ang may latid nga hinatag-sang-Dios nga kahilwayan.
17. Ngaa ginahatagan ni Jehova ang iya mga alagad sing kahilwayan?
17 Una, ginahatagan ni Jehova ang iya matutom nga mga alagad sing kahilwayan sa pagbindikar sang iya kaugalingon nga pagkasoberano kag sa ila man kasulhay ukon kaayuhan. Ginhilway niya ang mga Israelinhon gikan sa kahiolipnan sa Egipto agod mahimaya nila sia subong isa ka ginharian sang mga saserdote, mga saksi niya. (Exodo 19:5, 6; Isaias 43:10-12) Sa kaanggid, ginpaguwa ni Jehova ang iya katawhan gikan sa pagkatapok sa Babilonia agod ipatindog liwat ang templo kag ipasag-uli ang matuod nga pagsimba. (Esdras 1:2-4) Sang ang mga tinapok nagkabalaka lamang sa ila kaugalingon nga kasulhay sa materyal, ginpadala ni Jehova ang iya mga manalagna nga sanday Hageo kag Zacarias agod ipahanumdom sa ila ang ila mga obligasyon sa atubangan sang Dios. Busa bangod sang pagpahangop sa ila sing maayo sang ila hinatag-sang-Dios nga kahilwayan, nagresulta ini sa pagkahuman sang templo, sa himaya sang Dios, kag sa kasulhay kag kaayuhan man sang iya katawhan.
Indi Pagwasi sang Katuyuan sang Hinatag-sang-Dios nga Kahilwayan
18. Ngaa masiling nga wala nawasi sang modernong-adlaw nga mga alagad ni Jehova ang katuyuan sang ila hinatag-sang-Dios nga kahilwayan?
18 Kamusta ang modernong-adlaw nga mga alagad sang Dios? Subong isa ka organisasyon, wala nila nawasi ang katuyuan sang ila hinatag-sang-Dios nga kahilwayan. Sang katuigan 1870 nagsugod sila nga nahilway sa Babilonianhon nga mga sala kag naagom ang dugang nga Cristianong kahilwayan. Nahisanto ini sa Hulubaton 4:18, nga nagasiling: “Ang banas sang matarong subong sang nagapamanagbanag nga kapawa nga nagasilak sing labi kag labi tubtob sa himpit nga adlaw.” Apang, subong nga ang dumaan nga katawhan sang Dios nabihag anay sa Babilonia sa pila ka tion, sang 1918 ang mga alagad ni Jehova naulipon sa pila ka kasangkaron sa Babilonia nga Daku. (Bugna 17:1, 2, 5) Ang mga katapo sang bug-os kalibutan nga emperyo sang butig nga relihion nagkasadya sang ang malaragwayon nga “duha ka saksi” nangin patay sa espirituwal. Apang paagi sa dibagay nga kaluoy sang Dios, sang 1919 ang iya hinaplas nga mga alagad nabuhi liwat, bangod ginhilway sila sa espirituwal. (Bugna 11:3, 7-11) Nagagamit sang ila hinatag-sang-Dios nga kahilwayan, nangin makugi sila nga mga saksi sang Labing Mataas. Busa, daw ano ka nagakaigo nga, sang 1931, malipayon nila nga ginbaton ang ngalan nga mga Saksi ni Jehova! (Isaias 43:10-12) Labi na kutob sang 1935 nga ang hinaplas nga mga Saksi ginbuylugan sang “dakung kadam-an,” nga nagalaum sa pagtigayon sang kabuhi nga dayon sa duta. Wala man nila mawasi ang katuyuan sang ila hinatag-sang-Dios nga kahilwayan.—Bugna 7:9-17.
19, 20. (a) Ano ang isa ka talalupangdon nga paagi diin ginagamit sing maayo sang mga alagad sang Dios ang ila hinatag-sang-Dios nga kahilwayan? (b) Sa anong iban pa talalupangdon nga paagi ginagamit sing maayo sang mga Saksi ni Jehova ang kahilwayan nga ginhatag sang Dios sa ila?
19 Ginagamit sing maayo sang katawhan ni Jehova ang ila hinatag-sang-Dios nga kahilwayan sa duha ka talalupangdon gid nga paagi. Una, ginagamit nila ini sa pagsunod sa matarong nga dalanon. (1 Pedro 2:16) Kag daw ano kaayo ang ila reputasyon! Halimbawa, isa ka tawo ang nagsulod anay sa Kingdom Hall sa Zurich, Switzerland, kag nagsiling nga luyag niya mangin isa ka Saksi ni Jehova. Sang ginpamangkot kon ngaa, nagsiling sia nga ang iya utod nga babayi isa anay ka Saksi kag gindisfellowship bangod sang imoralidad. Nagsiling sia: ‘Amo sina ang organisasyon nga luyag ko buylugan—isa nga wala nagatugot sang malain nga buhat.’ Bangod sang maayong rason nga ang New Catholic Encyclopedia nagsiling nga natigayon sang mga Saksi ni Jehova ang reputasyon subong “isa sang pinakamabuot nga grupo sa kalibutan.”
