Mga Panuytoy Para sa mga Manugtatap sang Eskwelahan

SA TAGSA ka kongregasyon, isa ka gulang ang ginatangdo nga mangin manugtatap sang Teokratikong Eskwelahan Para sa Ministeryo. Kon gintugyanan ka sini nga responsabilidad, ang imo kapagsik para sa eskwelahan kag ang imo personal nga interes sa pag-uswag sang tagsa ka estudyante mangin importante nga mga rason sa kon ano ang mahimo sang eskwelahan sa inyo kongregasyon.

Ang isa ka importante nga bahin sang imo asaynment amo ang pagdumala sa Teokratikong Eskwelahan Para sa Ministeryo sang kongregasyon kada semana. Dumduma nga dugang pa sa mga estudyante nga may mga asaynment sa sini nga eskwelahan, may iban pa nga nagatambong. Dumalahi ang eskwelahan sa paagi nga ang bug-os nga kongregasyon nagabaton sing makapalig-on, praktikal nga mga pahanumdom may kaangtanan sa di-magkubos sa isa sang mga tulumuron sang eskwelahan nga ginsambit sa pahina 5 tubtob 8 sining tulun-an nga libro.

Mangin interesado sa tanan nga estudyante, naiskedyul man sila sa paghatag sing asaynment sa pagbasa, sa paghatag sing estilo-demonstrasyon nga mga presentasyon, ukon sa paghatag sing mga pamulongpulong. Buligi sila nga tamdon ang ila ginahimo indi lamang subong asaynment kundi subong isa ka kahigayunan sa pag-uswag sa ila pag-alagad kay Jehova. Sa pagkamatuod, ang pagpanikasog nila mismo amo ang panguna nga rason sa ila pag-uswag. Apang importante man nga magpakita ka sing mainayuhon nga interes, ginabuligan sila nga mahangpan ang importansia sang lalaygayan nga mga punto, kag ginapaathag kon paano iaplikar ini nga laygay. Agod mahimo ini, magpamati sing maayo sa tagsa ka presentasyon agod makahatag ka sing mapuslanon nga mga komento.

Pat-ura nga sugdan kag tapuson ang eskwelahan sa husto nga oras. Magpahamtang sing maayo nga halimbawa paagi sa paghupot sang imo mga komento suno sa gintalana nga oras para sa sini. Kon magsobra sa oras ang estudyante, ikaw ukon ang imo kabulig dapat maghatag sing sinyales. Dapat tapuson sang estudyante ang dinalan nga iya ginahambal kag magbiya sa plataporma. Kon ang iban pa nga bahin sang programa magsobra sa oras, palip-uta ang imo mga komento, kag nian hambali ini upod sa utod pagkatapos sang miting.

Kon yara ka, dapat ikaw ang magdumala sang eskwelahan. Kon indi ka makatambong kon kaisa, ang isa pa ka gulang nga gintangdo na anay sang hubon sang mga gulang amo ang dapat magdumala sa eskwelahan. Kon kinahanglan mo ang bulig sa paghanda sing mga iskedyul, sa pagsulat kag pagpanagtag sing mga pormas para sa asaynment, ukon sa pagpangita sing mga salili sa programa, ang isa ka ministeryal nga alagad nga gin-asayn sang hubon sang mga gulang mahimo magbulig sa sini nga mga butang.

Paglista sa mga Estudyante. Palig-una ang tanan nga mga manugbantala nga magpalista sa eskwelahan. Ang iban nga aktibo nga nagapakig-upod sa kongregasyon mahimo magpalista kon nagaugyon sila sa mga panudlo sang Biblia kag ang ila kabuhi nahisuno sa Cristianong mga prinsipio. Kon ang isa nagapabutyag sang handum nga magpalista, dayawa sia sing mahigugmaon. Kon indi pa sia isa ka manugbantala, subong manugtatap sang eskwelahan dapat mo binagbinagon upod sa iya ang mga kinahanglanon sa pagpalista sa eskwelahan, ginahimo ini kon posible sa presensia sang nagadumala sang pagtuon sa Biblia sa iya (ukon sa presensia sang isa ka tumuluo nga ginikanan). Ining mga kinahanglanon kaanggid sa kon ang isa mangin di-bawtismado nga manugbantala. Makita ini sa pahina 97 tubtob 99 sang Organisado sa Pagtuman Sang Aton Ministeryo. Hupti pirme ang bag-o nga listahan sang tanan nga nagpalista sa eskwelahan.

