Tus Txij Nkawm Ntxeev Siab

Malias uas nyob tebchaws Xapee hais tias: “Thaum kuv tus txiv qhia rau kuv tias nws yuav tso kuv tseg mus nrog ib tug ntxhais hluas, ua rau kuv xav tuag lawm xwb. Kuv twb ua ib puas tsav yam rau nws, yeej tsis tsim nyog nws ua li ntawd rau kuv.”

Npathau (Berto) uas nyob tebchaws Xapee hais tias: “Thaum kuv pojniam khiav lawm mas cuag li nws dua rhe kuv lub siab mus lawm thiab. Tej kev vam kev cia siab uas wb npaj tseg rau wb lub neej yaj ntshis lawm. Kuv twb ua ib siab lawm tiamsis nyob nyob kuv rov nyuaj siab heev tuaj.”

THAUM ib tug txij nkawm ntxeev siab mas mob siab cuag li rab ntaj chob. Txawm ib txhia zam tau thiab nrhiav kev los kho lub neej los lawv tsis sov siab li qub lawm.a Thaum siab ntsws puas tas li no lawd, dabtsi thiaj nplig tau lawv?

TEJ NQE VAJLUGKUB UAS NPLIG SIAB

Coob tus uas raug lawv tus txij nkawm ntxeev siab mas mob siab tshaj plaws li. Tiamsis lawv cia phau Vajlugkub nplig lawv siab. Lawv thiaj pom tias Vajtswv hlub tshua lawv heev. Vajtswv yeej pom lawv txhua ncos kua muag tibsi.—Malakhi 2:13-16.

“Thaum kuv lub siab muaj kev txhawj xeeb ntau, koj kuj nplij kuv lub siab kom xyiv fab.”—Ntawv Nkauj 94:19.

Npathau hais tias: “Thaum kuv nyeem nqe Vajlugkub no tas mas cuag li Yehauvas pab kuv lub siab nqeg kiag, ib yam li leej txiv nplij nws tus tub.”

“Koj ua ncaj rau tus uas xib rau koj.”—Ntawv Nkauj 18:25.

Khamee (Carmen) tus txiv twb ntxeev siab rau nws ob peb lub hlis lawm. Nws hais tias: “Txawm kuv tus txiv ntxeev siab rau kuv lawm los Yehauvas yeej tsis ntxeev siab rau kuv. Nws yeej tsis ua rau kuv tu siab ib zaug li.”

“Tsis txhob txhawj rau ib yam dabtsi, tiamsis cia li taij thiab thov . . . qhia txhua yam uas koj cheem tsum rau nws paub. Mas Vajtswv txojkev siab tus uas ntau dhau li neeg nkag siab tau yuav tsom kwm nej lub siab.”—Filipi 4:6, 7.

Xasa (Sasha) hais tias: “Kuv muab nqe no nyeem mus nyeem los. Thaum kuv yimhuab thov Vajtswv, nws yimhuab pab kom kuv ua taus ib siab.”

Txhua tus uas hais tas los no puavleej xav tias xyov puas tsim nyog lawv ua neej nyob lawm. Tiamsis lawv tso siab plhuav rau Vajtswv Yehauvas, thiab lawv kawm phau Vajlugkub thiaj nplig tau lawv lub siab. Npatau hais tias: “Thaum kuv lub neej tawg tas, qhov uas pab tau kuv yog kuv txojkev ntseeg xwb, kuv lub neej thiaj muaj qab hau. Thaum ntawd cuag li kuv mus ‘lub hav tsaus ntuj nti’ los Vajtswv nrog nraim kuv.”—Ntawv Nkauj 23:4.

a Yog xav paub seb puas tsim nyog zam txim rau tus txij nkawm uas ntxeev siab, mus saib phau Tsim Dheev! ua lus Askiv hu ua “Thaum Tus Txij Nkawm Ntxeev Siab” (“When a Mate Is Unfaithful”) ntawm cov ntsiab me “Infidelity—Its Tragic Consequences”, “Is Reconciliation Possible?”, thiab “The Option of Divorce” (Lub 4 Hlis tim 22, 1999).

Ua Cas Ib Txhia Thiaj Thev Taus?

Ua tib zoo xav txog cov nqe Vajlugkub.

Npathau hais tias: “Thaum kuv nyeem phau Ntawv Nkauj thiab phau ntawv Yauj, kuv kos txhua nqe uas phim kuv lub neej. Kuv pom tias cov neeg hauv phau Vajlugkub los kuj raug kev nyuaj siab ib yam kuv thiab.”

Mloog tej nkauj nplig siab.

Khamee hais tias: “Thaum kuv pw tsis tsaug zog ces kuv tso nkauj mloog, tej nkauj ntawd nplig tau kuv lub siab lawm ntau.” Daniyee hais tias: “Kuv cia li xyaum ntaus nkauj thiaj pab tau kuv muaj lub siab tus.”

Tham tej kev nyuaj siab rau lwm tus.

Daniyee hais ntxiv tias: “Kuv tsis nyiam qhia kuv tej kev nyuaj siab rau leejtwg li. Tiamsis kuv muaj ib co kwvluag uas kuv ncawg heev. Kuv thiaj nrog lawv tham tim ntsej tim muag thiab sau ntawv mus qhia lawv txhua txhua hnub.” Xasa hais tias: “Twb yog muaj kuv tsev neeg pab, kuv thiaj uv dhau. Thaum kuv xav nrog kuv niam tham mas nws tso plhuav nws tej haujlwm tseg los mloog. Tej thaud zoo li tsis muaj hnub kaj rau kuv li los kuv txiv yog kuv lub chaw tiag siab, nws ua siab ntev txhawb kuv.”

Thov Vajtswv tsis tseg.

Khamee hais tias: “Kuv thov Vajtswv tsis tseg tsis tu. Kuv saib yam li Vajtswv nrog nraim kuv. Nws pom kuv tej kev nyuaj siab thiab pab kuv. Txawm lub caij ntawd kuv nyuaj siab heev los, ua rau kuv yimhuab txav ze Vajtswv.”