Pab Tibneeg Mloog Vajtswv Lus
1. Lub rooj sib txoos loj tsaib no peb tau txais 2 phau ntawv tshiab hu li cas, thiab vim li cas zoo siv ua luaj?
1 Tsaib no thaum peb mus lub rooj sib txoos loj hu ua ‘Thov Cia Vajtswv Lub Nceeg Vaj Los!’, peb tau txais 2 phau ntawv tshiab hu ua Mloog Vajtswv Lus koj thiaj Muaj Sia Nyob Mus Ib Txhis, thiab phau yoojyim hu ua Mloog Vajtswv Lus. Ob phau ntawv no tsis muaj lus ntau, ua rau yoojyim txhais heev. Thaum luam tawm 2 phau ntawv no, lub koom haum twb tso cai muab phau Mloog Vajtswv Lus koj thiaj Muaj Sia Nyob Mus Ib Txhis txhais ua 431 yam lus lawm.
2. Ob phau ntawv no yuav pab tau leejtwg?
2 Ob phau ntawv no yuav pab tau leejtwg? Xav txog cov tibneeg uas yuav hais no. Cov timkhawv niaj hnub ntsib cov neeg no.
• Ib tug tshaj tawm ntsib ib tug tswv tsev uas tsis paub nyeem ntawv zoo, lossis tej zaum nws kuj tsis paub nyeem ntawv li.
• Tus tshaj tawm qhia Vajlugkub rau ib co tibneeg uas tsis muaj ntaub ntawv Vajlugkub ntau ua lawv yam lus, lossis tsis muaj ib phau hlo li. Thiab hauv koog ntawd, feem coob kuj tsis paub nyeem lawv cov lus.
• Ib tug tshaj tawm piav tes qhia Vajlugkub rau cov neeg tsis hnov lus hauv koog uas nws nyob.
• Leej niam lossis leej txiv qhia qhov tseeb rau tus menyuam uas tsis tau paub nyeem ntawv.
3. Phau ntawv Mloog Vajtswv Lus zoo li cas?
3 Ob Phau Ntawv No Zoo Li Cas?: Phau Mloog Vajtswv Lus yoojyim kawg li. Txhua nplooj tsuas muaj tib kab lus sau rau hauv qab, thiab muaj ib nqe Vajlugkub uas pab txhawb lub ntsiab tseem ceeb xwb. Vim li cas yuav sau yoojyim ua luaj? Muab xav li no, yog lwm tus muab ib phau ntawv rau koj, es muaj duab zoo nkauj heev, tiamsis koj tsis paub nyeem ib los li, puas txaus koj siab? Yeej tsis txaus yus siab li! Ib yam li ntawd, cov neeg tsis paub nyeem ntawv, tsis xav saib tej npe ntawv ntau ntau. Twb yog vim li no, thiaj npaj phau ntawv no kom muaj duab ntau xwb. Txhua daim duab muaj ib lub ntsais uas taw qhia tias, yuav piav daim duab twg ua ntej, xwv yus thiaj paub piav ib daim zuj zus.
4. Phau ntawv Mloog Vajtswv Lus koj thiaj Muaj Sia Nyob Mus Ib Txhis zoo li cas?
4 Phau Mloog Vajtswv Lus koj thiaj Muaj Sia Nyob Mus Ib Txhis, kuj muaj tib co duab zoo li phau Mloog Vajtswv Lus thiab. Tiamsis hauv cov duab ntawd muaj ib co lus thiab ib co nqe Vajlugkub. Phau no yog qhia rau cov uas tabtom xyaum nyeem ntawv lossis nyeem tau ntawv mentsis xwb. Tus tshaj tawm siv tau phau no los pab tus uas kawm phau yoojyim los tau. Txhua zaj kawm yuav teb tau lo lus nug lossis lub ntsiab ntawm sab laug. Ntau zaj kuj muaj ob peb kab lus sau rau hauv qab ntawm sab xis, thiab muaj ob peb nqes Vajlugkub uas zoo siv los pab tus uas kawm.
