Mga Pamangkot Gikan sa mga Bumalasa

Pagkatapos mabata ni Maria si Jesus sa Betlehem, ngaa nagtener si Jose kag si Maria sa Betlehem imbes nga magbalik sa ila lugar sa Nazaret?

Wala ini direkta nga ginasabat sang Biblia. Pero may mabasa kita sa Biblia nga pila ka detalye nga posible nakaimpluwensia sa ila desisyon.

Ginsilingan sang isa ka anghel si Maria nga magabusong sia kag magabata. Sa sini nga tion, nagaistar si Maria kag si Jose sa Nazaret nga isa ka siudad sa Galilea. (Luc. 1:26-31; 2:4) Sang ulihi, paghalin nila sa Egipto, nagbalik sila sa Nazaret. Didto nagdaku si Jesus kag nangin isa sia ka Nazaretnon. (Mat. 2:19-23) Gani kon ginasambit si Jesus, si Jose, kag si Maria, mahunahuna naton ang Nazaret.

May paryente si Maria nga si Elisabet nga nagaistar sa Juda. Asawa sang saserdote nga si Zacarias si Elisabet kag nangin iloy sia ni Juan nga Manugbawtismo. (Luc. 1:5, 9, 13, 36) Ginkadtuan ni Maria si Elisabet sa Juda kag nagtener sia didto sing tatlo ka bulan. Dayon nagbalik si Maria sa Nazaret. (Luc. 1:39, 40, 56) Gani pamilyar si Maria sa lugar sang Juda.

Sang ulihi, gintuman ni Jose ang sugo sang mga Romano nga dapat “magparehistro” ang tanan nga tawo sa “lugar nga ila natawhan.” Gani halin sa Nazaret, nagkadto si Jose sa Betlehem nga ginatawag “siudad ni David.” Suno sa tagna, sa Betlehem matawo ang Mesias. (Luc. 2:3, 4; 1 Sam. 17:15; 20:6; Miq. 5:2) Pagkatapos mabata ni Maria si Jesus sa Betlehem, kabalo si Jose nga mabudlayan si Maria sa malawig nga paglakbay pabalik sa Nazaret nga may ginakugos nga bag-ong bun-ag nga bata. Gani nag-istar sila sa Betlehem, nga mga siam ka kilometro halin sa Jerusalem. Bangod sini, nangin mahapos para sa ila nga dalhon ang ila bata sa templo kag tumanon ang ginasiling sang Kasuguan nga dapat sila maghalad.—Lev. 12:2, 6-8; Luc. 2:22-24.

Ginhambalan man sang anghel sang Dios si Maria nga ihatag sa iya anak “ang trono ni David” kag “magahari” sia. Posible nga nahunahuna ni Jose kag ni Maria nga may buot silingon gid nga natawo si Jesus sa siudad ni David. (Luc. 1:32, 33; 2:11, 17) Posible nga nahunahuna nila nga mas maayo kon magtener anay sila sa Betlehem asta nga mabal-an nila kon ano ang gusto sang Dios nga himuon nila.

Wala kita kabalo kon daw ano na sila kadugay nagaistar sa Betlehem sang ginkadtuan sila sang mga astrologo. Pero sadto nga tion, nagaistar na sila sa isa ka balay, kag indi na lapsag si Jesus kundi isa na ka “bata.” (Mat. 2:11) Ginapakita sini nga medyo madugay na sila nga nagaistar sa Betlehem.

Nagsugo si Herodes nga pamatyon “ang tanan nga bata nga lalaki sa Betlehem . . . halin sa duha ka tuig ang edad paubos.” (Mat. 2:16) Ginpaandaman si Jose sang isa ka anghel parte sa sini nga sugo, gani nagpalagyo si Jose, si Maria, kag si Jesus sa Egipto. Didto sila nag-istar asta nga napatay si Herodes. Sang ulihi, gindala ni Jose ang iya pamilya sa Nazaret. Ngaa wala sila nagbalik sa Betlehem? Bangod sadto nga tion, ang anak ni Herodes nga si Arquelao amo ang nagagahom sa Judea kag isa sia ka mapintas nga tawo. Ginpaandaman man si Jose sang isa ka anghel nga delikado kon magbalik sila sa Betlehem. Sa Nazaret, matudluan ni Jose si Jesus nga magsimba kay Jehova bangod malayo sila sa peligro.—Mat. 2:19-22; 13:55; Luc. 2:39, 52.

Una nga napatay si Jose sangsa kay Jesus. Pero bangod ang kamatayon ni Jesus amo ang nagpaposible para makapalangit ang iban, wala nagpalangit si Jose kundi banhawon sia diri sa duta. Madamo nga tawo ang may kahigayunan nga maistorya sia sa ulihi, kag masugiran niya sila kon ngaa nagtener sila ni Maria sa Betlehem pagkatapos mabata si Jesus.