Siv Phau Xov Zoo Los Qhia
1. Tau muab phau Xov Zoo sau zoo li cas xwb?
1 Daim Tes Num Rau Lub Nceeg Vaj rau lub 7 Hli tham txog tej twj peb siv ua Vajtswv tes num. Ib yam ntawm cov twj ntawd yog phau Vajtswv Muaj Xov Zoo Rau Peb! Yuav tau nthuav phau Vajlugkub los nyeem cov nqe Vajlugkub uas nyob hauv phau ntawv no. Ua li no cov tswv tsev thiaj pom tias tej uas lawv kawm yog los hauv phau Vajlugkub los tiag. Peb tej ntaub ntawv ntau phau yog sau los kom leejtwg nyeem los tus ntawd nkag siab, tiamsis phau no yuav tsum muaj tus qhia tus kawm thiaj nkag siab. Yog li ntawd, thaum peb tseb phau Xov Zoo, zoo rau peb kawm ib nqes ua qauv qhia tus tswv tsev kom nws pom tias kawm txoj xov zoo hauv phau Vajlugkub mas zoo tshaj plaws li!—Mth. 13:44.
2. Thawj zaug uas ntsib tus tswv tsev, peb yuav siv phau Xov Zoo li cas?
2 Thawj Zaug Ntsib Tus Tswv Tsev: Koj kuj hais li no: “Coob leej ntau tus txhawj tias lub qab ntuj no tsuas phem zuj zus lawm xwb. Koj xav puas muaj leejtwg yuav kho tau? [Cia nws teb tas tso.] Phau Vajlugkub muaj xov zoo heev rau peb sawvdaws kom peb thiaj muaj kev cia siab rau yav tom hauv ntej. Phau Vajlugkub teb tau cov lus nug no.” Cev phau ntawv rau tus tswv tsev thiab kom nws saib sab kawg nkaus seb nws nyiam lo lus nug twg. Nthuav mus rau zaj kawm uas nws nyiam ntawd thiab pib kawm nqe 1 hauv zaj kawm ntawd ua ke. Lossis koj kuj nug tus tswv tsev raws li zaj uas koj nyiam thiab siv zaj ntawd los ua qauv qhia nws seb phau ntawv no pab tau nws nrhiav cov lus teb hauv phau Vajlugkub li cas. Yog muaj ib zaj yeeb yaj kiab hauv jw.org uas mus raws zaj kawm ntawd ces ib txhia tshaj tawm nyiam tso zaj yeeb yaj kiab ntawd rau tus tswv tsev saib thiab.
3. Piav seb yuav siv phau Xov Zoo li cas thaum qhia Vajlugkub rau lwm tus.
3 Yuav Qhia Li No: (1) Nyeem lo lus nug uas sau dub dub rau tus tswv tsev mloog kom nws paub tias nqe uas neb yuav nyeem tham txog dabtsi. (2) Nyeem nqe uas nyob hauv qab lo lus nug dub dub. (3) Nyeem nqe Vajlugkub uas sau qaij thiab nug tus tswv tsev seb phau Vajlugkub teb tau lo lus nug dub dub li cas. (4) Yog tseem tshuav ib nqes ntxiv hauv qab lo lus nug dub dub ces ua raws li tau hais tas los hauv nqe 2 thiab 3 saum no. Yog muaj ib zaj yeeb yaj kiab uas mus raws lo lus nug uas neb tham txog ces muab tso rau tus tswv tsev saib. (5) Thaum kawg, kom tus tswv tsev teb lo lus nug uas sau dub dub seb nws puas teb tau.
4. Yuav ua li cas peb thiaj txawj siv phau ntawv no?
4 Yuav tsum paub phau ntawv no kom zoo. Siv phau ntawv no txhua lub sijhawm. Ua ntej mus qhia Vajlugkub rau ib tug twg, xav zoo zoo txog tus ntawd seb yuav siv cov nqe Vajlugkub hauv zaj kawm li cas los piav kom nws nkag siab. (P.L. 15:28; Ttx. 17:2, 3) Thaum koj txawj siv phau ntawv no lawd, ntshe yuav yog phau uas koj nyiam siv los qhia txog qhov tseeb rau tibneeg tshaj!