Magkalipay sa Pulong sang Dios

MALIPAYON ang tawo nga ang iya “kalipay yara sa kasuguan ni Jehova.” Ina nga tawo nagabasa sang Pulong sang Dios “sing mahinay sa adlaw kag gab-i.” (Sal. 1:​1, 2) Naeksperiensiahan mo bala ina nga kalipay? Paano mo mapadaku ang kalipay nga mahatag sa imo sang Pulong sang Dios?

Mamati Samtang Nagahambal si Jehova

Indi lamang pagbasaha ang mga tinaga. Panan-awa ang mga kahimtangan sa imo ginabasa. Handurawa ang mga tingog sadtong ginakutlo. Samtang ginabasa mo ang nagabukas nga mga kapitulo sang Biblia, pamatii si Jehova nga nagapahayag, sing pasunod, kon ano ang ginhimo agod ang duta mapuy-an sang tawo. Pamatii samtang ginasilingan niya ang iya Anak, ang Batid nga Manugpangabudlay, nga nag-abot na ang tion nga tugahon ang unang mga tawo. Handurawa ang danyag: nagrebelde sanday Adan kag Eva, ginhukman sila sang Dios kag, sang ulihi, ginpaguwa niya sila sa Paraiso. (Genesis, kap. 1-3) Batyaga ang kapunaw kon mabasa mo nga ang isa ka tingog gikan sa langit nagpakilala kay Jesucristo subong Anak sang Dios, ang hinigugma, ang isa nga ginpadala sang Dios agod maghalad sang iya kabuhi para sa katawhan. (Mat. 3:​16, 17) Hunahunaa ang reaksion ni apostol Juan sang nabatian niya si Jehova nga nagsiling: “Yari karon! Ginahimo ko nga bag-o ang tanan nga butang.” (Bug. 21:5) Sa pagkamatuod, ang pagbasa sing Pulong sang Dios sa sining paagi makalilipay gid!

Padayuna ang pagbasa sa inspirado nga rekord, kag makilala mo si Jehova subong isa ka halangdon kag makapulunaw nga persona. Magasuod gid ikaw sa sining Isa nga nagahigugma sa aton, nga nagapakig-angot sa aton sing maluluy-on, nga nagabulig sa aton kon ginatinguhaan naton sing mapainubuson nga himuon ang iya kabubut-on, kag nagapakita sa aton kon paano magmadinalag-on sa tanan naton nga ginahimo.​—Jos. 1:8; Sal. 8:1; Isa. 41:10.

Kon mas madamo nga tion ang ginahinguyang mo sa pagbasa sing Biblia, labi nga malipay ka samtang nagadugang ang imo ihibalo tuhoy sa kabubut-on sang Dios para sa imo. Apang ang kalipay magalabaw pa sa sina. Kon ang imo pagbasa nagahatag sa imo sing bulig nga kinahanglanon mo sa pag-atubang sing maalamon sa mga problema, magabatyag ka kaangay sang salmista nga nagsiling: “Ang imo mga pahanumdom makatilingala. Amo kon ngaa ginasunod ini sang akon kalag.” (Sal. 119:129) Malipay man ikaw samtang mahantop mo gikan sa Kasulatan ang mga prinsipio nga nagabulig sa pagdihon sang imo panghunahuna kag sang imo mga handum sa diosnon nga dalanon.​—Isa. 55:​8, 9.

Ang Biblia may panuytoy sa moral nga nagaamlig sa aton gikan sa kahalitan kag nagapakita sa aton sing husto nga dalan. Samtang ginabasa naton ini, mahangpan naton nga si Jehova isa ka Amay nga nakahibalo kon ano nga mga problema ang magautwas kon magpadala kita sa mga kailigbon sang di-himpit nga unod. Indi niya luyag nga mag-antos kita sing masakit nga mga resulta nga mahanabo gid kon wala ginasunod ang iya mataas nga mga talaksan sa moral. Nagaulikid sia sa aton kag luyag niya nga magkalipay kita sa labing maayo nga dalanon sang pagkabuhi. Ang pagbasa naton sang iya Pulong makabulig sa aton nga mahangpan sing labi pa kon daw ano nga pagpakamaayo nga sia ang aton Dios kag langitnon nga Amay.

