Paggawi nga Nagahimaya sa Dios
1. Ngaa mahapos lang mahibaluan kon matambong ang mga Saksi ni Jehova sa distrito nga kombension?
1 Mahapos lang mahibaluan sang mga tawo nga magatambong kita sa kombension. Nagasuksok kita sang badge kag tingob nga nagabiyahe kada adlaw. Ang masunod amo ang pila ka pahanumdom nga makabulig sa aton nga mahimaya ang Dios paagi sa aton maayo nga paggawi samtang yara sa kombension.—1 Ped. 2:12.
2. Paano naton mahimaya ang Dios sa aton maugdang nga pamayo samtang yara sa duog sang kombension?
2 Maugdang nga Pamayo: Nagadayaw ang mga tawo sa aton maugdang nga pamayo kon nagatambong kita sa kombension. Pero, ang aton estilo sang pamayo may daku nga epekto sa iban kon nagakaon kita sa mga restawran ukon nagapamalaklon. Ang aton ginasuksok sa sina nga tion dapat maugdang kag indi sobra ka kaswal. Dapat makita sang mga tawo ang kinatuhayan naton sa mga di-tumuluo. (Roma 12:2) Dapat man naton isuksok ang aton badge kay magapahibalo ini parte sa kombension, makahatag sing kahigayunan nga magpanaksi, kag makilala kita sang iban nga delegado.
3. Paano naton mapakita ang pagpailob kag pagtahod?
3 Pagpailob kag Pagtahod: Sa sining kalibutan nga madamo ang maiyaiyahon, ang mga tawo magadayaw gid sa aton pagpailob kag pagtahod. (2 Tim. 3:1-5) Kon nagareserba sing pulungkuan ukon nagapila agod magkuha sing ginpagua nga publikasyon, dapat naton pangitaon, indi ang aton kaugalingon nga kaayuhan, kundi ang iya sang iban. (1 Cor. 10:23, 24) Pagkatapos sang iya una nga pagtambong sa kombension, ang isa ka interesado nga lalaki nagsiling, “Wala ako sing madumduman nga pamulongpulong sina nga adlaw, pero indi ko gid malipatan ang paggawi sang mga Saksi.”
4. Ngaa dapat kita magboluntaryo sa kombension kon ginatugot sang aton kahimtangan?
4 Kinabubut-on nga Pagboluntaryo: Ang pagboluntaryo sing kinabubut-on tanda sang matuod nga mga Cristiano. (Sal. 110:3) Sa isa ka kombension, mga 600 ka kauturan ang nagboluntaryo sa pagpaninlo antes sang kombension. Ang isa ka empleyado nagsiling: “Subong pa lang kami nakakita sing pareho sini! Daw indi mapatihan nga tanan sila boluntaryo.” Ginakalangkagan gid naton ang 2013 distrito nga kombension kag ang kahigayunan nga mahimaya ang Dios paagi sa aton paggawi.