Leejtwg Thiaj Ua Li Yehauvas Siab Nyiam?
1. Thaum twg peb yuav pib kawm phau ntawv Leejtwg Thiaj Ua Li Yehauvas Siab Nyiam? Yog peb kawm phau ntawv no, yuav pab tau peb li cas?
1 Pib lub 10 Hli tim 28, peb yuav kawm phau ntawv Leejtwg Thiaj Ua Li Yehauvas Siab Nyiam? rau Lub Koom Txoos Kev Kawm Vajlugkub. Phau ntawv no yog ib phau tshiab uas nyuam qhuav tawm rau lub rooj sib txoos loj “Tswj Koj Lub Siab Rau Txhua Fab!” Phau ntawv no yog sau los pab cov uas kawm Vajlugkub kom paub txog Yehauvas lub koom haum. Yog peb kawm phau ntawv no, yuav pab peb nco Yehauvas lub koom haum txiaj ntsig thiab yuav pab kom peb paub siv phau ntawv no mus qhia lwm tus.—Nt.Nk. 48:13.
2. Yuav muab phau ntawv no los siv li cas hauv lub koom txoos?
2 Yuav Kawm Phau Ntawv No Li Cas: Tus kwvtij uas coj yuav tau ua tib zoo npaj xwv thiaj pab tau sawvdaws to taub txhua zaj. Thaum kawm ib zaj twg, tus coj xub nyeem lo lus nug uas yog lub ntsiab rau zaj ntawd. Tom qab ntawd, nws mam li hais kom tus kwvtij nyeem thawj nqe. Ces nws mam li nug sawvdaws lo lus nug uas nws tau npaj rau thawj nqe ntawd. Tom qab tham tas thawj nqe, mam li nyeem thiab tham cov nqe uas muaj thawj kab lus dub dub, ib nqes zuj zus. Thaum nyeem txog nqe twg, tus coj mam li nug sawvdaws seb nqe ntawd teb tau thawj lo lus nug uas yog lub ntsiab li cas. Thiab zoo rau sawvdaws tham txog cov duab hauv zaj ntawd. Yog sijhawm txaus, nyeem cov nqe Vajlugkub uas tseem ceeb. Ua ntej yuav mus kawm lwm zaj, tham cov lus nug nram qab tso. Yog zaj kawm ntawd muaj lub ntsiab me “Koj Puas Xav Paub Ntxiv,” hais tus kwvtij nyeem lub ntsiab me ntawd thiab nug seb cov lus ntawd pab tau cov uas kawm Vajlugkub li cas. Thaum kawm tas ib zaj twg, yog tshuav sijhawm, zoo rau tus coj rov nug lo lus uas yog lub ntsiab rau zaj ntawd. Nco ntsoov tias cov lus no yog hais rau tus kwvtij uas coj Lub Koom Txoos Kev Kawm Vajlugkub xwb, tsis yog hais rau cov qhia Vajlugkub.
3. Yuav kom phau ntawv no pab tau peb, peb yuav tau ua li cas?
3 Yuav kom phau ntawv no pab tau koj, koj yuav tau ua tib zoo npaj ua ntej mus kev sib txoos thiab npaj mus teb. Thaum kawm phau ntawv no, xav seb tej uas tabtom kawm pab tau cov uas kawm Vajlugkub li cas. Cia tej uas peb kawm hauv phau ntawv no pab tau peb mus coj lwm tus los nrog peb ua Vajtswv tes haujlwm kom lawv thiaj yuav tau nyob mus ib txhis thiab.—1Yh. 2:17.