Basaha ang Biblia Adlaw-adlaw

Ang salmista nagsiling tuhoy sa tawo nga nagabasa sing Pulong sang Dios adlaw-adlaw: “Ang tanan nga ginahimo niya magamadinalag-on.” (Sal. 1:3) Huo, walay sapayan sang aton pagkadihimpit, walay sapayan nga nagakabuhi kita sa malaut nga sistema sang mga butang ni Satanas, kag walay sapayan sang mga panikasog sang Yawa nga laglagon kita, ang regular nga pagbasa kag pag-aplikar sang kon ano ang yara sa Pulong sang Dios magabulig sa aton nga magmadinalag-on sa tanan nga butang nga nagadalahig sang aton kaangtanan kay Jehova.

Bangod ginaipit kita sining daan nga sistema, ang pagtalupangod sa mga panghunahuna sang Manunuga bisan sa pila lamang ka hamili nga mga tion kada adlaw makapabakod sa aton. Ang iban nga ginbilanggo tungod sa ila pagtuo nakatigayon lamang sing pila ka bersikulo nga nakita nila nga ginkutlo sa mga artikulo sang pamantalaan. Gingunting nila ini, ginsaulo, kag ginpamalandungan. Ginpakamaayo ni Jehova ang ila mga panikasog bangod ginhimo nila kon ano ang gintugot sang ila kahimtangan sa pagkuha sing ihibalo gikan sa Pulong sang Dios. (Mat. 5:3) Apang, ang kalabanan sa aton may daku gid nga kahilwayan sangsa sina. Indi kita maghinakop nga ang padali nga pagbasa sing isa ka bersikulo sang Biblia sing makaisa sa isa ka adlaw may pila na ka milagruso nga epekto. Apang, matigayon naton ang mga pagpakamaayo kon pasibuon naton ang aton mga prioridad agod mabasa ang isa ka bahin sang Biblia kada adlaw, mahunahuna ini, kag maaplikar ini sa aton kabuhi.

Ang matuod, ang labing maayo naton nga mga plano indi madayon kon kaisa. Kon matabo ina, ginahatagan naton sing prioridad ang mga butang nga importante. Halimbawa, indi naton paghungdon nga indi mag-inom sing tubig sa isa ukon duha ka adlaw. Busa, bisan ano man ang matabo sa aton matag-adlaw nga pagkabuhi, dapat kita maghinguyang sing pila ka tion agod papagsikon ang aton kaugalingon paagi sa mga tubig sang kamatuoran.​—Bin. 17:11.

Basaha ang Bug-os nga Pulong Sang Dios

Nabasa mo na bala ang bug-os nga Biblia? Ang iban nabudlayan maghunahuna nga basahon ang Genesis tubtob sa Bugna. Busa, madamo sang luyag magbasa sing bug-os nga Biblia ang nagsugod paagi sa pagbasa anay sa Cristianong Griegong Kasulatan. Ngaa? Ayhan bangod mas mahapos nila mahangpan kon paano yadtong mga tulun-an sa Biblia nagadalahig sa ila subong mga indibiduwal nga nagatinguha nga maglakat suno sa mga tikang ni Cristo. Ukon ayhan ang Cristianong Griegong Kasulatan daw indi tanto kalawig basahon​—labaw lang diutay sa ikap-at nga bahin sang Biblia. Apang pagkatapos nila mabasa yadtong 27 ka tulun-an, nagsaylo sila sa 39 ka tulun-an sang Hebreong Kasulatan kag ginsugdan ang pagbasa sini kag naluyagan ini. Sang natapos na nila ang Hebreong Kasulatan, nakapahamtang sila sing isa ka sulundan sang regular nga pagbasa sing Biblia, busa nagpadayon sila, nga ginabasa liwat ang Cristianong Griegong Kasulatan, kag wala na gid sila mag-untat. Kabay nga ang pagbasa sa Pulong sang Dios adlaw-adlaw mangin bug-os kabuhi mo man nga batasan.

