Xyaum Siv Phau Ntawv Vajtswv Muaj Xov Zoo Rau Peb!
Phau Ntawv Tshiab Uas Zoo Coj Mus Qhia Vajlugkub Rau Tibneeg
1. Tsaib no peb tau txais phau ntawv tshiab twg? Thiab phau ntawv no pab tau peb qhia Vajlugkub li cas?
1 Tsaib no peb lub Rooj Sib Txoos Loj hu ua “Tswj Koj Lub Siab Rau Txhua Fab!” Peb zoo siab kawg li uas peb tau txais ib phau ntawv tshiab hu ua Vajtswv Muaj Xov Zoo Rau Peb! Zoo rau peb siv phau ntawv no thaum peb rov mus xyuas tibneeg, lossis thaum peb pib kawm Vajlugkub nrog ib tug twg. Phau ntawv no yog hloov phau Vajtswv Xav Kom Peb Yuav Tsum Ua Dabtsi? Ob phau ntawv no qhia yoojyim tib yam, thiaj zoo siv los kawm Vajlugkub nrog tibneeg ntawm qhov rooj. Tiamsis 2 phau ntawv no sib txawv li cas? Phau ntawv Vajtswv Xav Kom Peb Yuav Tsum Ua Dabtsi? piav ntau yam txog tej uas cov Khixatia yuav tsum ua. Tsis yoojyim rau tibneeg yoog tau tej kevcai ntawd. Tiamsis phau ntawv tshiab no, qhia tsi ntsees txog txoj xov zoo hauv phau Vajlugkub.—Ttx. 15:35.
2. Vim li cas thiaj sau phau ntawv Xov Zoo?
2 Vim li cas thiaj sau phau ntawv tshiab no? Peb cov kwvtij uas nyob qhov txhua qhov chaw hauv lub qab ntuj no, tau thov kom npaj ib phau ntawv uas yoojyim nkag siab. Lawv xav tau ib phau ntawv uas yuav rub tau tibneeg los kawm qhov tseeb thiab kawm phau ntawv Vajlugkub Qhia. Tibneeg feem coob tsis nyiam kawm cov ntawv tuab li phau Vajlugkub Qhia. Tiamsis lawv kuj zoo siab kawm tej phau me li phau tshiab no. Tsis tas li ntawd xwb, kuj tsis nyuaj muab phau ntawv no txhais ua lwm yam lus thiab.
3. Vim li cas phau ntawv no txawv ntawm lwm phau?
3 Phau Ntawv No Zoo Li Cas? Ntau zaus cov kwvtij sau peb cov ntaub ntawv ntxaws ntxaws kom tibneeg nkag siab qhov tseeb. Txawm tias tsis muaj ib tug timkhawv nyob ntawd qhia los, lawv twb txais raug lub ntsiab lawm. Tiamsis phau ntawv tshiab no txawv ntawd, rau qhov yuav tsum muaj tus qhia kom tus kawm thiaj nkag siab. Twb yog vim li ntawd, thaum koj muab phau ntawv no rau tibneeg, zoo rau neb kawm ib ob nqes ua ke. Phau ntawv no tsuas muaj tej nqe luv luv xwb, yog li zoo siv mus qhia tibneeg tom tej kiab tej khw, lossis ntawm lawv qhov rooj. Koj xub qhia zaj twg los tau.
4. Phau ntawv no qhia kom peb siv phau Vajlugkub li cas?
4 Tej ntaub ntawv uas peb luam tawm, feem ntau muaj lus nug thiab lus teb nyob rau hauv phau ntawv. Tiamsis hauv phau ntawv tshiab no, peb yuav tsum nthuav Vajlugkub los teb cov lus nug. Feem coob xav kawm dua yog tias peb nthuav phau Vajlugkub los qhia lawv. Phau ntawv no thiaj muaj ntau nqe Vajlugkub uas sau tias “nyeem.” Thaum koj nthuav phau Vajlugkub los nyeem, tus uas kawm yuav pom tias tej uas neb kawm yog Vajtswv Txojlus tiag.—Yxy. 54:13.
