Dabtsi Thiaj Yuav Ua Rau Peb Nyob Tso Siab Plhuav?

Raws li peb tham tas los lawm tibneeg ua ntau tsav ntau yam kom lawv tau lub neej zoo rau yav tom ntej xws li saib hmoov, kawm ntawv qib siab, khwv nyiaj khwv txiaj thiab xyaum ua ib tug neeg zoo. Tiamsis qhov tseeb tiag tej no pab tsis tau peb nyob tso siab plhuav. Yog li dabtsi thiaj yuav pab tau peb?

IB TXOJ HAU KEV UAS ZOO TSHAJ LWM TXOJ

Ua ntej peb yuav txiav txim siab ua ib yam dabtsi peb yeej xub mus cuag cov uas laus dua peb thiab paub tshaj peb. Ib yam li ntawd zoo rau peb mus nrhiav kev pab ntawm ib tug uas laus thiab txawj dua peb. Muaj ib tug uas laus tshaj thiab muaj tswvyim tshaj tau sau ib co lus nyiaj lus kub los pab peb ua neej. Nws cov lus nyob hauv phau Vajlugkub uas twb sau ntev li 3,500 xyoo los lawm.

Vim li cas peb thiaj tso siab tau rau phau Vajlugkub? Vim tias phau Vajlugkub los ntawm tus uas muaj tswvyim tshaj plaws hauv lub qab ntuj khwb no. Nws yog tus uas ib txwm muaj nyob los thiab yuav nyob mus ib txhiab ib txhis. (Daniyees 7:9, TT; Phau Ntawv Nkauj 90:2) Nws yog tus tsim kom muaj lub ntuj lub teb. (Yaxayas 45:18) Thiab nws qhia rau peb tias nws lub npe hu ua Yehauvas.—Phau Ntawv Nkauj 83:18, TT.

Tus uas tsim kom muaj phau Vajlugkub yog tus uas tsim kom muaj txhua haiv neeg. Yog li ntawd nws tsis xaiv leejtwg ntsej muag. Tej uas nws qhia yeej pab tau txhua haiv neeg. Tibneeg tseem muab nws txojlus txhais ua ntau yam lus, muab luam thiab tseb tawm kom txhua haiv neeg tau nyeem.a Yog li no thiaj muaj tseeb raws li Tes Haujlwm 10:34, 35 hais:

‛Vajtswv tsis xaiv leejtwg ntsej muag. Txawm yog haiv neeg twg los xij, Vajtswv lees yuav txhua tus uas hwm Vajtswv thiab ua haum Vajtswv siab.’—TES HAUJLWM 10:34, 35.

Zoo ib yam li leej niam leej txi uas hlub nkawd cov menyuam thiab tos tsis nyoo yuav pab lawv, Yehauvas kuj zoo li leej txi uas xav muab nws txojlus los pab peb txhua tus thiab. (2 Timautes 3:16) Peb yeej tso siab tau rau nws vim nws yog tus muab txojsia rau peb. Nws paub tias dabtsi thiaj yuav ua rau peb nyob kaj siab lug.

PEB YEEJ TSO SIAB TAU RAU PHAU VAJLUGKUB

Peb tso siab tau rau phau Vajlugkub vim 2,000 xyoo dhau los phau Vajlugkub twb qhia tias tiam no tibneeg yuav coj li cas thiab yuav muaj tej yam twg tshwm sim.

PHAU VAJLUGKUB TWB QHIA LAWM TIAS

‛Ib haiv neeg yuav tawm tsam ib haiv neeg; ib lub tebchaws yuav sawv tua ib lub tebchaws, yuav muaj av qeeg loj heev, yuav muaj kev tshaib kev nqhis, thiab yuav muaj mob thoob plaws txhua qhov huv tibsi.’—LUKAS 21:10, 11.

PHAU VAJLUGKUB TWB QHIA LAWM TIAS TIBNEEG YUAV COJ LI NO

‛Koj yuav tsum nco ntsoov hais tias thaum lub sijhawm uas ntiajteb yuav kawg yuav muaj kev ntxhov siab heev. Rau qhov tej neeg nyias yuav xav txog nyias xwb, lawv yuav xav tsis txog lwm tus li. Lawv yuav ntshaw nyiaj, yuav khav theeb, yuav muab hlob, yuav tsis mloog niam txiv lus, yuav tsis ris luag txiaj ntsig, thiab yuav saib tsis taus Vajtswv txoj kevcai; lawv yuav tsis sib hlub, tsis zam txim rau lwm tus, nyiam taug xaiv, tsis tswj lawv lub siab, ua neeg tsiv tsaim thiab tsis nyiam ua zoo; lawv yuav ua neeg ntxeev siab, ua neeg siab heev, thiab lawv saib lawv tsim txiaj dua lwm tus; lawv nyiam kev lomzem heev dua nyiam Vajtswv.’—2 TIMAUTES 3:1-4.