May isa bala sa imo pamilya ukon kongregasyon nga indi makahibalo magbasa? Ngaa indi magboluntaryo nga regular mo sia nga basahan sing Biblia? Magabenepisyo ka, kag magabenepisyo man sia samtang ginapamalandungan niya ang iya mga nabatian kag nian ginaaplikar ini sa iya kabuhi.​—Bug. 1:3.

Sa ulihi, ayhan luyag mo nga maghimo sing pinasahi nga mga proyekto tuhoy sa pagbasa mo sing Biblia. Ang pila sini makabulig sa imo nga mahangpan ang kaangtanan sa ulot sang nanuhaytuhay nga mga bahin sang Biblia. Kon may marhinal nga mga reperensia ang imo Biblia, mahimo ini makatudlo sa imo sa mga detalye sa maragtas kag kaanggid nga mga hitabo. Mahimo ini makabulig sa imo nga mahantop ang mga kahimtangan nga nagadul-ong sa pagsulat sang nagkalainlain nga mga salmo kag subong man sang mga sulat nga ginsulat sang mga apostoles ni Jesucristo. Ang Insight on the Scriptures nagahatag sing madamo nga mga impormasyon tuhoy sa mga tawo, mga duog, kag mga kinaiya nga ginsambit sa Biblia. Ang mga tsart nagapatalupangod sang katumanan sang mga tagna sa Biblia, nagapakita kon sin-o nga mga hari kag mga manalagna ang magkadungan, kag nagahatag sing ginbulubanta nga mga petsa para sa madamo nga mga hitabo sa Biblia.

Samtang ginapamalandungan mo ang imo natun-an, mahangpan mo ang mga rason kon ngaa ang pila ka kahimtangan natabo sa katawhan sang Dios. Mahibaluan mo man kon ngaa nakig-angot si Jehova sa iya katawhan subong sang ginhimo niya. Mahangpan mo kon paano ginatamod ni Jehova ang mga ginahimo sang mga panguluhan, mga tawo, kag mga indibiduwal. Magahatag ini sa imo sing daku nga paghantop sa iya panghunahuna.

Mangin makawiwili sa imo ang maragtas sa Biblia kon ginapanan-aw mo ang mga duog diin natabo ang mga hitabo. Ang mga mapa sang mga duog sa Biblia nagapakita sang mga dalan kag mga distansia man sa ulot sang mga duog. Halimbawa, diin mahimo nagtabok ang mga Israelinhon sa Dagat nga Mapula? Daw ano kalapad ang Ginsaad nga Duta? Daw ano kalayo ang ginlakat ni Jesus sa iya dutan-on nga pagministeryo? Ano nga mga talan-awon ang nakita ni Pablo sa iya mga paglakbay subong misyonero? Ang mga mapa kag geograpiko nga mga paglaragway sa duog nagapakita sang mga detalye agod mangin buhi ang imo pagbasa. Diin mo masapwan ang mga mapa sang mga duog sa Biblia? Ang iban makita sa New World Translation of the Holy Scriptures. Ang mga tomo sang Insight may mga 70 ka mapa, kag may indese sang mapa sa katapusan nga bahin sang nahauna nga tomo. Gamita ang Watch Tower Publications Index agod makita ang iban pa nga mapa. Kon ini nga mga reperensia indi matigayon, gamita ang mga mapa nga ginabalhag sa Ang Lalantawan agod buligan ka sa imo pagbasa sing Biblia.

Sa Hebreo nga Kasulatan, gindayaw ni Hari David si Jehova, nga nagasiling: “Daw ano ka bilidhon sang imo mga panghunahuna! O Dios, daw ano kadaku sang bug-os nga kadamuon nila!” (Sal. 139:17) Sa Cristianong Griegong Kasulatan, gindayaw ni apostol Pablo si Jehova bangod “nagsilak Sia sa aton tagipusuon sa paghatag sing kapawa sa sini sang mahimayaon nga ihibalo sa Dios paagi sa nawong ni Cristo.” (2 Cor. 4:6) Bisan pa mga siglo ang antad sang pagkabuhi nanday David kag Pablo; pareho sila nga nalipay sa Pulong sang Dios. Malipay man ikaw kon maghinguyang ka sing tion nga basahon ang tanan nga ginhatag ni Jehova sa imo sa mga pahina sang iya inspirado nga Pulong.