Raug Xwm Txheej Phem

Ib tug yawg hu ua Anru (Andrew) nyob tebchaws Xi-ala Li-oo (Sierra Leone) hais tias: “Thaum peb raug dej nyab thiab toj pob kuav peb tej cuab txhiaj cuab tam puam tsuaj tag mas txaus ntshai kawg li tsis pom qab ua li cas.”

Ib tug yawg hu ua Davi nyob koog Povtxwv Vaw Ntsees (Virgin Islands) hais tias: “Tom qab khaub zeeg cua tu, peb rov los txog tsev tsis tshuav ib yam dabtsi li lawm. Peb yoob tag, kuv tus ntxhais txhos caug ntua tsa suab hlo quaj.”

YOG tias koj twb ntsib tej xwm txheej zoo li no lawm ces koj yeej paub tias cov uas raug tej xwm no ntxhov siab npaum li cas. Tej zaum ua rau lawv ceeb tag, feeb tsis meej, tej txhia tsis kam lees tias lawv twb raug xwm txheej li ntawd lawm. Lawv ua npau suav ntshai rwg pw tsis tsaug zog, lub zog ntaug tas, tsis muaj siab ua dabtsi li lawm.

Yog koj raug xwm txheej huab cua phem ua rau tej cuab txhiaj cuab tam puam tsuaj tag, tej zaum koj kuj saib zoo li lub neej tsis muaj qab hau li lawm thiab. Tiamsis phau Vajlugkub qhia meej tias yeej tsim nyog ua neej nyob mus ntxiv thiab koj tseem muaj vam rau yav tom hauv ntej.

PHAU VAJLUGKUB PAB PEB MUAJ KEV VAM

Laj Lim Tswvyim 7:8 hais tias: “Qhov uas xaus zoo dua li qhov uas pib.” Tom qab tej xwm txheej dhau lawd, tej zaum koj yuav tsis xav tab lub neej dua lawm. Tiamsis yog koj ua siab ntev es mam khwv ces lub neej yuav zoo rov tuaj.

Tsis tas li ntawd xwb, thaum raug xwm txheej huab cua phem ua rau ib txhia txom nyem nyuaj siab ntev niaj ntau xyoo. Tiamsis yav tom hauv ntej yuav tsis muaj xwm txheej phem lawm, Vajtswv cog lus tias: “Tej uas muaj nyob yav thaum ub los yuav tsis nco thiab tsis xav txog dua li lawm.” (Yaxaya 65:17) Yuav “tsis hnov lub suab quaj thiab lub suab quaj txom nyem nyuaj siab . . . dua li lawm.” (Yaxaya 65:19) Thaum ntawd Vajtswv lub Nceeg Vaj yuav muab lub ntiajteb kho ua lub Vaj Kaj Siab.—Ntawv Nkauj 37:11, 29.

Koj puas zoo siab tias tus Tswv Tsim pub peb “muaj siab vam” rau yam tom hauv ntej? (Yelemi 29:11) Thaum nws lub Nceeg Vaj kav, peb yuav nyob tso siab plhuav tsis ntshai ib yam dabtsi li lawm. Yeej tsim nyog ua neej nyob ntxiv mus, puas yog? Hauv thawj zaj peb kawm txog Cib, nws hais tias: “Thaum peb xav txog txhua yam zoo uas Vajtswv lub Nceeg Vaj yuav ua rau peb, ces yuav pab peb ua taus ib siab uv mus txog thaum kawg.”

Zoo rau koj kawm seb Vajtswv lub Nceeg Vaj yuav pab noob neej li cas ntxiv. Yog koj kawm ntxiv koj yuav ruaj siab tias txawm yuav raug tej xwm txheej li cas los yeej tsim nyog ua neej nyob mus ntxiv. Cia li ua siab ntev tos lub neej yav tom hauv ntej. Zoo rau peb kawm tej tswvyim hauv phau Vajlugkub uas yuav pab peb thev taus tej kev nyuaj siab mus txog thaum kawg. Cia peb kawm seb phau Vajlugkub pab tau ib txhia li cas.

Tej Nqe Vajlugkub Uas Pab Tswvyim

Pw kom pov khawv.

“Ib taus tes kev siab tus tseem zoo dua ob taus tes puv nkaus tej haujlwm uas siv siav siv zog ua thiab haus cua.”—Laj Lim Tswvyim 4:6.

Cov neeg tshawb fawb hais tias tom qab ib tug twg raug xwm txheej phem, “yog nws tsis pw kom pov khawv ces nws yuav ua tsis taus siab ntev thiab nws yimhuab yuav muaj kev ntxhov siab.” Yog li, qhov uas pw kom pov khawv yeej yog ib lub tswvyim zoo heev.

Qhia koj tej kev ntxhov siab rau lwm tus.

“Kev ntxhov siab ua rau neeg poob siab, tiamsis lo lus zoo ua rau nws xyiv fab.”—Paj Lug 12:25.

Qhia koj tej kev nyuaj siab rau ib tug nruab ze lossis ib tug phoojywg zoo. Lawv yuav ua siab ntev mloog koj piav thiab yuav txhawb tau koj lub zog. Tsis tas li ntawd xwb, lawv yuav nqes tes pab lwm yam thiab.a

Vam ntsoov lub neej yav tom hauv ntej.

“Tiamsis raws li Vajtswv tej lus cog tseg peb tos rawv lub ntuj tshiab thiab lub ntiajteb tshiab uas txojkev ncaj ncees nyob hauv.”—2 Petus 3:13.

a Kuj zoo rau ib tug uas nyuaj siab ntev loo lossis nyuaj siab heev dhau lawm mus cuag kws kho mob thiab.