Isa ka Libro nga Dapat Basahon
“Indi dapat patihan ang Biblia.” Amo ang ginsiling sang isa ka propesor sa unibersidad sa isa ka prangka lamharon nga babayi.
“Nabasa mo na bala ang Biblia?” pamangkot sang babayi.
Sa kakibot, ginbaton sang propesor nga wala pa niya mabasa ini.
“Ngaa makasiling ka sing subong sina sa libro nga wala mo pa gali mabasa?”
May rason ang babayi. Namat-od ang propesor nga basahon anay ang Biblia kag nian tan-awon kon ano ang masiling niya sa sini.
ANG Biblia, nga ginahuman sang 66 ka sinulatan, ginalaragway subong amo “mahimo ang natipon nga mga libro nga may labing daku nga impluwensia sa maragtas sang tawo.”1 Sa pagkamatuod, naimpluwensiahan sini ang pila sang labing daku nga arte, literatura, kag musika sang kalibutan. May daku gid ini nga epekto sa kasuguan. Ginadayaw ini bangod sang maayo nga pagkasulat sa sini kag ginapabaloran sang madamong edukado nga tawo. Talalupangdon nga daku gid ang epekto sini sa kabuhi sang katawhan sa tanan nga sahi sang katilingban. Madamo nga bumalasa sini ang napahulag sa pagpakita sing dalayawon nga pagkamainunungon. Ginrisgo pa gani sang iban ang ila kabuhi mabasa lamang ini.
Sa amo man nga tion, ginaduhaduhaan gihapon ang Biblia. May mga tawo nga may opinyon na sa sini bisan wala pa nila mabasa ini. Mahimo nga ginakilala nila ang maayo nga pagkasulat sa sini ukon ang maragtas sini, apang nagapalibog sila: Paano ang isa ka libro nga ginsulat sang nagligad nga linibo ka tuig mapuslanon gihapon sa kalibutan karon? Nagakabuhi kita sa “dag-on sang mga impormasyon.” Madali naton mahibaluan ang impormasyon tuhoy sa pinakaulihi nga hitabo kag teknolohiya. Madali matigayon ang laygay sang mga “eksperto” tuhoy sa halos tanan nga sahi sang problema sang kabuhi karon. May impormasyon gid bala ang Biblia nga praktikal sa karon?
Ginatinguhaan sining brosyur nga sabton ining mga pamangkot. Wala ini gintuyo nga ipilit sa imo ang relihioso nga mga pagtamod ukon mga pagtuluuhan, kundi agod ipakita sa imo nga ining may impluwensia sa maragtas nga libro, ang Biblia, takus nga binagbinagon mo. Ang isa ka report sang 1994 nagsiling nga ang pila ka edukador mabaskog nga nagapati nga ang Biblia isa ka malig-on gid nga bahin sang kultura sang Katundan amo kon ngaa ang “bisan sin-o, tumuluo man ukon indi, nga wala sing nahibaluan sa mga panudlo kag mga kasaysayan sang Biblia wala man sing nahibaluan sa kultura sini.”2
Ayhan, sa tapos mo mabasa ang nabalhag sa sini, magaugyon ka nga—relihioso man ukon indi ang isa ka tawo—ang Biblia isa ka libro nga dapat basahon.
[Kahon/Retrato sa pahina 3]
“Utang ko ang akon espiri- tuwal nga paghantop sa isa ka libro nga nabasa ko.—Isa ka libro? Huo, kag isa ini ka daan simple nga libro, indi mapakunukunuhon subong sang kinaugali, kag amo man ka bunayag . . . Kag ang ngalan sini nga libro simple lamang nga libro, ang Biblia.”—Heinrich Heine, Aleman nga manunulat sang ika-19 nga siglo.3