20 Ginagamit man sang mga Saksi ni Jehova ang ila hinatag-sang-Dios nga kahilwayan paagi sa pagtuman sang sugo sa ila nga ibantala ang maayong balita sang Ginharian, subong sang ginhimo ni Jesus. (Mateo 4:17) Paagi sa bibig kag naimprinta nga pahina, sa pormal kag dipormal, ginapahibalo nila ang Ginharian ni Jehova. Bangod sini nakabenepisyo mismo sila sing daku paagi sa pagpabakod sang ila pagtuo kag pagpasanag sang ila paglaum. Dugang pa, ang ila hilikuton nagaluwas sa ila kag sa mga nagapamati sa ila. (1 Timoteo 4:16) Nahanungod sini nga hilikuton, ang libro nga Dynamic Religious Movements nagasiling: “Mabudlay makakita sing mga katapo sang bisan anong iban nga grupo nga nagapangabudlay sing lakas katama sa ila relihion subong sang ginahimo sang mga Saksi.”
21. Ano ang pamatuod nga ginapakamaayo ni Jehova ang ministeryo sang iya katawhan?
21 Daw ano ang pagpakamaayo ni Jehova sa aton nga ginatuman naton ang katuyuan sang aton hinatag-sang-Dios nga kahilwayan! Makita ini gikan sa report sa pag-alagad sa latagon sang nagligad nga tuig—isa ka kataason sang sobra sa apat ka milyon ka manugbantala sang Ginharian, upod ang sobra sa napulo ka milyon nga nagtambong sa Memoryal sang kamatayon ni Jesus. Sa isa ka surbey, ang Irlandiya may 29 ka alagisod nga binulan nga kataason sang manugbantala; ang Mexico may 78 ka kataason sa 80 ka bulan; kag ang Japan may 153 ka alagisod nga kataason!
Gamita sing Maayo ang Imo Hinatag-sang-Dios nga Kahilwayan
22. Ano ang pangunang punto sang pila ka nagapahunahuna nga mga pamangkot nga mahimo naton ipamangkot sa aton kaugalingon?
22 Kon ikaw isa ka dedikado nga Saksi ni Jehova, ginagamit mo bala sing maayo ang kahilwayan nga ginhatag sa imo sang Dios? Dapat pamangkuton sang kada isa sa aton ang iya kaugalingon: ‘Nagahalong bala ako sa paggamit sang akon hinatag-sang-Dios nga kahilwayan agod indi masandad ang iban bangod sang malain nga buhat? Ginatuman ko bala sing bug-os ang mga layi ni Cesar, apang ginauna ang layi sang Dios? Nagakooperar bala ako sing bug-os sa mga gulang sa kongregasyon? Ginagamit ko bala sing bug-os ang akon hinatag-sang-Dios nga kahilwayan sa pagbantala sang maayong balita? Pirme bala ako “nagabugana sa buluhaton sang Ginuo”? Maukod ko bala nga ginahimud-usan ang isa ka sekular nga karera bisan pa magamit ko kuntani sing maayo ang akon hinatag-sang-Dios nga kahilwayan paagi sa pagpasangkad sang akon ministeryo, nagalab-ot sang dugang pa nga responsabilidad sa kongregasyon ukon bug-os tion nga pag-alagad?’—1 Corinto 15:58.
23. Ano ang dapat naton himuon agod indi naton mawasi ang katuyuan sang hinatag-sang-Dios nga kahilwayan?
23 Kabay nga kita tanan ‘magatilaw kag magatan-aw nga maayo si Jehova.’ (Salmo 34:8) Magsalig kita sa iya, magtuman sang iya mga sugo, kag maghimaya sang iya balaan nga ngalan paagi sa mapisan nga pagwali sang iya Ginharian. Dumduma nga ang ‘nagasab-ug sing bugana magaani sing bugana.’ (2 Corinto 9:6) Busa, maghimo kita sing bug-os tagipusuon nga pag-alagad kay Jehova kag ipakita nga wala naton nawasi ang katuyuan sang aton hinatag-sang-Dios nga kahilwayan.
Paano Mo Sabton?
◻ May anong sahi sang kahilwayan ang Dios?
◻ Ano ang mga limitasyon sang tawhanon nga kahilwayan?
◻ Paano ginpaposible ang matuod nga kahilwayan?
◻ Ano ang dapat naton himuon agod malikawan ang pagkawasi sang katuyuan sang hinatag-sang-Dios nga kahilwayan?
[Laragway sa pahina 9]
Ang tawhanon nga kahilwayan ginalatiran sang mga butang subong sang kasuguan sa grabidad