Gin-aman ni Jehova ang “Gawad Kabaylo sang Madamo”

1, 2. Ano ang ginasugid sang Biblia parte sa sitwasyon sang mga tawo, kag ano lang ang solusyon?

“ANG tanan nga tinuga padayon nga nagaugayong sing tingob kag ginasakitan.” (Roma 8:22) Amo sini ang ginsiling ni apostol Pablo parte sa aton makaluluoy nga sitwasyon. Kon para sa tawo, daw wala na sing solusyon ang pag-antos, sala, kag kamatayon. Pero si Jehova wala sing limitasyon pareho sang tawo. (Numeros 23:19) Sia ang Dios sang katarungan gani naghatag sia sing solusyon sa aton masubo nga sitwasyon. Ginatawag ini nga gawad.

² Ang gawad amo ang pinakadaku nga regalo ni Jehova sa mga tawo. Bangod sa gawad, posible nga mahilway kita sa sala kag kamatayon. (Efeso 1:7) Amo man ini ang rason kon ngaa may paglaum nga mabuhi sing wala katapusan sa langit man ukon sa isa ka paraiso nga duta. (Lucas 23:43; Juan 3:16; 1 Pedro 1:4) Pero ano gid ang gawad? Kag ano ang ginatudlo sini sa aton parte sa indi matupungan nga katarungan ni Jehova?

Kon Ngaa Kinahanglan ang Gawad

3. (a) Ngaa kinahanglan ang gawad? (b) Ngaa indi puede nga pamag-anon na lang sang Dios ang sentensia nga kamatayon sa mga anak ni Adan?

³ Kinahanglan ang gawad bangod sang sala ni Adan. Bangod wala gintuman ni Adan ang Dios, ginpapanubli niya sa iya mga anak ang balatian, kasubo, kasakit, kag kamatayon. (Genesis 2:17; Roma 8:20) Indi puede nga patawaron na lang sila sang Dios kag pamag-anon ang sentensia nga kamatayon. Kon himuon ini sang Dios ginabalewala niya ang iya sugo: “Ang bayad sa sala amo ang kamatayon.” (Roma 6:23) Kag kon ginbalewala ni Jehova ang iya kaugalingon nga mga kasuguan, sigurado nga magalapnag ang kinagamo kag pagkamalinapason sa bilog nga uniberso!

4, 5. (a) Paano ginpasipalahan ni Satanas ang Dios, kag ngaa nagdesisyon si Jehova nga sabton ining mga kabutigan? (b) Ano ang akusasyon ni Satanas sa matutom nga mga alagad ni Jehova?

⁴ Nabinagbinag naton sa Kapitulo 12, nga bangod sa pagrebelde sa Eden may mas daku nga mga isyu. Ginhigkuan ni Satanas ang maayo nga ngalan sang Dios. Daw pareho lang nga gin-akusahan niya si Jehova nga isa ka butigon kag mapintas nga diktador nga nagdingot sa iya mga tinuga sing kahilwayan. (Genesis 3:1-5) Ginpagua ni Satanas nga indi matuman sang Dios ang iya katuyuan nga pun-on ang duta sing matarong nga mga tawo kay nasulay si Adan kag si Eva nga magsupak sa Dios. (Genesis 1:28; Isaias 55:10, 11) Kon ginpabay-an ni Jehova nga indi masabat ining mga akusasyon, mahimo nga madamo sa iya intelihente nga mga tinuga ang madulaan sing pagsalig sa iya paggahom.

⁵ Ginpasipalahan man ni Satanas ang matutom nga mga alagad ni Jehova. Nagsiling si Satanas nga nagaalagad lang sila kay Jehova bangod ginahatagan niya sila sang maayo nga mga butang. Pero kon tilawan sila, wala sing isa nga magpabilin nga matutom sa Dios. (Job 1:9-11) Mas importante nga pamatud-an nga sala ang mga akusasyon ni Satanas sangsa luwason ang mga tawo sa mabudlay nga sitwasyon. Gani, insakto lang nga nagdesisyon si Jehova nga sabton ang mga kabutigan ni Satanas. Pero ano ang himuon sang Dios para mahusay ini nga mga isyu kag para maluwas man ang mga tawo?

