Tej Uas Pab Kom Peb Txawj Ua Vajtswv Tes Num—Siv Lub Tswb Raj Zab (Intercom) Qhia Vajlugkub

Vim Li Cas Ho Tseem Ceeb: Hauv tej lub tebchaws muaj tej koog tsev uas cov kwvtij nkag tsis tau mus qhia Vajlugkub. Tiamsis muaj tej tswb ntawm qhov rooj lossis ntawm rooj loog uas txuas raj zab mus rau txhua yim. Cov kwvtij mam li siv cov tswb raj zab no los qhia Vajlugkub. Yeej tsis yoojyim qhia Vajlugkub li no, kuj txaus ntshai thiab. Txawm li ntawd los, tsis txhob cia qhov ntawd ua rau qhov uas peb kub siab ua Vajtswv tes haujlwm tsuag. Nco ntsoov tias yog peb tsis siv tswb raj zab thaum peb mus tshaj tawm txoj xov zoo ces muaj ib txhia peb yuav tsis ntsib li. (Loos 10:14) Xyaum li cov qauv nram no:

Yuav Tham Li Cas:

Npaj thawj ob peb lo lus kom zoo. Muab cov lus ntawd sau cia es koj thiaj tau nyeem hauv tswb raj zab rau tus tswv tsev. Yog koj ua li no, koj yuav tsis ntshai. Thaum koj nrog tus tswv tsev tham, xub qhia rau nws tias koj tuaj ua dabtsi. Tuav nws lub npe hu nws yog koj pom tshwm ntawm qhov chaw uas qhia npe. Ua ntej koj mus, qhia rau nws tias koj xav nqa ib daim ntawv tseb lossis ib Phau Tsom Faj, uas qhia txog tej uas neb tau tham, mus rau nws lossis muab tso rau ntawm nws qhov rooj.
Txhob ntshai. Hais lus luag ntxhi li koj nrog nws tham tim ntsej tim muag.
Ua siab tus yees, tham li koj niaj zaus tham. Hais lus kom nrov thiab meej. Txhob lam tau lam nres ntev ntev, tiamsis tsis txhob hais lus nrawm nrawm thiab.
Peb yuav tsum paub cai. Nyob rau tej lub tsev loj thiab siab uas muaj ntau yim nyob, tej zaum yuav muaj ntau lub tswb raj zab uas yog ib yig ib lub. Txawm muaj coob yig los, ib zaug twg zoo rau koj nrog ob peb yig tham xwb thiab muab cov ntawd sau cia xwv lwm zaus koj rov mus koj thiaj paub tias yim twg koj tsis tau nrog tham. Tsis zoo rau peb nyob ntev ntev ntawm rooj vag, tsam lwm tus pom ces lawv ho ntshai.

Xyaum Li No Rau Lub Hli No:

Xyaum zaj no rau hmo tsev neeg pe hawm Vajtswv ua ke, hais kom cov uas xyaum nyias tig nyias mus ib sab li tham hauv tswb raj zab.