Tsis Txhob Ntshai Qhia Tom Tej Kiab Tej Khw
1. Yog tias peb ntshai qhia rau tom tej kiab tej khw, zoo rau peb xav txog leejtwg?
1 Koj puas nyiam qhia Vajlugkub rau tom tej kiab tej khw? Tej zaum ib txhia ntshai qhia heev. Txawm li ntawd los muab xav rau Povlauj, nws twb muaj siab tawv kawg li los, nws kuj thov kom Vajtswv pub nws muaj lub “siab tuab” qhia txoj xov zoo thiab. (1Thxk. 2:2) Cia peb kawm seb yuav ua li cas peb thiaj tsis ntshai qhia rau tom tej kiab tej khw.
2. Thaum peb mus qhia hauv tej kiab tej khw, puas tab kaum lawv?
2 Puas Tab Kaum Cov Neeg Ua Haujlwm? Ntau zaus thaum peb mus qhia hauv tej kiab tej khw, yuav tsis tab kaum lawv, vim lawv xav tau kev lag kev luam. Lawv thiaj zoo siab tos txais qhua. Yog tias peb hnav ris tsho du lug thiab paub hais lus zoo, lawv yuav saib taus peb.
3. Yuav qhia li cas thiaj tsis tab kaum cov neeg uas tuaj ncig khw?
3 Thaum Tabtom Muaj Neeg Coob Puas Zoo Qhia? Zoo rau peb qhia Vajlugkub rau cov neeg ua haujlwm thaum tsis muaj neeg coob tuaj ncig khw. Tej zaum zoo qhia thaum nyuam qhuav qheb lub khw. Thaum tus los pav lossis tus neeg ua haujlwm khoom, mam li nrog nws tham. Tsis txhob qhia ntev qhia ntau.
4. Peb yuav hais li cas thaum peb mus qhia hauv tej chaw ua haujlwm?
4 Yuav Qhia Li Cas? Yog tias muaj neeg ua haujlwm coob, ces nrog tus los pav tham ua ntej. Tej zaum zoo rau koj hais li no: “Pom tias coob leej ntau tus khwv kawg li, tsis khoom nyob tsev li lawm, peb thiaj tuaj ntawm no. Kuv paub tias koj khwv heev, kuv xav nrog koj tham ib pliag xwb.” Yog tias nws tsis nug txog cov ntaub ntawv, ces tsis txhob qhia rau nws tias peb cov ntawv yog txhawb los ntawm tej nyiaj pub dawb, nyob tsam nws xav yuam kev tias peb tuaj ua luam xwb. Yog tias zoo nug, ces thov seb tus los pav puas kam koj qhia cov neeg ua haujlwm. Qhia lawv ib yam li koj qhia tus los pav. Yog tias tus neeg ua haujlwm tsis khoom, ces qhia ob peb los xwb, thiab muab ib daim ntawv tso rau nws. Yog tias lawv tsis pub koj qhia cov neeg ua haujlwm, ces nug seb lawv puas kam koj tso ntaub ntawv hauv chav uas lawv so.
5. Vim li cas zoo rau koj qhia Vajlugkub hauv tej kiab tej khw?
5 Yexus thiab Povlauj twb tsis ntshai qhia rau tej chaw ua lag ua luam. Yog li, cia peb ua siab tawv qhia ib yam li nkawd. (Mth. 4:18-21; 9:9; Ttx. 17:17) Thov kom Yehauvas pab koj muaj lub siab loj siab tuab qhia. (Ttx. 4:29) Thaum koj mus qhia hauv tej chaw ua haujlwm, koj yeej yuav ntsib tibneeg. Yog li ntawd, cia li rau siab ntso mus qhia hauv tej kiab tej khw!