Ano ang Matun-an sang Iban sa Pagtan-aw sa Imo?

1. Ano ang natun-an sang mga disipulo sa pagtan-aw nila kay Jesus?

¹ Si Jesus nagsiling: “Itakod ang akon gota kag magtuon kamo sa akon.” (Mat. 11:29) Maathag nga gintudluan niya ang iban indi lamang paagi sa pulong kundi sa pagpahamtang man sing maayong halimbawa. Hunahunaa kon ano ang natun-an sang mga disipulo sa pagtan-aw kay Jesus. Maluluy-on sia, mainayuhon, kag mahigugmaon. (Mat. 8:1-3; Mar. 6:30-34) Mapainubuson gid sia. (Juan 13:2-5) Samtang nagapakig-upod sila kay Jesus sa ministeryo, nasaksihan sang mga disipulo nga daw wala sia ginakapoy kag epektibo sa pagtudlo sing kamatuoran sa iban. (Luc. 8:1; 21:37, 38) Paano maapektuhan ang iban nga nagatan-aw sa aton sa ministeryo?

2. Ano ang epekto sang aton maayo nga pamayo kag pamatasan sa mga tagbalay?

² Mga Tagbalay: Ang aton maugdang nga pamayo, maayo nga pamatasan, kag pagpakita sing personal nga interes may daku nga epekto sa mga tagbalay. (2 Cor. 6:3; Fil. 1:27) Matalupangdan nila nga pirme naton ginagamit ang Biblia. Ang iban nagdayaw kay matinahuron kita nga nagapamati sa ila ginahambal. Ang pagpahamtang sing maayong halimbawa sa sini nga mga bahin makabuyok gid sa mga tawo sa mensahe sang Ginharian.

3. Paano kita mangin maayo nga impluwensia sa aton mga kauturan?

³ Mga Kauturan: Hunahunaa man ang aton maayo nga impluwensia sa aton mga kauturan. Kon makugi kita sa ministeryo, ang iban mahimo mangin makugi man. Subong nga ang salsalon nagapatalom sang salsalon, ang aton nahanda sing maayo nga presentasyon nagapalig-on sa iban nga pauswagon man ang ila kalantip sa pagbantala. (Hulu. 27:17) Ang aton maukod nga paghupot sing sibu nga rekord sang mga interesado kag pagbalik sa ila sa gilayon nagapalig-on man sa iban nga himuon ini. Mangin maayo kita nga impluwensia sa aton mga kauturan paagi sa pagtuman sing bug-os sa aton ministeryo.—2 Tim. 4:5.

4. Ngaa dapat naton hatagan sing tion ang pagbinagbinag sang aton halimbawa?

⁴ Sa tion kag tion, binagbinaga kon ano ang imo ginahimo kag ginasiling, kag kon ano ang epekto sini sa iban. Ang aton maayo nga halimbawa makapahamuot kay Jehova kag mapabutyag man naton ang balatyagon ni apostol Pablo sang nagsiling sia: “Mangin manug-ilog kamo sa akon, subong nga ako man kay Cristo.”—1 Cor. 11:1.