Koj Yuav Ua Li Cas Thiaj Tau Nyob Hauv Lub Qab Ntuj Tshiab?

Zaj peb kawm tas los no qhia tias Vajtswv yuav muab lub qab ntuj phem nrog rau txhua yam teeb meem rhuav tshem mus. Vim li cas peb thiaj tso siab tau tias yeej yuav muaj li no? Vim Vajtswv twb hais tseg hauv phau Vajlugkub lawm tias:

“Txhua yam hauv ntiajteb uas neeg ntshaw tabtom yuav dua mus.”—1 YAUHAS 2:17.

Txawm li los ib txhia yuav dim vim nqe no hais ntxiv tias:

‘Tus uas ua raws li Vajtswv lub siab nyiam yuav nyob mus ib txhis.’

Yog tias peb xav nyob mus ib txhis peb yuav tsum ua raws li Vajtswv lub siab nyiam. Tiamsis yuav kom peb paub ua raws li Vajtswv lub siab nyiam peb yuav tsum xub paub nws zoo tso.

PAUB VAJTSWV ZOO KOJ THIAJ DIM

Cov duab: 1. Ib tug pojniam ua haujlwm hauv tsev kho mob sab heev thiab nyuaj siab txog ntau yam. 2. Thaum nws noj su nws pom tus pojniam uas nrog nws ua haujlwm zaum luag ntxhi nyeem ib phau ntawv. 3. Tus pojniam uas nrog nws ua haujlwm nyeem ib nqe Vajlugkub rau nws thiab muab daim ntawv tiv tauj rau nws.

Yexus hais tias: ‘Txojsia ntev dhawv mus ib txhis yog qhov uas lawv paub hais tias koj tib leeg thiaj yog Vajtswv thiab paub Yexus Khetos.’ (Yauhas 17:3) Yuav kom peb nyob tau mus ib txhis peb yuav tsum paub Vajtswv zoo. Qhov uas paub Vajtswv zoo tsis yog qhov uas peb lees tias muaj nws lossis paub mentsis txog nws xwb. Peb yuav tsum muaj ib txojkev sib raug zoo nrog nws. Zoo ib yam li thaum peb ntaus phoojywg nrog ib tug twg, peb yeej siv sijhawm nrog tus ntawd ua ke peb txojkev phoojywg thiaj loj hlob. Ntaus phoojywg nrog Vajtswv los tib yam nkaus. Cia peb mus kawm ob peb yam hauv phau Vajlugkub uas yuav pab tau peb ntaus phoojywg nrog Vajtswv.

Qhov Tseeb Uas Peb Kawm Tau Hauv Phau Vajlugkub

Vajtswv xav kom peb nyob hauv lub Vaj Kaj Siab.

Vajtswv tsim tau Adas thiab Evas uas yog thawj nkawm niam txiv thiab muab nkawd tso rau hauv ib lub vaj zoo zoo nkauj hu ua Edees. Nkawd zoo tiav log thiab Vajtswv pub txhua yam rau nkawd kom nkawd muaj kev zoo siab puv npo. Tsuav nkawd mloog Vajtswv lus xwb ces nkawd yeej nyob tau mus ib txhis. Tiamsis nkawd tsis kam ua li Vajtswv hais.

Vim li cas peb thiaj raug kev txom nyem?

Phau Vajlugkub qhia tias: “Twb yog vim ib tug xub ua txhaum, neeg ntiajteb txhua tus thiaj ua txhaum.” (Loos 5:12) Adas tsis mloog Vajtswv lus nws thiaj plam txojsia nyob mus ib txhis thiab ua rau noob neej raug kev ploj kev tuag. Qhov no zoo ib yam li thaum ob niam txiv muaj mob es yug tau cov menyuam muaj mob.

Vajtswv twb ua li cas los pab peb lawm?