Paggamit Sing Pormas Para sa Laygay. Ang pormas para sa laygay para sa tagsa ka estudyante yara sa iya personal nga kopya sang libro, sa pahina 79 tubtob 81. Subong sang ginapakita sang duag, ang bisan ano nga lalaygayan nga punto gikan sa 1 tubtob 17 mahimo gamiton kon ang estudyante ginhatagan sing asaynment sa pagbasa. Para sa estilo-demonstrasyon nga mga presentasyon, ang bisan ano nga lalaygayan nga punto magluwas sa 7, 52, kag 53 mahimo gamiton. Ang laygay para sa mga pamulongpulong nagalakip sang tanan nga punto magluwas sa 7, 18, kag 30.

Kon gin-asayn ang isa ka lalaygayan nga punto, dapat pat-uron sang manugtatap sa eskwelahan nga sulatan sing lapis sa idalom sang “Petsa nga Gin-asayn” ang blangko nga masunod sa sini nga punto sa pormas para sa laygay sa libro sang estudyante. Pagkatapos nga mahatag sang estudyante ang iya asaynment, pamangkuta sia sing pribado kon bala nahimo niya ang pag-ensayo sa katapusan nga bahin sang pagbinagbinag sa lalaygayan nga punto. Kon nahimo niya, dapat tsekan ang kahon sa pormas. Kon ginapanugyan mo nga padayunon niya nga pangabudlayan ang amo gihapon nga lalaygayan nga punto, indi na kinahanglan ang dugang nga pagsulat sa pormas para sa laygay; indi lang pagsulati ang blangko para sa “Petsa nga Natapos.” Markahan lamang ini kon handa na sia magsaylo sa iban pa nga punto. Dugang pa, sa pahina 82 sa libro sang estudyante, sa nawala sang danyag nga gingamit, ang petsa dapat isulat pagkatapos sang tagsa ka bahin sang estudyante. May yara blangko sa pormas para sa laygay kag sa listahan sang mga danyag agod magamit sing duha ka beses ang kada isa. Dapat dala sang mga estudyante ang ila libro sa tion sang programa.

Mag-asayn sang isa lamang ka lalaygayan nga punto sa kada tion. Sa masami, mas maayo nga iasayn ang mga lalaygayan nga punto sing pasunod suno sa paglista sini. Apang, kon ang pila ka estudyante magpakita sing talalupangdon nga ikasarang, mahimo mo sila palig-unon nga tun-an kag iaplikar ang pila ka leksion sing kinaugalingon. Nian mahimo mo sila buligan sa mga punto nga sa pamatyag mo makabulig sing daku sa ila pag-uswag subong epektibo nga mga humalambal kag mga manunudlo.

Bisan pa ang estudyante nakapalista na sa eskwelahan sa sulod sang madamong tuig, makabenepisyo sia sing daku sa pagtuon kag pag-aplikar sa tagsa ka tulun-an. Agod mabuligan ang mga estudyante nga may espesipiko nga mga kinahanglanon, mahimo mo pilion ang pila ka kalidad sa paghambal nga mapangabudlayan nila sa baylo nga pasunuron ang lalaygayan nga mga punto suno sa paglista sa sini.

Paghatag Sing Laygay. Kon nagahatag sing laygay, gamita sing maayo ang mga halimbawa kag mga prinsipio sa Biblia. Dapat mabatyagan sang mga estudyante nga ang laygay nga ginahatag kag ang paagi sang paghatag sini nahisuno sa mataas nga mga prinsipio sang Pulong sang Dios.

Dumduma nga ikaw “masigkamanugpangabudlay” sang imo mga kauturan. (2 Cor. 1:24) Kaangay nila, dapat padayon ka man nga mag-ukod agod mag-uswag subong humalambal kag manunudlo. Tun-i sing personal ang libro nga Magbenepisyo sa Pagpanudlo Sang Teokratikong Eskwelahan Para sa Ministeryo, iaplikar ang laygay sini, kag magpahamtang sing maayong halimbawa para sa iban nga himuon man ini.

Samtang ginahimo mo ini, himua nga tulumuron ang pagbulig sa mga estudyante nga mangin maayo nga mga manugbasa, sangkol nga mga humalambal, kag epektibo nga mga manunudlo. Agod mahimo ini, panikasugi nga maghatag sing bisan anong kinahanglanon nga bulig agod mahangpan sang mga estudyante kon ano ang nanuhaytuhay nga mga kalidad sang paghambal, kon ngaa importante ini, kag kon paano ini palambuon. Ining libro gindesinyo sa paagi nga magabulig sa imo sa paghimo sini. Apang sa masami, indi lamang ang pagbasa sing mga tinaga sa libro ang kinahanglan sa imo bahin. Binagbinaga ang mga ideya nga ginapabutyag sang mga tinaga kag kon paano ini iaplikar.

