Tsib Yam Uas Pab Peb Nrhiav Cov Neeg Xav Kawm Vajlugkub
1. Yog tias nyuaj rau koj mus nrhiav cov tibneeg uas xav kawm Vajlugkub, koj yuav tau ua li cas thiab yog vim li cas?
1 Puas nyuaj rau koj mus nrhiav tibneeg los kawm Vajlugkub? Txawm tias nyuaj nrhiav los, tsis txhob tso tseg li. Yehauvas yuav foom koob hmoov rau koj yog tias koj rau siab ntso ua raws li nws lub siab nyiam. (Klt. 6:9) Tsib tug qauv nram no yuav pab kom koj nrhiav tau tibneeg los kawm Vajlugkub.
2. Peb yuav pib kawm Vajlugkub nrog tibneeg li cas?
2 Nug Seb Lawv Puas Xav Kawm: Coob leej yeej paub tias peb tseb tej ntaub ntawv Vajlugkub xws li phau The Watchtower thiab Awake!, tiamsis tej zaum lawv tsis paub tias, peb xav qhia Vajlugkub rau lawv. Yog li ntawd, thaum peb mus ib lub tsev rau ib lub, zoo rau peb cia li nug lawv seb lawv puas xav kawm Vajlugkub. Koj puas tau nug li ntawd? Tej zaum cov uas koj niaj zaus rov mus xyuas kuj xav kawm Vajlugkub thiab. Zoo rau koj nug seb lawv puas xav kawm. Yog tias lawv tsis kam kawm, los rau siab ntso rov mus xyuas lawv thiab tseg ntawv rau lawv saib, kom rub tau lawv lub siab xav los kawm. Tau ntau xyoo, muaj ib tug kwvtij pheej rov mus xyuas ob niam txiv, thiab tseg ntawv rau nkawd nyeem xwb. Muaj ib zaug, nws muab phau The Watchtower thiab Awake! uas tawm tshiab rau nkawd, ces nws txawm xav zoj tias, nug seb nkawd puas xav kawm Vajlugkub. Thaum nws nug, ua cas nkawd kuj xav kawm Vajlugkub thiab. Ua rau nws xav tsis thoob li! Nimno ob niam txiv ntawd twb ua kevcai raus dej lawm.
3. Puas yog txhua tus uas tuaj kev sib txoos twb muaj ib tug kawm Vajlugkub nrog lawv lawd? Piav seb.
3 Nug Cov Uas Tuaj Kev Sib Txoos: Tsis txhob xav tias txhua tus uas tuaj kev sib txoos, twb muaj neeg kawm Vajlugkub nrog lawv lawm. Muaj ib tug kwvtij hais tias: “Cov neeg uas kuv tau qhia Vajlugkub yav tas los, ib nrab ntau yog cov uas twb nrog nws tsev neeg tuaj kev sib txoos ua ntej lawm.” Muaj ib tug niam tais uas txaj muag heev tau nrog nws 2 tug ntxhais uas twb ua kevcai raus dej lawd, tuaj kev sib txoos tsis tu ncua tau 15 xyoos. Thaum nws nrog nkawd tuaj, nws pheej tuaj txog thaum pib kiag koom txoos thiab thaum xaus kiag xwb, nws twb mus tsev lawm. Muaj ib tug muam pom li ntawd, nws thiaj nug seb tus niam tais puas tau kawm Vajlugkub dua. Tus niam tais thiaj pib kawm Vajlugkub, thiab thaum kawg nws tau los paub qhov tseeb. Tus muam thiaj sau tias: “Kuv tu siab tias, twb yog 15 lub xyoos dhau los es kuv mam nug seb nws puas kam kawm Vajlugkub!”
4. Koj yuav pib kawm Vajlugkub nrog cov uas lwm tus qhia rau koj li cas?
4 Lwm Tus Qhia Rau Koj: Ib txhia pib kawm Vajlugkub nrog cov uas lwm tus qhia rau lawv. Muaj ib tug muam tau ua li no. Thaum nws nrog lwm cov mus kawm Vajlugkub, nws nug seb tus uas kawm puas paub tej tug uas xav kawm Vajlugkub thiab. Nws tsuas nug thaum tus qhia tso cai xwb. Tej thaum yog koj muab phau ntawv Vajlugkub Qhia rau ib tug uas koj rov mus xyuas, zoo rau koj nug nws tias: “Koj puas paub leejtwg xav tau ib phau ntawv zoo li no thiab?” Tsis tas li ntawd xwb, tej zaum muaj cov tshaj tawm thiab cov tho kev uas ntsib tej tug uas xav kawm Vajlugkub, tiamsis lawv tsis muaj sijhawm txaus mus qhia. Yog li ntawd, qhia rau cov kwvtij nkauj muam paub tias, koj muaj sijhawm mus pab lawv qhia.
5. Vim li cas zoo rau peb nug cov txij nkawm uas tsis tau ntseeg seb lawv puas xav kawm Vajlugkub?
5 Cov Txij Nkawm Uas Tsis Tau Ntseeg: Puas muaj tej tug hauv koj lub koom txoos uas nws tus txij nkawm tsis tau ntseeg? Muaj ib txhia uas tsis tau ntseeg, tsis kam nws tus txij nkawm qhia Vajlugkub rau nws li, tiamsis nws kuj cia lwm tus nrog nws tham thiab. Ua ntej koj yuav qhia Vajlugkub rau ib tug uas tsis tau ntseeg, nrog tus txij nkawm uas twb ntseeg lawd tham tso, koj thiaj paub seb yuav pib li cas.
6. Vim li cas tseem ceeb rau peb thov Vajtswv pab peb nrhiav cov uas xav kawm?
6 Thov Vajtswv: Nco ntsoov tias yog peb thov Vajtswv nws yuav pab peb. (Yknp. 5:16) Yehauvas cog lus tias nws yuav mloog peb tej lus thov, yog tias peb thov raws li nws lub siab nyiam. (1Yh. 5:14) Ib tug kwvtij uas tsis khoom hlo li, tau thov kom Yehauvas pab nws nrhiav ib tug uas xav kawm Vajlugkub. Nws tus pojniam txhawj tsam nws ho tsis muaj sijhawm qhia thiab pab ib tug uas muaj kev nyuaj siab ntau yam. Tus pojniam thiaj qhia tej uas nws txhawj xeeb txog tibsi rau Yehauvas, thiab thov kom Yehauvas pab nws tus txiv nrhiav tau ib tug uas xav kawm. Ob lub lim tiam tom qab xwb, Yehauvas teb raws li nkawd tej lus thov. Muaj ib tug tho kev hauv lub koom txoos txawm hais rau tus kwvtij tias, nws ntsib ib tug txivneej uas xav kawm Vajlugkub, seb tus kwvtij puas xav mus qhia. Thaum kawg tus pojniam sau tias: “Nej cov uas txhawj tsam tsis muaj sijhawm qhia thiab pab ib tug uas kawm tshiab, cia li rau siab ntso thov Yehauvas. Kuv tus txiv wb zoo siab tshaj plaws li uas wb tau qhia Vajlugkub rau ib tug uas xav kawm.” Yog tias koj kub siab lug nrhiav, koj yeej yuav ntsib cov uas xav kawm Vajlugkub, thiab yuav pab tau lwm tus los taug txojkev uas “coj mus txog txojsia.”—Mth. 7:13, 14.