5. Vim li cas tus timkhawv yuav tsum ua tib zoo npaj ua ntej nws mus qhia ib tug twg?
5 Phau ntawv no tsis piav txhua nqe Vajlugkub, kom tus uas kawm thiaj nug txog tej yam uas nws xav paub thiab kom tus timkhawv xyaum piav cov nqe Vajlugkub ntawd. Yog li ntawd, ua ntej peb mus qhia ib tug twg, peb yuav tsum ua tib zoo npaj. Peb sawvdaws nyiam piav cov nqe Vajlugkub heev, tiamsis peb yuav tsum ua tib zoo tsam peb hais ntau dhau lawm. Zoo rau peb nug seb tus uas kawm nkag siab nqe Vajlugkub ntawd li cas. Yog tias peb ua tib zoo nug nws ces nws yuav nkag siab thiab muab tau lub ntsiab.—Ttx. 17:2.
6. (a) Peb yuav siv phau ntawv no mus qhia rau cov uas tsis ntseeg phau Vajlugkub thiab tsis tau ntseeg Vajtswv li cas? (b) Peb yuav siv phau ntawv no mus qhia ib lub tsev rau ib lub li cas? (c) Peb yuav siv phau ntawv no los nug seb tibneeg puas xav kawm Vajlugkub li cas? (d) Thaum rov mus xyuas tibneeg, peb yuav siv phau ntawv no li cas?
6 Koj tseb phau ntawv no thaum twg los tau. Txawm tias lub hli ntawd tsis hais kom tseb phau ntawv no los, yeej tseb tau. Sawvdaws yuav nyiam coj phau ntawv no mus qhia ib lub qhov rooj rau ib lub, thiab nug seb tibneeg puas xav kawm Vajlugkub. Tsis tas li ntawd xwb, zoo siv phau ntawv no thaum peb rov mus xyuas ib tug uas xav kawm, zoo li peb tau kawm hauv lub rooj sib txoos loj.—Saib cov ntsiab me ntawm sab 6-8.
7. Peb yuav qhia phau ntawv no li cas?
7 Yuav Qhia Li No: Peb xub nyeem lo lus nug uas sau npe ntawv dub dub ua ntej los tau. Tom qab ntawd, peb mam li nyeem nqe hauv qab thiab cov nqe Vajlugkub uas sau qaij. Ua tib zoo nug kom tus kawm nkag siab cov nqe Vajlugkub. Ua ntej neb yuav kawm ntxiv rau lwm lub ntsiab me, rov nug seb tus uas kawm puas teb tau lo lus nug uas sau dub dub. Yog tias koj rov nug li no, koj thiaj paub tias nws nkag siab lawm tiag. Thawj ib ob zaug uas koj mus xyuas nws, zoo rau neb kawm 1 lo lus nug ua ke xwb. Ntev zuj zus neb mam li kawm tag nrho ib zaj.
8. Zoo rau peb hais li cas thaum peb yuav nthuav ib nqe Vajlugkub los nyeem? Thiab yog vim li cas?
8 Yuav kom teb tau cov lus nug uas sau dub dub, peb yuav tsum saib cov nqe Vajlugkub uas qhia kom peb “nyeem.” Nco ntsoov tias thaum peb yuav nyeem ib nqe Vajlugkub twg, tsis txhob siv ib tug neeg twg lub npe, xws li Povlauj thiab Yelemi, tias lawv yog cov uas sau nqe ntawd. Yog peb hais li ntawd ces ib txhia yuav xav yuam kev tias phau Vajlugkub yog neeg lub tswvyim xwb. Zoo rau peb hais tias cov nqe ntawd yog los ntawm Vajtswv Txojlus phau Vajlugkub.
9. Puas yog peb yuav tsum nyeem txhua nqe Vajlugkub hauv phau ntawv no huv tibsi?
9 Puas yog peb yuav tsum nyeem txhua nqe Vajlugkub hauv phau ntawv no tibsi? Nyob ntawm koj thiab tus uas kawm xwb. Nco ntsoov tias txhua nqe uas cov kwvtij xaiv los sau hauv phau ntawv no, puavleej muaj qab hau thiab zoo kawm. Tiamsis tej zaum tsis muaj sijhawm txaus, thiaj tsis nyeem xwb. Tej zaum tus kawm kuj tsis tshua xav paub txog lub ntsiab ntawd thiab. Muaj tej txhia kuj tsis tau txawj nyeem ntawv zoo. Vim li no thiaj nyeem cov nqe Vajlugkub uas qhia kom “nyeem” xwb.