Gawad—Ang Katumbas

6. Ano ang pila ka ekspresyon nga gingamit sa Biblia bilang pagtawag sa paagi sang Dios sa pagluwas sa mga tawo?

⁶ Ang solusyon ni Jehova maluluy-on gid kag matarong, nga indi gid mahunahuna sang bisan sin-o nga tawo. Simple ini pero dalayawon gid. Ginatawag ini bilang pagbakal, pagpasag-uli, pagtumbas, kag pagpatawad. (Salmo 49:8, footnote; Daniel 9:24; Galacia 3:13; Colosas 1:20; Hebreo 2:17) Pero ang nagakaigo gid nga ekspresyon para sa sini amo ang gingamit ni Jesus mismo. Sia nagsiling: “Ang Anak sang tawo wala nagkari agod alagdon, kundi agod mag-alagad kag ihatag ang iya kabuhi nga gawad [Griego, lyʹtron] kabaylo sang madamo.”—Mateo 20:28.

7, 8. (a) Ano ang kahulugan sang termino nga “gawad” sa Kasulatan? (b) Sa ano nga paagi ang isa ka gawad nagakahulugan man sing katumbas?

⁷ Ano ang gawad? Ang Griego nga termino nga gingamit diri naghalin sa isa ka tinaga nga nagakahulugan sing “buy-an, hilwayon.” Ini nga termino amo ang tawag sa kuarta nga ginabayad kabaylo sang kahilwayan sang mga napriso sa inaway. Kon amo, ang gawad nagakahulugan sang ginbayad para magawad ukon mabawi ang isa ka butang. Sa Hebreong Kasulatan, ang termino para sa “gawad” (koʹpher) naghalin sa isa ka tinaga nga nagakahulugan sing “pagtabon.” Halimbawa, ginsugo sang Dios si Noe nga iya “kulapan” (isa pa ka porma sang tinaga nga pagtabon) ang arka sing alkitran. (Genesis 6:14) Nagabulig ini sa aton nga maintiendihan nga ang paggawad nagakahulugan man sing pagtabon sa mga sala.—Salmo 65:3.

⁸ Talalupangdon nga ang Theological Dictionary of the New Testament nagasiling nga ini nga termino (koʹpher) “pirme nagakahulugan sing katumbas,” ukon kapareho. Para magawad ukon matabunan ang sala, dapat may bili nga ibayad nga nagatumbas sing bug-os, ukon nagatabon sing bug-os, sa halit nga resulta sang sala. Gani, ang Kasuguan sang Dios sa Israel nagsiling: “Kabuhi sa kabuhi, mata sa mata, ngipon sa ngipon, kamot sa kamot, tiil sa tiil.”—Deuteronomio 19:21.

9. Ngaa naghalad ang matutom nga mga tawo sing mga sapat, kag ano ang ginabatyag ni Jehova sa sini nga mga halad?

⁹ Ang matutom nga mga tawo halin kay Abel naghalad sing mga sapat sa Dios. Sa paghimo sini, ginpakita nila nga nahibaluan nila nga makasasala sila kag kinahanglan nila sing gawad. Kag ginpakita man nila ang ila pagtuo sa ginpromisa sang Dios nga kahilwayan paagi sa iya “kaliwat.” (Genesis 3:15; 4:1-4; Levitico 17:11; Hebreo 11:4) Nalipay si Jehova sa sini nga mga halad kag ginkilala ang maayo nga panindugan sining mga sumilimba. Pero, bisan ano pa nga paghalad sing sapat ang ila himuon, isa lang ini ka simbulo. Ang mga sapat indi gid makatabon sa sala sang tawo, kay mas manubo ini sa tawo. (Salmo 8:4-8) Gani, ang Biblia nagasiling: “Ang dugo sang mga toro nga baka kag sang mga kanding indi makakuha sang mga sala.” (Hebreo 10:1-4) Ini nga mga halad simbulo lang ukon nagarepresentar sa matuod nga halad-gawad nga magaabot.

“Katumbas nga Gawad”

10. (a) Sin-o ang dapat matumbasan sang manuggawad, kag ngaa? (b) Ngaa isa lang ka tawo ang kinahanglan ihalad?