5. Thaum twg thiaj zoo tseb 2 phau ntawv no, thiab yuav tseb li cas?
5 Tseb Li Cas: Thaum koj mus qhia Vajlugkub lub tsev rau tsev, txawm tias tsis yog lub hli tseb 2 phau ntawv no los, yog tias zoo tseb ces koj yeej tseb tau. (Saib lub ntsiab me “Yuav Tseb Li Cas.”) Koj kuj siv tau 2 phau ntawv no rau cov uas koj rov qab mus xyuas thiab. Cia li qhia rau nws tias koj xav muab ib phau rau nws saib, ces muab phau ntawv cev rau nws.
6. Peb yuav siv 2 phau ntawv no los qhia Vajlugkub rau tibneeg li cas?
6 Phau ntawv Mloog Vajtswv Lus tsis muaj lus nug nyob rau hauv. Yog li ntawd, thaum koj qhia Vajlugkub rau ib tug twg koj tsis tas ua lus nug lus teb, zoo li phau ntawv Vajlugkub Qhia. Txhua haiv neeg yeej nyiam mloog dab neeg heev. Thaum koj piav, koj yuav tsum piav zoo li hais ib zaj dab neeg. Piav seb cov duab qhia txog dabtsi hauv phau Vajlugkub. Qhia kom muaj ceem tsawv thiab nug seb tus uas kawm ho xav li cas. Nyeem cov nqe Vajlugkub uas sau rau hauv qab, thiab piav kom nws nkag siab lub ntsiab. Cia nws tham thiab, koj thiaj paub tias nws nkag siab li cas. Yog tias koj siv phau Mloog Vajtswv Lus koj thiaj Muaj Sia Nyob Mus Ib Txhis, ces thaum koj piav txog ib daim duab twg, siv sijhawm los nyeem cov lus thiab nqe Vajlugkub ntawm daim duab ib sab.
7. Peb yuav pab li cas tus kawm thiaj li loj hlob?
7 Pab Kom Tus Uas Kawm Loj Hlob: Tej zaum ntev mus tus uas koj qhia yuav xav xyaum nyeem ntawv, nws thiaj kawm tau ntxiv txog Yehauvas. (Lk. 11:28; Yh. 17:3) Yog tias neb kawm phau Mloog Vajtswv Lus tau ib ntus lawm, nug seb nws puas xav kom koj qhia nws nyeem ntawv, mam li hloov mus kawm phau Mloog Vajtswv Lus koj thiaj Muaj Sia Nyob Mus Ib Txhis. Txawm neb yuav kawm tas ob phau ntawv no los, zoo rau neb kawm ntxiv mus rau phau Vajlugkub Qhia, lossis lwm phau uas yuav pab kom nws to taub phau Vajlugkub ntxiv, nws thiaj ua tau kevcai raus dej.
8. Vim li cas peb ho zoo siab rau 2 phau ntawv no?
8 Tibneeg yuav tsum mloog tus muaj hwjchim loj kawg nkaus tej lus lawv thiaj nyob tau mus ib txhis. (Yxy. 55:3) Yehauvas xav kom “ib tsoom neeg” txhua tus xyaum mloog nws lus, txawm lawv yuav txawj nyeem ntawv thiab tsis txawj los xij. (1Tmt. 2:3, 4) Peb ua Yehauvas tsaug uas peb tau 2 phau ntawv no los cob qhia kom tibneeg mloog nws lus!
[Ntsiab me nyob sab 3]
Yuav Tseb Li Cas
Nthuav mus rau sab 2-3, thiab qhia tus tswv tsev tias: “Koj puas xav nyob ib qho chaw uas zoo nkauj li no? [Cia nws teb tas tso.] Phau Vajlugkub cog lus tias Vajtswv yuav muab lub ntiajteb ua kom zoo nkauj li no, yuav muaj kev thaj yeeb txhua qhov, tsis muaj neeg txom nyem lossis muaj mob muaj nkeeg. Yuav kom peb nyob tau qhov chaw no, peb yuav tsum ua raws li nqe no qhia. [Nyeem Yaxaya 55:3 nyob ntawm sab 3 no.] Nqe no qhia kom peb ‘los cuag’ Vajtswv thiab ‘mloog’ nws lus. Tiamsis peb yuav mloog Vajtswv lus li cas?” Nthuav mus rau sab 4-5, thiab tham lo lus teb rau nws. Yog nws tsis muaj sijhawm ces muab phau ntawv tso rau nws, es teem caij rov qab mus saib nws, neb mam kawm ntxiv.