Qhia Kom Tibneeg Xav Los Kawm Txog Yehauvas
1. Peb kawm tau li cas los ntawm cov Khixatia nyob thawj 100 xyoo?
1 Cov Khixatia nyob thawj 100 xyoo tshaj tawm txoj xov zoo rau txhua haiv neeg, txawm lawv yuav coj txojkev ntseeg twg los xij. (Khx. 1:23) Cov Khixatia qhia tib txoj xov txog Vajtswv lub Nceeg Vaj, tiamsis lawv yuav tau yoog cov tibneeg. Thaum Petus qhia cov Yudai, nws paub tias lawv hwm Vajtswv Txojlus, nws thiaj siv tus cev Vajtswv lus hu ua Yau-ee zaj lus faj lem los qhia. (Ttx. 2:14-17) Tiamsis hauv Tubtxib Tes Haujlwm 17:22-31, thaum Povlauj qhia cov Kili, nws ho qhia txawv ntawd. Niaj hnub no, thaum peb mus tshaj tawm los peb yuav tau yoog cov tibneeg thiab. Thaum peb ntsib cov uas hwm phau Vajlugkub, lawv yeej tsis xav li cas yog peb nthuav Vajlugkub rau lawv. Tiamsis thaum peb ntsib cov uas ib txwm tsis kawm Vajlugkub thiab tsis coj kevcai Khixatia, peb yuav tsum ua tib zoo xaiv peb tej lus thiab txiav txim seb lub caij twg thiaj zoo nthuav Vajlugkub.
2. Thaum ntsib cov uas hwm phau Vajlugkub, koj yuav siv cov ntaub ntawv Vajlugkub li cas? Ua li, thaum koj ntsib cov uas tsis paub Vajlugkub, koj yuav siv cov ntaub ntawv li cas?
2 Paub Siv Cov Ntaub Ntawv Vajlugkub: Pib lub 9 Hlis Ntuj mus, 2 lub hlis twg peb yuav siv ib phau ntawv txawv, mus tseb rau tibneeg saib. Txawm cov tibneeg hauv peb koog tsis nyiam Vajlugkub los, yeej muaj lwm cov ntsiab lus uas lawv xav paub txog. Tej zaum peb yuav tsis nyeem Vajlugkub rau thawj zaus uas peb ntsib lawv, tiamsis yog peb nrog lawv tham tas, es ntxim zoo li lawv kuj xav paub ntxiv, ces peb mam li teem sijhawm rov mus xyuas lawv. Koj lub hom phiaj yog los pab kom tus tswv tsev muaj kev ntseeg rau Vajtswv thiab nws Txojlus. Yog tias koog koj nyob feem coob twb hwm Vajlugkub lawm, ces siv tej phau ntawv uas phim lawv. Koj xav muab phau ntawv Vajlugkub Qhia, Mloog Vajtswv Lus, lossis phau Mloog Vajtswv Lus koj thiaj Muaj Sia Nyob Mus Ib Txhis, rau tibneeg saib lub hli twg los yeej tau. Nco ntsoov tias koj lub hom phiaj yog los qhia kom tus tswv tsev xav kawm ntxiv txog Yehauvas.
3. Ua li cas thiaj muab tibneeg lub siab piv txwv yam li tej av?
3 Khawb Teb, Txaws Av Zoo Zoo: Tibneeg lub siab zoo yam li tej av uas cog qoob cog loo. (Lk. 8:15) Thaj teb av tawv, yuav tau khawb thiab txaws kom zoo, thaum tseb noob thiaj tuaj taus. Cov Khixatia nyob thawj 100 xyoo tseb noob txhua txhia qhov chaw, rau hom av zoo li cas los xij. Tes haujlwm no ua rau lawv txaus siab thiab zoo siab kawg li. (Ttx. 13:48, 52) Yog tias peb ua tib zoo xyaum qhia Vajlugkub, yuav pab tau coob leej xav kawm ntxiv txog Yehauvas.