¹⁰ “Tungod kay Adan ang tanan nagakapatay,” siling ni apostol Pablo. (1 Corinto 15:22) Gani para may gawad, dapat mapatay ang isa nga insakto nga kapareho ni Adan, isa ka perpekto nga tawo. (Roma 5:14) Wala na sing iban pa nga tinuga ang makabalanse sa timbangan sang katarungan. Ang isa lang ka perpekto nga tawo, nga wala makapanubli sang sala kag kamatayon halin kay Adan, ang makahatag sing “katumbas nga gawad para sa tanan,” nga katumbas gid ni Adan. (1 Timoteo 2:6) Indi kinahanglan nga ihalad ang minilyon ka indibiduwal nga mga tawo para magtumbas sa kada isa sang indi perpekto nga tawo. Si apostol Pablo nagsiling: “Paagi sa isa ka tawo [si Adan] nagsulod ang sala sa kalibutan kag ang kamatayon paagi sa sala.” (Roma 5:12) Kag bangod “sa isa ka tawo may kamatayon,” nag-aman ang Dios sing gawad para sa mga tawo paagi man “sa isa ka tawo.” (1 Corinto 15:21) Paano?

11. (a) Paano ang manuggawad ‘makatilaw sing kamatayon para sa tagsa ka tawo’? (b) Ngaa indi makabenepisyo si Adan kag si Eva sa gawad? (Tan-awa ang footnote.)

¹¹ Naghimo si Jehova sing kahimusan nga ang isa ka perpekto nga tawo kinabubut-on nga maghalad sang iya kabuhi. Base sa Roma 6:23, “ang bayad sa sala amo ang kamatayon.” Sa paghalad sang iya kabuhi, ang manuggawad ‘makatilaw sing kamatayon para sa tagsa ka tawo.’ Kon sa aton pa, sia ang magabayad sa sala ni Adan. (Hebreo 2:9; 2 Corinto 5:21; 1 Pedro 2:24) Daku ang mangin epekto sini base sa kasuguan. Paagi sa pagpanas sa sentensia nga kamatayon sa matinumanon nga mga anak ni Adan, dulaon sang gawad ang gahom sang sala.a—Roma 5:16.

12. Iilustrar kon paano ang pagbayad sa isa ka utang makahatag sing benepisyo sa madamo nga tawo.

¹² Sa pag-ilustrar: Imadyina nga nagaistar ka sa isa ka banwa diin kalabanan sang mga pumuluyo nagaobra sa isa ka daku nga pabrika. Ikaw kag ang imo mga kaingod may daku nga sueldo kag masulhay nga pangabuhi. Pero isa ka adlaw nagsira ang pabrika. Ngaa? Kay ginkawatan sang manedyer ang pabrika, gani naputo ang negosyo. Bangod gulpi lang nga nadulaan kamo sing trabaho, ikaw kag ang imo mga kaingod indi na makabayad sang mga balayran. Ang mga asawa, bana, kabataan, kag ang mga nagpautang sa kompanya nag-antos bangod sa ginhimo sang isa ka tawo. May solusyon bala sa sini? Huo! Nagdesisyon ang isa ka manggaranon nga magbulig. Nahibaluan niya ang balor sang negosyo sa pabrika. Naluoy man sia sa madamo nga empleyado sini kag sa ila mga pamilya. Gani naghimo sia sing kahimusan nga bayaran ang utang sang kompanya kag buksan liwat ang pabrika. Ang pagbayad sini nga utang nagpaumpaw sa madamo nga empleyado kag sa ila mga pamilya kag sa mga nagpautang. Pareho sa sini, ang pagpanas sa utang ni Adan nagahatag sing benepisyo sa minilyon ka tawo.

Sin-o ang Nag-aman sang Gawad?

13, 14. (a) Paano gin-aman ni Jehova ang gawad para sa mga tawo? (b) Kay sin-o ginbayad ang gawad, kag ngaa kinahanglanon ini nga pagbayad?

¹³ Si Jehova lang ang makaaman sing “Kordero . . . nga nagakuha sang sala sang kalibutan.” (Juan 1:29) Pero wala ginpadala sang Dios ang bisan sin-o lang nga anghel sa pagluwas sa mga tawo. Kundi, ginpadala niya ang Isa nga makahatag sing pinakamaayo nga sabat sa akusasyon ni Satanas sa mga alagad ni Jehova. Huo, ginhimo ni Jehova ang pinakadaku nga sakripisyo nga ipadala ang iya bugtong nga Anak, “ang iya kalipay.” (Hulubaton 8:30) Ang Anak sang Dios ‘nagbiya sang tanan,’ ukon kinabubut-on nga nagbiya sang iya kabuhi sa langit. (Filipos 2:7) Paagi sa isa ka milagro ginsaylo ni Jehova ang kabuhi sang iya panganay nga Anak halin sa langit pakadto sa taguangkan sang isa ka Judiyo nga birhen nga si Maria. (Lucas 1:27, 35) Bilang isa ka tawo, pagatawgon sia nga si Jesus. Pero nagakadapat lang nga tawgon man sia nga ikaduha nga Adan, kay katumbas gid sia ni Adan. (1 Corinto 15:45, 47) Gani, mahalad ni Jesus ang iya kaugalingon bilang isa ka gawad para sa makasasala nga mga tawo.