10. Thaum twg mam li hloov mus kawm phau Vajlugkub Qhia?
10 Thaum Twg Mam Li Kawm Phau Vajlugkub Qhia: Thaum tus tswv tsev kawm tsis tu ncua lawm, peb mam li xav seb puas zoo hloov mus kawm phau ntawv Vajlugkub Qhia. Ib txhia kawm phau Xov Zoo tas mam li hloov. Nyob ntawm koj seb thaum twg thiaj zoo hloov xwb. Yog tias koj yuav hloov rau phau Vajlugkub Qhia puas yog koj yuav tsum pib qhia tom hauv paus tuaj? Nyob ntawm koj thiab tus kawm xwb. Cov tibneeg uas peb ntsib, ib tug txawv ntawm ib tug. Txawm tias cov ntsiab lus hauv phau Vajlugkub Qhia thiab phau Xov Zoo, muaj tej zaj hais sib xws los, yog tias rov kawm dua ib lwm, kuj haj yam pab tau tus kawm xwb.
11. Vim li cas peb yuav tsum xyaum siv phau ntawv tshiab no?
11 Hauv lub qab ntuj no, tsis muaj xov zoo nrov qhovtwg tuaj li lawm. Tiamsis peb sawvdaws muaj txoj hmoo los mus tshaj tawm txoj xov zoo txog Vajtswv lub Nceeg Vaj uas twb kav saum ntuj lawm. Tshuav tsis ntev lawm xwb, lub Nceeg Vaj yuav muab lub ntiajteb no kho dua tshiab, thiab yuav muaj kev ncaj ncees nyob txhua qhov. (Mth. 24:14; 2Pt. 3:13) Peb tso siab tias cov uas tau hnov txoj xov zoo yuav xav ib yam li tau hais no: “Tus uas coj xov zoo tuaj txhais kotaw zoo nkauj kawg rau saum tej roob, yog tus uas tshaj tawm txojkev thaj yeeb thiab coj xov zoo hais txog zaj uas zoo, yog tus uas tshaj tawm txojkev cawm dim, thiab hais rau Xi-oo tias, ‘Koj tus Vajtswv ua vajntxwv kav.’” (Yxy. 52:7) Thov kom sawvdaws xyaum siv phau ntawv tshiab no, xwv txhua leej txhua tus uas ntshaw Vajtswv Txojlus, thiaj tau hnov txoj xov zoo uas Vajtswv muab rau peb!
[Ntsiab me nyob sab 6]
Cov Uas Tsis Ntseeg Vajlugkub Thiab Tsis Tau Ntseeg Vajtswv:
● Nyob rau hauv tej koog, yog koj hais tias koj mus qhia “Vajlugkub” lossis qhia txog “Vajtswv” ces tibneeg yuav tsis kam nrog koj tham. Yog tias koj koog coj li ntawd, zoo rau koj xub tham txog lwm yam. Xav seb cov neeg hauv koog ntawd txhawj txog dabtsi. Tej zaum lawv txhawj txog kev nom kev tswv, lossis xav paub seb yuav ua li cas thiaj cob qhia tau tej metub menyuam. Tej tug kuj txhawj txog lub neej tom hauv ntej. Nrog nws tham txog tej pov thawj uas qhia tias muaj Vajtswv tiag, thiab peb yeej tso siab tau rau phau Vajlugkub. Tom qab koj nrog nws tham ib ob zaug lawm, mam li muab phau ntawv Xov Zoo rau nws.
[Ntsiab me nyob sab 7]
Mus Ib Lub Tsev Rau Ib Lub:
● “Kuv xav qhia txog tej yam uas Vajtswv tau cog tseg rau noob neej yav tom hauv ntej. Raws li koj xav, Vajtswv puas yuav tshem tawm tej kev txom nyem puag ncig peb? [Cia nws teb tas tso.] Phau ntawv no tham txog qhov ntawd, thiab qhia kom peb txawj tshawb nrhiav tej lus no hauv phau Vajlugkub. [Nthuav phau ntawv rau nws, thiab nyeem thawj nqe hauv zaj kawm 1, ces mus nyeem Yelemi 29:11.] Raws li nqe no, Vajtswv puas xav kom noob neej tau zoo thiab? [Cia nws teb tas tso.] Kuv xav muab phau ntawv no rau koj. Lwm zaus wb mam li kawm nqe 2, seb raws li phau Vajlugkub qhia, Vajtswv yuav tshem tawm tej kev txom nyem li cas.” Yog tias tus tswv tsev muaj sijhawm ces cia li nyeem nqe 2, thiab nyeem 3 nqe Vajlugkub uas nyob rau hauv tibsi. Thiab teem sijhawm rov mus kawm lo lus nug 2.