Phau Vajlugkub hais tias: ‘Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ib txhis.’ (Yauhas 3:16) Vajtswv txib Yexus los tuag txhiv peb kom peb tau txojsia. Ib tug txiv neej Idias hu ua Planpakhas (Prabhakar) uas muaj 86 xyoo tau hais tias: “Qhov uas Yehauvasa tau ua qhia tias nws hlub kuv kawg li. Twb yog vim txojkev hlub no, kuv thiaj muaj txojkev cia siab nyob mus ib txhis.”

Peb yeej qhia tau rau Vajtswv tias peb ris nws txiaj ntsig.

Phau Vajlugkub hais tias yog peb “ua raws li Vajtswv tej lus qhia” ces twb yog peb ris nws txiaj ntsig. (1 Yauhas 2:3) Vajtswv Yehauvas yeej ua tib zoo qhia peb seb yuav ua li cas peb thiaj muaj taus kev zoo siab tamsim no. (Yaxayas 48:17, 18) Nws tsis xav kom peb raug kev txom nyem. Yog peb ua raws li nws sam hwm peb yuav muaj kev zoo siab tamsim no thiab yuav tau nyob mus ib txhis.

NYEEM VAJTSWV TXOJLUS TXHUA TXHUA HNUB

Thaum tus pojniam ntawd noj su nws nyeem phau Vajlugkub thiab tsa muag ntsia saum ntuj. — Yog koj thov Vajtswv pab koj ua raws li nws lub siab nyiam ces koj yeej yuav dim thaum hnub kawg los txog

Peb yeej yuav tsum niaj hnub noj mov peb thiaj tsis tuag. Tiamsis Yexus hais tias: “Tsis yog mov xwb thiaj cawm tau neeg txojsia, tiamsis yog Vajtswv tej lus txhua lo thiaj cawm tau.”—Mathais 4:4.

Vajtswv tau muab nws cov lus sau rau hauv phau Vajlugkub. Yog peb muab coj los ua tib zoo nyeem peb yuav paub txog tej uas Vajtswv ua yav tas los, tej uas nws tabtom ua thiab tej uas nws tseem yuav ua rau lawm yav tom ntej.

THOV VAJTSWV PAB

Yog tias peb xav ua li Vajtswv hais tiamsis tseem tshuav qee yam peb hloov tsis tau, peb yuav ua li cas? Peb yuav tsum paub Vajtswv zoo peb thiaj li hloov tau.

Muaj ib tug pojniam hu ua Xakula (Sakura).b Nws nyiam kev plees kev yis heev tiamsis thaum nws pib kawm Vajlugkub thiab pom tias Vajtswv hais kom “txhob ua kev nkauj kev nraug” nws thiaj thov Vajtswv pub dag zog rau nws tso tej kev phem ntawd tseg. (1 Kauleethaus 6:18) Txawm li ntawd los nws yuav tau tawm tsam nws lub siab thiab. Nws thiaj hais tias: “Yog kuv pib xav txog kev plees kev yis, kuv yeej qhia kiag rau Yehauvas tias yog tsis muaj nws pab ces kuv yeej kov tsis yeej. Kev thov Vajtswv pab tau kuv nyob ze Yehauvas.” Zoo ib yam li Xakula, coob leej ntau tus kuj los paub Vajtswv lawm thiab. Vajtswv yeej pub dag pub zog rau lawv kom lawv hloov tau lawv lub neej los ua haum nws siab.—Filipis 4:13.

Thaum koj los paub Vajtswv zoo lawm, nws yuav suav tias koj yog nws ib tug phoojywg zoo. (Phau Ntawv Nkauj 25:14; Kalatias 4:9) Thaum ntawd koj thiaj yuav tau mus nyob hauv Vajtswv lub qab ntuj tshiab. Ua li, lub qab ntuj tshiab yuav zoo li cas? Zaj tom ntej yuav piav ntxiv txog qhov no.

a Phau Vajlugkub qhia tias Vajtswv lub npe hu ua Yehauvas.

b Tau muab lub npe no hloov lawm.