PAMANGKOT SANG MGA PAMATAN-ON
Ano ang Dapat Ko Himuon Pagkatapos Ako Mabawtismuhan?—Bahin 1: Padayon nga Himua ang Imo Cristianong mga Hilikuton
Kinahanglan naton atipanon ang aton malahalon nga mga pagkabutang, pareho sang balay ukon salakyan. Amo man ang dapat mo himuon sa imo pagpakig-abyan sa Dios. Ano ang himuon mo para padayon nga mangin malig-on ina nga pag-abyanay pagkatapos sang imo bawtismo?
Sa sini nga artikulo
Padayon nga tun-i ang Pulong sang Dios
Teksto nga makabulig sa imo: “Padayon kamo nga nagapamunga sa tagsa ka maayong buhat kag nagalambo sa sibu nga ihibalo tuhoy sa Dios.”—Colosas 1:10.
Ang buot silingon: Pagkatapos sang imo bawtismo, kinahanglan padayon mo nga basahon ang Biblia kag pamalandungan ang imo natun-an.—Salmo 25:4; 119:97.
Ang mapaabot mo: Kon kaisa, daw wala ka gana magtuon. Basi magpensar ka pa gani nga indi ka mahilig magtuon.
Ang puede mo himuon: Tun-i pa gid ang mga topiko sa Biblia nga nanamian mo. Maghimo sang imo personal nga programa sa pagtuon, nga mahapos mo himuon. Ang imo goal amo nga magbakod pa gid ang imo gugma kay Jehova kag sa iya Pulong. Dapat nagabenepisyo ka kag naga-enjoy sa imo pagtuon.—Salmo 16:11.
Tip: Para makabenepisyo ka gid sa imo pagtuon, mangita sang malinong nga lugar para indi ka maisturbo.
Dugang pa nga impormasyon
Basaha:
“Paano ang Biblia Makabulig sa Akon?—Bahin 2: Kon Paano Ma-enjoy ang Pagbasa sing Biblia”
Tan-awa:
I-download:
Padayon nga magpangamuyo kay Jehova
Teksto nga makabulig sa imo: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay.”—Filipos 4:6.
Ang buot silingon: Ang komunikasyon sa Dios nagakahulugan nga nagakomunikar sia sa imo kag ikaw nagakomunikar sa iya: Nagapamati ka sa iya kon magbasa ka sang iya Pulong; nagapakighambal ka sa iya kon nagapangamuyo ka. Ang imo mga pangamuyo mahimo maglakip sang mga pangabay para sa imo mga kinahanglanon kag sa pagpasalamat sa mga pagpakamaayo nga imo nabaton.
Ang mapaabot mo: Kon kaisa, basi matalupangdan mo nga daw balikbalik lang ang imo mga pangamuyo. Mahimo magduhaduha ka pa gani kon nagapamati gid si Jehova sa imo ukon kon bala gusto niya mamati sa imo.—Salmo 10:1.
Ang puede mo himuon: Sa bilog nga adlaw, pensara ang mga butang nga puede mo ipangamuyo. Kon indi ka dayon makapangamuyo sing malawig parte sa isa ka butang, tandai ini para makapangamuyo ka parte sa sini pagkagab-i. Indi lang ang parte sa imo kaugalingon ang dapat mo ipangamuyo, kundi ang kinahanglan man sang iban.—Filipos 2:4.
Tip: Kon matalupangdan mo nga daw balikbalik na lang ang imo mga pangamuyo, ipangamuyo man ina kay Jehova. Gusto niya pamatian ang tanan mo nga problema, lakip na ang problema mo parte sa imo pangamuyo.—1 Juan 5:14.
Dugang pa nga impormasyon
Basaha:
I-download:
Padayon nga isugid ang imo pagpati sa iban
Teksto nga makabulig sa imo: “Hatagi sang dalayon nga igtalupangod ang imo kaugalingon kag ang imo panudlo. . . . Kay sa paghimo sini maluwas mo ang imo kaugalingon kag ang mga nagapamati sa imo.”—1 Timoteo 4:16.
Ang buot silingon: Kon ginasugid mo sa iban ang imo ginapatihan, ginapabakod mo man ang imo pagtuo. Gani, mahimo maluwas mo ang kabuhi sang mga nagapamati sa imo kag ang imo man kabuhi.
Ang mapaabot mo: Kon kaisa, daw wala ka gana nga isugid sa iban ang imo mga ginapatihan. Basi nahadlok ka nga himuon ini, ilabi na sa inyo eskwelahan.
Ang puede mo himuon: Indi magpakontrol sa negatibo nga mga balatyagon, pareho sang kahadlok. Si apostol Pablo nagsulat: “Bisan pa kon [ginabantala ko ang maayong balita] batok sa akon kabubut-on, sa gihapon hilikuton ini nga gintugyan sa akon.”—1 Corinto 9:16, 17.
Tip: Maglisensia sa imo mga ginikanan kag mangita sang isa ka Saksi nga maayo nga halimbawa sa ministeryo para magbulig sa imo.—Hulubaton 27:17.
Dugang pa nga impormasyon
Padayon nga magtambong sa Cristianong mga miting
Teksto nga makabulig sa imo: “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon.”—Hebreo 10:24, 25.
Ang buot silingon: Ang panguna nga rason nga nagatambong kita sa mga miting amo ang pagsimba kay Jehova. Pero may duha pa ka benepisyo kon magtambong kita sa miting. Una, mapalig-on ka sang imo mga kauturan. Ikaduha, mapalig-on mo man sila kon magtambong ka kag magpakigbahin.—Roma 1:11, 12.
Ang mapaabot mo: Kon kaisa, basi nagalagaw ang imo hunahuna, amo nga indi ka makatuon sa importante nga mga panudlo sa miting. Ukon magpensar ka nga OK lang bisan talagsa ka na lang magtambong ukon pasugtan mo nga masablagan ka sang iban nga hilikuton, pareho sang mga asaynment sa eskwelahan.
Ang puede mo himuon: Magdesisyon nga magtambong sa mga miting sing regular kag magpanikasog gid nga magpokus sing maayo para may matun-an ka sa sini, pero indi man pagpabay-i ang imo mga asaynment sa eskwelahan. Magpakigbahin paagi sa pagkomento. Pagkatapos sang miting, tinguhai nga makahatag ka sing komendasyon sa isa nga nagpakigbahin sa miting.
Tip: Maghanda antes magkadto sa miting. I-download ang JW Library® nga app, kag gamita ang tab nga “Meetings” para makita mo kon ano ang binagbinagon kada miting.
Dugang pa nga impormasyon