● “Coob leej ntau tus yeej thov Vajtswv thaum lawv raug kev nyuaj siab. Puas muaj tej lub caij uas koj thov Vajtswv thiab? [Cia nws teb tas tso.] Raws li koj xav, Vajtswv puas mloog txhua tus tej lus thov? Puas muaj tej tug uas Vajtswv tsis kam mloog? [Cia nws teb tas tso.] Phau ntawv no yuav tham txog qhov ntawd, thiab qhia kom peb txawj tshawb nrhiav tej no hauv phau Vajlugkub. [Nthuav phau ntawv rau nws, thiab nyeem thawj nqe hauv zaj kawm 12, ces mus saib cov nqe Vajlugkub uas qhia kom “nyeem.”] Thaum peb kawm tias Vajtswv tseem mloog tibneeg tej lus thov, yeej ua rau peb xav tsis thoob li puas yog? Yog tias peb xav kom Vajtswv txaus siab rau peb tej lus thov, peb yuav tsum kawm txog nws. [Nthuav rau zaj kawm 2 thiab tham txog cov lus nug dub dub.] Kuv xav muab phau ntawv no rau koj. Lwm zaus wb mam li kawm seb phau Vajlugkub qhia li cas txog cov lus nug no.”
● “Coob leej ntau tus pom tias hauv lub qab ntuj no tsuas muaj phem zuj zus lawm xwb. Raws li koj xav, puas yuav muaj leejtwg kho tau thiab? [Cia nws teb tas tso.] Phau Vajlugkub muaj xov zoo heev rau peb sawvdaws, kom peb thiaj muaj chaw vam rau yav tom hauv ntej. Phau Vajlugkub teb tau cov lus nug no.” Cev phau ntawv rau nws saib lub khaum ntawm sab kawg nkaus. Cia nws xaiv seb nws xav kawm txog lo lus nug twg. Nthuav mus rau zaj kawm uas nws xav paub txog, ces cia li pib kawm zaj ntawd ua ke. Teem sijhawm rov mus xyuas nws thiab kawm ib lo lus nug ntxiv hauv zaj kawm ntawd.
[Ntsiab me nyob sab 8]
Nug Seb Lawv Puas Xav Kawm:
● “Kuv muaj ib phau ntawv uas yuav pab tau koj kawm phau Vajlugkub. Phau ntawv no muaj 15 zaj nyob rau hauv, thiab pab kom peb txawj tshawb nrhiav cov lus nug no. [Muab lub khaum rau nws saib.] Koj puas tau kawm phau Vajlugkub ib zaug li? [Cia nws teb tas tso.] Yog tias koj tsis xav li cas, kuv xav nyeem ib ob nqes rau koj. [Nthuav rau zaj kawm 3, kawm thawj nqe hauv lo lus nug 3, thiab nyeem Qhia Tshwm 21:4, 5. Yog tias muaj sijhawm, kawm ib nqes ntxiv, thiab saib cov nqe Vajlugkub uas qhia kom “nyeem.”] Kuv xav tso phau ntawv no rau koj saib. Zoo rau peb nrog luag kawm Vajlugkub ib ob zaug thiab, yog tias koj nyiam ces mam li kawm ntxiv mus. Lwm zaus kuv tuaj, wb mam li kawm zaj 1 ua ke. Zaj no luv heev, yog ib nploog ntawv xwb.”
[Ntsiab me nyob sab 8]
Rov Mus Xyuas Tibneeg:
● Thaum peb rov mus xyuas ib tug uas xav kawm, tej zaum peb yuav tau hais li no: “Zoo siab rov tuaj ntsib koj. Kuv xav muab phau ntawv no rau koj. Phau Vajlugkub teb tau cov lus nug hauv phau ntawv no. [Cev phau ntawv rau nws thiab qhia kom nws saib lub khaum ntawm sab kawg nkaus.] Koj xav kawm txog lo lus nug twg? [Cia nws teb tas tso. Nthuav rau zaj kawm uas nws xaiv.] Cia wb kawm zaj no ua ke, wb thiaj paub tias Vajlugkub qhia li cas.” Kawm ib ob nqes ua ke, thiab nthuav saib cov nqe Vajlugkub uas qhia kom “nyeem.” Qhov uas neb kawm ib ob nqes ua ke li ntawd, twb yog nws pib kawm Vajlugkub lawm ntag! Tseg phau ntawv rau nws, thiab teem sijhawm rov mus saib nws. Thaum neb kawm tas zaj ntawd, cia nws xaiv dua ib zaj ntxiv rau neb kawm lwm zaus, lossis mus kawm tom hauv paus tuaj.