Xav Txog Luag

Vim Li Cas Tibneeg Xaiv Ntsej Muag?

Yog peb pheej xav hais tias ua cas lwm tus coj txawv ua luaj, ces peb yuav hais tias qhov lawv txawv ntawd yog ib yam tsis zoo. Twb yog peb tabtom xaiv ntsej xaiv muag lawm ntag. Thaum peb yog ib tug neeg xaiv ntsej muag ces yuav tsis yooj yim rau peb xav txog luag.

Vajlugkub Tej Hauv Paus Ntsiab Lus

“Thaum muaj neeg zoo siab, nej cia li nrog lawv zoo siab; thaum muaj neeg quaj ntsuag, nej cia li nrog lawv quaj ntsuag.”—LOOS 12:15.

Nqi no qhia tias peb yuav tsum xav txog luag lwm tus. Xav txog luag lwm tus yog muab koj tus kheej tso rau luag qhov chaw seb tus ntawd xav li cas.

Xav Txog Luag Pab Peb Li Cas?

Yog xav txog luag ces peb yuav pom tau tias peb yeej zoo sib thooj ib yam. Xws li, nws thiab peb tej kev xav zoo thiab coj ib yam. Tsis tas li ntawd, qhov uas peb xav txog luag lwm tus pab tau peb pom tias sawvdaws yeej yog ib tse tibneeg, ces thaum ntawd thiaj li yuav pab tau peb xav qhov zoo.

Xav txog luag yuav pab peb saib taus lwm tus. As Malis (Anne-Marie) nyob rau Afika sab hnub poob, saib tsis taus cov tibneeg txom nyem. Nws qhia tias qhov pab tau nws yog xav txog luag. Nws hais tias: “Thaum kuv pom cov tibneeg txom nyem raug kev nyuaj siab, kuv rov nug kuv tus kheej tias ua li kuv ne, yog kuv lub neej zoo li ntawd kuv yuav ua li cas. Ua li no, kuv mam pom tias lawv thiab kuv yeej zoo sib xws thiab kuv zoo tsis tshaj lawv.” Yog li ntawd, thaum peb xav txog tej yam teeb meem lwm tus raug, peb yuav tsis kam thuam lawv.

Koj Ua Tau Li No

Yog koj pheej xav tsis zoo txog ib pawg neeg twg ces xav seb nej zoo sib thooj li cas. Ua tib zoo xav seb zoo li cas thaum lawv

Xav txog luag pab tau peb pom tias sawvdaws yeej yog ib tse tibneeg

noj mov nrog lawv tsev neeg
ua haujlwm ib hnub
nrog tej phoojywg ua ke
mloog tej nkauj lawv nyiam

Muab koj tso rau lawv qhov chaw. Ces xav li no:

‘Thaum ib tug ua saib tsis taus kuv ces kuv yuav ua li cas?’
‘Thaum ib tug uas twb tsis paub kuv li txiav tsim tsis zoo rau kuv ne, kuv yuav ua li cas?’
‘Yog kuv ho yog lawv pab lawv pawg, kuv ho xav kom lwm tus saib taus kuv li cas?’

Ib tug txivneej tawv dawb thiab tus txivneej tawv dub tso duab saib tias nkawd nyias yeej muaj nyias ib tse neeg, muaj haujlwm, nyiam ntaus thiab ncaws pob.

Ib Tug Piav Txog Nws Lub Neej: Lanpawm (Robert) (Tebchaws Singapore)

“Yav tas los lawd, kuv xav tias cov tibneeg tsis hnov lus tsis paub dabtsi, ruam, thiab siab luv heev. Kuv tsis nyiam mus nyob ze lawv li. Txawm li ntawd los, kuv twb tsis ras hais tias kuv xaiv ntsej xaiv muag.

“Thaum xav txog cov tsis hnov lus, pab tau kom kuv tsis txhob ua neeg xaiv ntsej xaiv muag. Yav thaud, kuv xav hais tias cov tsis hnov lus ua tsis tau ib yam dabtsi li. Thaum kuv nrog lawv tham los lawv tsuas ntsia ntsia kuv xwb. Kuv thiaj xav zoj tias yog kuv tsis hnov ib tug hais lus, los kuv kuj yuav cia li ua qhov muag ntsais duj doom rau nws thiab xwb. Txawm kuv muaj lub mloog ntawm pob ntseg los kuv lub ntsej muag twb qhia tias kuv tsis totaub vim kuv tsis hnov lus.

“Thaum kuv muab kuv tus kheej tso rau tus tsis hnov lus qhov chaw, kuv txojkev xav uas xaiv ntsej xaiv muag cia li yaj ntshis mus lawm.”