Kon maayo ang hinimuan sang estudyante sa isa ka punto, dayawa sia. Sambita sing malip-ot kon ano ang naghimo sini nga epektibo ukon ngaa importante ang iya ginhimo. Kon makabenepisyo sia sa paghatag sing dugang pa nga atension sa isa ka butang, pat-ura nga nahangpan niya kon ngaa. Binagbinaga kon paano matigayon ini nga tulumuron. Mangin espesipiko, kag sa amo man nga tion, mangin mainayuhon.

Dumduma nga para sa madamo, ang paghatag sing presentasyon sa atubangan sang isa ka grupo mabudlay gid. Kon ginabatyag sang isa ka tawo nga wala sia nakahimo sing maayo, mahimo sia magpalibog kon bala dapat padayunon niya ang pagtinguha. Iluga si Jesus, nga wala nagbali sang “tabun-ak nga basag” ukon nagpalong sang “lino nga pabilo nga nagapiraw.” (Mat. 12:20) Talupangda ang emosyonal nga kahimtangan sang imo estudyante. Kon nagalaygay, tan-awa kon bala ang estudyante bag-uhan pa lang ukon eksperiensiado na nga manugbantala. Ang mainit kag sinsero nga komendasyon makapalig-on sa mga tawo nga padayon nga himuon ang ila bug-os nga masarangan.

Pakig-anguti ang tagsa ka estudyante sing matinahuron. Ang Roma 12:10 nagasiling sa aton: “Sa pagpadungog sa isa kag isa manguna kamo.” Daw ano ka nagakaigo nga laygay para sa manuglaygay sa Teokratikong Eskwelahan Para sa Ministeryo! Kon ang estudyante mas magulang sa imo, sunda sing maayo ang panuytoy nga ginhatag sa 1 Timoteo 5:​1, 2. Apang, walay sapayan sang edad sang tawo, kon ang laygay nga nagadalahig sa paghimo sing mga pagpasibu sa paagi sang paghimo niya sing mga butang ginahatag sing mainayuhon, masami nga mas madali ini batunon.​—Hulu. 25:11.

Kon nagalaygay, ipadaku sa estudyante ang tulumuron sang paghanas. Ining tulumuron indi ang paghimo sing maayo agod lamang dayawon sa ginhatag nga presentasyon kag hambalan nga magpadayon sa masunod nga lalaygayan nga punto. Ang tulumuron indi agod mangin isa ka humalambal kag isa ka manunudlo nga pagadayawon sang iban. (Hulu. 25:27) Ang handum naton amo ang paggamit sang aton dulot sa paghambal agod dayawon si Jehova kag buligan ang iban nga kilalahon kag higugmaon sia. Ang aton paghanas amo ang pagsangkap sa aton sa paghimo sing epektibo sa hilikuton nga ginsiling sa Mateo 24:14 kag 28:​19, 20. Ang bawtismado nga mga utod nga lalaki nga kalipikado mahimo agdahon sa ulihi nga makigbahin sa pagtatap sa “panong sang Dios” subong mga humalambal sa publiko kag mga manunudlo.​—1 Ped. 5:​2, 3.

Magpanugda nga basahon sang mga estudyante ang bahin sang libro nga nagabinagbinag sang masunod nila nga lalaygayan nga punto sa sulod sang pila ka adlaw pagkatapos ini gin-asayn. Palig-una sila nga iaplikar ang ila natun-an sa paghanda sang ila bahin sa eskwelahan, sa matag-adlaw nga pagpakigsugilanon, sa pagkomento sa mga miting, kag sa ministeryo sa latagon.

Paghimo Sing mga Asaynment. Kinaandan na nga dapat ini himuon sa di-magkubos tatlo ka semana nga abanse. Ini tanan nga asaynment dapat himuon sa nasulat nga porma kon posible.

Ang mga bahin nga nagalakip sang pagtudlo sa kongregasyon dapat iasayn sa mga gulang, ilabi na sa mga nagahatag sini nga mga bahin sing epektibo, kag sa ministeryal nga mga alagad nga maayo nga mga manunudlo.

Sa pagpat-od kon diin nga asaynment sang estudyante ang iasayn sa mga utod nga lalaki kag kon diin sa mga utod nga babayi, sunda ang mga instruksion nga ginhatag upod sa iskedyul sang eskwelahan. Kon diutay lamang ang mga estudyante nga lalaki apang madamo sing babayi, maghalong sa paghatag sa mga kauturan nga lalaki sing madamo nga kahigayunan sa paghatag sing mga bahin nga indi lamang limitado sa pagbasa sing Biblia.

