Xyaum Siv Phau Ntawv Leejtwg Thiaj Ua Li Yehauvas Siab Nyiam?
Phau Ntawv Tshiab Uas Cob Kom Tus Kawm Vajlugkub Paub Txog Lub Koom Haum
1. Phau ntawv Yehauvas Siab Nyiam pab kom tus kawm Vajlugkub paub txog 3 yam dabtsi?
1 Koj puas tau xyaum siv phau ntawv tshiab hu ua, Leejtwg Thiaj Ua Li Yehauvas Siab Nyiam? Phau ntawv no yuav pab kom cov uas kawm Vajlugkub paub txog 3 yam no: (1) Yehauvas cov Timkhawv yog leejtwg? (2) Peb tes haujlwm zoo li cas? (3) Peb lub koom haum khiav haujlwm li cas? Txhua zaj kawm hauv phau ntawv no tsuas muaj ob peb nqes xwb. Yog li ntawd, tom qab koj kawm Vajlugkub nrog ib tug twg tas, siv li tsib rau feeb los nrog nws kawm ib zaj ua ke.
2. Piav seb phau ntawv no zoo li cas.
2 Phau Ntawv No Zoo Li Cas? Phau ntawv no muaj 3 ntus uas piav txog cov ntsiab lus hais tas los saum no. Phau ntawv no muaj 28 zaj nyob rau hauv. Lub ntsiab lus rau txhua zaj kawm yog ib lo lus nug, ces cov ntsiab me uas sau npe ntawv dub dub yuav teb lo lus nug ntawd. Phau ntawv no kuj muaj duab ntau heev los ntawm 50 lub tebchaws. Txhua daim duab yeej muaj lus qhia tias yog lub tebchaws twg. Cov duab no pab peb pom tias Yehauvas cov tibneeg ua haujlwm thoob plaws lub ntiajteb. Hauv cov zaj kawm ntawd, ib txhia muaj lub ntsiab me hu ua “Koj Puas Xav Paub Ntxiv?” Siv lub ntsiab me ntawd los txhawb kom tus uas kawm Vajlugkub xyaum raws li tej uas neb nyuam qhuav kawm.
3. Peb yuav siv phau ntawv Yehauvas Siab Nyiam li cas?
3 Koj Yuav Siv Phau Ntawv No Li Cas? Thaum koj yuav kawm phau ntawv no nrog ib tug twg, zoo rau neb xub nyeem lub ntsiab ua ntej. Tom qab ntawd mam li nyeem zaj kawm ua ke. Tej txhia nyeem zaj kawm ib lwm thoob plaws mam li tham. Ib txhia nyeem ib ob nqes tas ces mam li tham. Thaum neb nyeem ua ke, nco ntsoov piav cov ntsiab me uas sau dub dub. Thaum nyeem tas lawm, mam li tham cov lus nug nram qab. Nyob ntawm koj seb koj yuav xaiv cov nqe Vajlugkub twg los nyeem. Nco ntsoov piav cov duab, thiab nyeem cov ntsiab me hu ua “Koj Puas Xav Paub Ntxiv?” Zoo rau koj qhia ib zaj kawm zuj zus tuaj. Tiamsis yog tias zoo qhia lwm zaj ces koj hla mus rau zaj ntawd los tau. Xws li, thaum yuav muaj rooj sib txoos 1 hnub thiab 2 hnub, lossis rooj sib txoos loj, zoo rau koj hla mus rau zaj 11, tus kawm thiaj nkag siab txog cov rooj sib txoos ntawd.
4. Vim li cas zoo kawg li uas peb tau txais phau ntawv tshiab no?
4 Thaum tibneeg kawm Vajlugkub twb yog lawv kawm txog peb Leej Txiv Yehauvas. Tiamsis peb yuav tsum pab lawv kawm txog Yehauvas lub koom haum thiab. (P.L. 6:20) Zoo siab kawg li uas peb muaj phau ntawv tshiab no los pab peb qhia tibneeg txog Yehauvas lub koom haum!