¹⁴ Kay sin-o ibayad ini nga gawad? Ang Salmo 49:7 maathag nga nagasiling nga ang gawad ibayad “sa Dios.” Pero indi bala nga si Jehova man ang naghimo sang kahimusan para sa gawad? Huo, pero ang gawad indi lang isa ka simple kag wala sing pulos nga pagbayranay nga daw pareho sang pagkuha sang kuarta sa isa ka bulsa kag pagsaylo sini sa pihak naman nga bulsa. Dapat mahangpan nga ang gawad, indi lang isa ka pagbayranay sing materyal nga butang, kundi isa ka legal nga transaksion. Paagi sa pag-aman sing bayad para sa gawad, ginpamatud-an ni Jehova nga ginasunod gid niya ang iya perpekto nga talaksan sang katarungan bisan pa tuman ka daku ang bili sini para sa iya.—Genesis 22:7, 8, 11-13; Hebreo 11:17; Santiago 1:17.

15. Ngaa kinahanglan nga mag-antos kag mapatay si Jesus?

¹⁵ Sa una nga mga binulan sang 33 C.E., kinabubut-on nga ginbaton ni Jesucristo ang isa ka mabudlay nga pagtilaw para mabayran niya ang gawad. Nagsugot sia nga dakpon sa sala nga mga akusasyon, hukman nga nakasala, kag ilansang sa usok para mapatay. Kinahanglan gid bala nga mag-antos si Jesus? Huo, bangod dapat mahusay ang isyu parte sa integridad sang mga alagad sang Dios. Talalupangdon nga wala ginpasugtan sang Dios nga mapatay ni Herodes ang lapsag nga si Jesus. (Mateo 2:13-18) Pero sang nagdaku na si Jesus, ginbatas niya ang grabe nga pag-atake ni Satanas bangod maathag kay Jesus kon ano gid ang isyu.b Nagpabilin sia nga “mainunungon, wala sing kalainan, wala sing dagta, indi kaangay sa mga makasasala,” bisan sang malain gid nga ginhimo sa iya. Paagi sa sini, ginpamatud-an ni Jesus nga si Jehova may mga alagad nga matutom gihapon bisan pa may pagtilaw. (Hebreo 7:26) Gani, indi katingalahan, nga antes sia mapatay, nagsinggit si Jesus: “Natuman na!”—Juan 19:30.

Pagtapos sang Iya Hilikuton sa Paggawad

16, 17. (a) Paano ginpadayon ni Jesus ang iya hilikuton sa paggawad? (b) Ngaa kinahanglan ni Jesus ‘mag-atubang sa Dios para sa aton’?

¹⁶ Dapat pa tapuson ni Jesus ang iya hilikuton sa paggawad. Sa ikatlo nga adlaw sa tapos mapatay si Jesus, ginbanhaw sia ni Jehova. (Binuhatan 3:15; 10:40) Paagi sa sining importante gid nga buhat, ginpadyaan ni Jehova ang iya Anak bangod sang iya matutom nga pag-alagad. Ginhatagan man Niya sia sing kahigayunan nga tapuson ang iya hilikuton sa paggawad bilang Mataas nga Saserdote sang Dios. (Roma 1:4; 1 Corinto 15:3-8) Si apostol Pablo nagpaathag: “Sang nag-abot ang Cristo bilang mataas nga saserdote . . . , nagsulod sia sa balaan nga lugar sing makaisa gid lang, apang indi dugo sang mga kanding kag sang mga torite nga baka ang iya dala, kundi ang iya kaugalingon nga dugo, kag nagtigayon sia sang wala sing katapusan nga pagtubos para sa aton. Kay ang Cristo wala magsulod sa balaan nga lugar nga ginhimo sang mga kamot sang tawo, nga amo ang larawan sang katunayan, kundi sa langit mismo, agod mag-atubang karon sa Dios para sa aton.”—Hebreo 9:11, 12, 24.