Thaum koj pom tias tej uas phau Vajlugkub qhia muaj tseeb tiag koj ho xav li cas xwb? Tej zaum koj yuav xav li tus txivneej hu ua Lus-ees (Leung) uas nyob Hooj Koo thiab. Nws tau hais tias: “Tej uas phau Vajlugkub hais ntev ntev los lawm yeej muaj raws nkaus li tau hais tseg. Tsis muaj ib tug neeg twg uas yuav pom yav tom hauv ntej tseeb npaum li phau Vajlugkub. Yog li, phau Vajlugkub yuav tsum yog los ntawm ib tug uas muaj tswvyim tshaj tibneeg.”

Phau Vajlugkub qhia txog ntau zaj lus faj lem uas twb muaj tiav lawm.b Tos li ntawd Vajtswv Yehauvas thiaj hais tias, ‘Tsis muaj lwm tus zoo li kuv. Thaum chiv keeb kuv twb yeej qhia zaj uas yuav tshwm sim los’ lawm. (Yaxayas 46:9, 10) Yog li koj yeej tso siab tau rau tej uas phau Vajlugkub qhia txog yav tom hauv ntej.

PHAU VAJLUGKUB PAB TAU PEB TAMSIM NO THIAB MUS IB TXHIS

Yog koj ua raws li phau Vajlugkub qhia yuav pab tau koj lub neej. Saib seb phau Vajlugkub qhia li cas.

KEV KHWV NOJ KHWV HAUS THIAB NYIAJ TXIAG

‛Qhov uas yus muaj kev kaj siab mentsis zoo dua li yus ob txhais tes ua haujlwm txhua lub sijhawm. Tej ntawd tsuas zoo ib yam li caum cua xwb.’—TEJ LUS QHIA 4:6.

KEV PAB RAU LUB CUAB LUB YIG

“Txhua tus txiv, nyias yuav tsum hlub nyias tus pojniam ib yam li nyias hlub nyias lub cev. Thiab txhua tus pojniam nyias yuav tsum hwm nyias tus txiv.”—EFEXUS 5:33.

KEV SIB HAUM XEEB

‛Cia li tswj koj txojkev chim thiab tso koj txojkev npau taws tseg. Tsis txhob ntxhov siab tsam ces muaj ua phem lawm xwb.’—PHAU NTAWV NKAUJ 37:8, TT.

Yog koj ua raws li phau Vajlugkub qhia koj yuav nyob kaj siab lug tamsim no thiab rau lawm yav tom ntej. Vajtswv Txojlus qhia tias yav tom ntej yuav muaj li no

NYOB TIAJ NYOB TUS NYOB TSO SIAB PLHUAV

‛Cov neeg txo hwjchim yuav muaj teb muaj chaw, muaj kev thaj yeeb thiab kev tau zoo nyob kaj siab lug.’—PHAU NTAWV NKAUJ 37:11.

YUAV MUAJ VAJ MUAJ TSE MUAJ NOJ MUAJ HAUS

“Lawv yuav ua vaj tse thiab tau nyob rau hauv, lawv yuav cog vaj txiv hmab thiab tau noj tej txiv ntawd.”—YAXAYAS 65:21, TT.

TSIS MUAJ KEV MOB KEV NKEEG KEV PLOJ KEV TUAG

“Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm.”—TSHWMSIM 21:4.

Koj yuav ua li cas thiaj tau lub neej nyob tso siab plhuav li no? Zaj tom ntej mam qhia ntxiv.

a Yog xav paub seb tau muab phau Vajlugkub txhais li cas thiab tau muab xa li cas mus rau tibneeg nyeem mus rau www.pr418.com/hmn thiab nias ntu VAJLUGKUB TEJ LUS QHIA > PHAU VAJLUGKUB TEJ KEEB KWM.

b Yog xav paub ntxiv mus saib phau ntawv Askiv The Bible—God’s Word or Man’s? hauv tshooj 9 uas Yehauvas Cov Timkhawv luam tawm. Phau ntawv no nyob hauv www.pr418.com. Mus rau LIBRARY > BOOKS & BROCHURES.