Lub Qhov Rooj Qheb Dav Fo
1 Povlauj kub siab tshaj tawm txoj xov zoo heev. Nws mus tshaj tawm rau tej thaj tsam uas tsis tau muaj neeg qhia, xws li lub moos Efexau. Lub moos ntawd muaj neeg coob heev xav kawm Vajtswv Txojlus, Povlauj thiaj sau tias: ‘Ntawm no muaj ib lub qhov rooj qheb dav fo rau kuv ua haujlwm.’ (1Khl. 16:9) Vim li no Povlauj thiaj tau nyob hauv lub moos Efexau, thiab tau pab coob leej los ntseeg Vajtswv.—Ttx. 19:1-20, 26.
2 Niaj hnub no los kuj muaj ib lub qhov rooj qheb dav fo rau peb mus ua haujlwm thiab. Txhua xyoo muaj cov koom txoos uas qhia tsis thoob tej koog uas lawv saib xyuas. Yog peb mus pab lawv, lawv yuav qhia thoob tej koog ntawd thiab. Mus saib 2 Khaulee 8:13-15.
3 Koj Puas Kam Mus Pab Lwm Qhov? Koj puas tau thov Yehauvas tias koj xav mus tshaj tawm txoj xov zoo rau lwm qhov? Tej zaum kuj muaj tej lub koom txoos hauv koj lub zos cheem tsum kev pab. Yog koj pab tau, cia li mus nrog tus kwvtij saib xyuas thaj tsam tham seb nws puas pom zoo. Tej zaum nyob hauv koog uas koj lub koom txoos saib xyuas, kuj muaj cov piav tes lossis lwm haiv neeg uas tsis muaj leejtwg qhia Vajlugkub rau. Koj puas kam kawm lawv hom lus? Thiab tej zaum kuj muaj tej pawg lossis tej lub koom txoos nyob ze koj uas niaj hnub ‘thov kom tus tswv teb txib tub zog’ mus pab lawv. (Mth. 9:37, 38) Ua li, koj puas kam mus pab?
4 Tau ntev niaj ntau xyoo los lawm, muaj ntau yim Khixatia tau tsiv mus tshaj tawm txoj xov zoo nyob rau lwm tebchaws. Muaj ib nkawm niam txiv tau hais tias: ‘Wb xav mus rau thaj chaw uas yuav pab tau coob leej los paub Yehauvas.’ Yog koj xav mus tshaj tawm rau lwm thaj chaw hauv tebchaws no lossis lwm tebchaws, zoo rau koj mus nrog cov txwj laus hauv koj lub koom txoos tham ua ntej tso.
5 Yog koj xav paub seb thaj chaw twg cheem tsum kev pab, hais rau Pab Kwvtij Uas Sawv Cev Cov Txwj Laus paub. Lawv mam li sau ib tsab ntawv nrog koj tsab xa mus rau ceg uas saib xyuas koj lub tebchaws. Txawm li cas los, thaum lub qhov rooj tseem qheb dav fo rau peb, cia peb rau siab ntso ua Yehauvas tes haujlwm.—1Khl. 15:58.