¹⁷ Indi madala sang Cristo ang iya literal nga dugo sa langit. (1 Corinto 15:50) Kundi, gindala niya ang ginsimbulo sini nga dugo: ang balor sang iya ginhalad nga perpekto nga kabuhi bilang tawo. Dayon, sa atubang sang Dios, pormal nga ginpresentar niya ang balor sini nga kabuhi bilang gawad kabaylo sang makasasala nga mga tawo. Ginbaton bala ni Jehova ini nga halad? Huo, kag nangin maathag ini sang Pentecostes 33 C.E., sang ginbubo ang balaan nga espiritu sa mga 120 ka disipulo sa Jerusalem. (Binuhatan 2:1-4) Bisan pa makakulunyag ato nga hitabo, nagasugod pa lang sadto ang gawad sa paghatag sing dalayawon nga mga benepisyo.

Mga Benepisyo sang Gawad

18, 19. (a) Ano ang duha ka grupo nga nagabenepisyo sa pagpasag-uli nga nangin posible bangod sang dugo sang Cristo? (b) Para sa “daku nga kadam-an,” ano ang pila sang mga benepisyo sang gawad subong kag sa palaabuton?

¹⁸ Sa iya sulat para sa mga taga-Colosas, ginpaathag ni Pablo nga paagi sa halad-gawad sang Cristo, nalipay ang Dios nga posible na liwat para sa mga tawo nga mangin mga abyan Niya. Ginpaathag man ni Pablo nga ini nga pagpasag-uli nagadalahig sang duha ka grupo, nga amo “ang mga butang sa langit” kag “ang mga butang sa duta.” (Colosas 1:19, 20; Efeso 1:10) Ang una nga grupo amo ang 144,000 ka Cristiano nga ginhatagan sing paglaum nga mag-alagad bilang mga saserdote sa langit kag maggahom bilang mga hari kaupod ni Cristo Jesus sa bilog nga duta. (Bugna 5:9, 10; 7:4; 14:1-3) Paagi sa ila, ang matinumanon nga mga tawo amat-amat nga makabenepisyo sa gawad sa sulod sang isa ka libo ka tuig.—1 Corinto 15:24-26; Bugna 20:6; 21:3, 4.

¹⁹ “Ang mga butang sa duta” amo ang mga indibiduwal nga may paglaum nga makabaton sang perpekto nga kabuhi sa Paraiso sa duta. Ginalaragway sila sang Bugna 7:9-17 nga “daku nga kadam-an” nga makalampuwas sa nagapakari nga “dakung kapipit-an.” Pero indi na kinahanglan nga maghulat pa sila sa sina nga tion para maagom ang mga benepisyo sang gawad. “Ginlabhan [na] nila ang ila malaba nga panapton kag ginpaputi ini sa dugo sang Kordero.” Bangod nagatuo sila sa gawad, nagabaton na sila sing espirituwal nga mga benepisyo sa sinang mahigugmaon nga aman, bisan subong pa lang. Ginpahayag sila nga matarong bilang mga abyan sang Dios! (Santiago 2:23) Bilang resulta sang halad ni Jesus, ‘makapalapit sila sa trono sang wala tupong nga kaayo nga may kahilwayan sa paghambal.’ (Hebreo 4:14-16) Kon makasala sila, puede sila patawaron sang Dios. (Efeso 1:7) Bisan pa indi sila perpekto, matinlo ang ila konsiensia. (Hebreo 9:9; 10:22; 1 Pedro 3:21) Buot silingon, ang pagpasag-uli sa Dios, indi sa palaabuton pa, kundi nagakatabo na subong! (2 Corinto 5:19, 20) Sa sulod sang Isa ka Libo ka Tuig nga Paggahom, amat-amat sila nga ‘hilwayon sa pagkaulipon sa lawas nga nagakadunot’ kag sa ulihi “mabaton nila ang mahimayaon nga kahilwayan sang mga anak sang Dios.”—Roma 8:21.

20. Ano ang ginabatyag mo kon pamalandungan mo ang parte sa gawad?

²⁰ “Nagapasalamat [kita] sa Dios paagi kay Jesucristo” bangod sa gawad! (Roma 7:25) Simple lang ini, pero may madalom nga kahulugan kag dalayawon gid. (Roma 11:33) Kon pamalandungan naton ang parte sa gawad, nalipay kita kag nagasuod pa gid kita sa Dios sang katarungan. Pareho sang salmista, may rason gid kita nga dayawon si Jehova bilang Dios nga ‘nagahigugma sa pagkamatarong kag katarungan.’—Salmo 33:5.