Binagbinaga ang mga kahimtangan sang mga indibiduwal kon nagahatag sing mga asaynment. Kinahanglan bala nga hatagan sing asaynment sa eskwelahan ang isa ka gulang ukon ministeryal nga alagad sa gab-i nga may bahin man sia sa Miting sa Serbisyo ukon sa semana nga sia man ang magahatag sing pamulongpulong publiko sa kongregasyon? Kinahanglan bala nga iasayn ang isa ka utod nga babayi sa paghatag sing presentasyon sa amo man nga gab-i nga ang iya bata pa nga anak may asaynment man, nga mahimo kinahanglan niya buligan? Ilabi na sa bahin sang isa ka lamharon ukon isa ka estudyante sa Biblia nga indi pa bawtismado, nagakabagay bala ang topiko? Pat-ura nga ang asaynment nagakabagay sa lalaygayan nga punto nga ginapangabudlayan sang estudyante.

Para sa mga asaynment nga ginahatag sa mga kauturan nga babayi, ang estudyante masami nga magapili sang iya kaugalingon nga danyag suno sa mga instruksion sa pahina 78 kag 82. Ang isa ka kabulig dapat iasayn, apang mahimo maggamit sing dugang nga kabulig. Kon mangabay ang isa ka estudyante sing isa ka kabulig nga bagay gid sa danyag, dapat ipakita ang konsiderasyon sa sina nga pangabay.

Dugang nga mga Klase. Kon kapin sa 50 ka estudyante ang nalista, ayhan luyag mo binagbinagon ang paggamit sing dugang nga mga lokasyon para sa mga bahin nga ihatag sang mga estudyante. Suno sa lokal nga kinahanglanon, ini nga kahimusan mahimo gamiton sa tanan nga presentasyon sang estudyante ukon sa katapusan nga duha ka bahin lamang.

Ang tagsa ka dugang nga klase dapat may kalipikado nga manuglaygay, kag mas maayo kon gulang. Kon kinahanglanon, isa ka kalipikado nga ministeryal nga alagad ang mahimo magsalili. Ining mga manuglaygay dapat gin-aprobahan sang hubon sang mga gulang. Mangabudlay sing suod sa ila agod mahatagan sing dugang nga igtalupangod ang lalaygayan nga punto nga dapat pangabudlayan sang mga estudyante sa ila masunod nga asaynment walay sapayan kon diin man nga lokasyon ang ila masunod nga presentasyon.

Espesyal nga Klase sa Pagbasa. Kon nakita sang hubon sang mga gulang nga nagakinahanglan ang pila ka indibiduwal sa kongregasyon sing sadsaran nga edukasyon sa pagbasa sa lenguahe nga ginagamit sa kongregasyon, sarang ka makahimo sing mga kahimusan para sa sini nga kalakip sa Teokratikong Eskwelahan Para sa Ministeryo. Ini nga pagtudlo mahimo magalakip sa sadsaran nga ikasarang sa pagbasa kag pagsulat, ukon ang tulumuron sini mahimo amo ang pag-uswag sa pagbasa.

Ini nga mga klase indi man gid dapat hiwaton sing dungan sa tion nga ang mga estudyante nagahatag sang ila bahin sa Teokratikong Eskwelahan Para sa Ministeryo. Agod makabulig sing nagakaigo, mahimo kinahanglan ang dugang pa nga tion sangsa ginahinguyang sa eskwelahan. Ang lokal nga mga gulang amo ang magapat-od kon ano ang kinahanglanon kag kon san-o ihatag ini nga instruksion. Suno sa kinahanglanon, mahimo nga ang pagtudlo himuon sa grupo ukon sing isa-isa.

Kinahanglan ang kalipikado nga manunudlo. Mas maayo kon ang asaynment ihatag sa isa ka utod nga lalaki nga maayo magtudlo kag nakahibalo sing maayo sa lenguahe. Kon wala sing kalipikado nga utod nga lalaki, ang mga gulang mahimo magpangabay sing bulig sang isa ka sangkol, huwaran nga utod nga babayi. Dapat sia magtakdong kon nagatudlo sa klase.​—1 Cor. 11:​3-​10; 1 Tim. 2:​11, 12.

Ang bukleta nga Apply Yourself to Reading and Writing matigayon sa madamo nga lenguahe. Gindesinyo ini sa pagtudlo sing sadsaran nga mga ikasarang sa pagbasa kag pagsulat. Ang iban nga materyal nga nagatudlo mahimo man magamit, depende sa ikasarang sa pagbasa sang mga nagpalista. Kon maayo ang pag-uswag sang estudyante, dapat palig-unon sila nga makigbahin sa regular nga programa sang Teokratikong Eskwelahan Para sa Ministeryo.

Subong manugtatap sang Teokratikong Eskwelahan Para sa Ministeryo, madamo ang imo mahimo agod makabenepisyo ang kongregasyon. Maghanda sing maayo, kag nahisuno sa laygay sang Roma 12:6-8, atipana ang imo asaynment subong bilidhon nga butang nga ginsalig sang Dios.