Peb Yeej Kov Yeej Tau Kev Ntxub Ntxaug!
Puas tau muaj lwm tus ntxub koj dua li?
Txawm tsis tau muaj leej twg ntxub koj los koj yeej pom dua lwm tus sib ntxub lawm. Peb yeej tau hnov tej xov xwm qhia txog ib haiv neeg ntxub ib haiv neeg, ib leeg saib tsis taus ib leeg vim nws yog poj niam los sis txiv neej. Yog vim li no, nom tswv thiaj tsa ntau txoj cai los tiv thaiv kev ntxub ntxaug.
Ib tug uas raug luag ntxub yuav ntxub lwm leej lwm tus thiab. Tsis tas li ntawd, nws yuav ua phem pauj phem ces txoj kev sib ntxub tsuas yuav muaj kis ib tug mus rau ib tug lawm xwb.
Tej zaum twb muaj tej tug saib tsis taus, thuam, hem, xav phem txog koj thiab koj haiv neeg, los sis ua lwm yam uas lim hiam tshaj no rau koj lawm. Txoj kev ntxub no kuj ua rau tej tug txhob txwm thab plaub, tsoo vaj tsoo tsev, ntaus neeg, tua neeg los sis muab lwm tus yuam deev.
Phau no yuav qhia seb peb yuav ua li cas thiaj kov yeej kev ntxub ntxaug thiab yuav piav txog 3 yam no:
Vim li cas thiaj muaj kev ntxub ntxaug puv ntia?
Yuav ua li cas ib leeg thiaj tsis ntxub ib leeg?
Puas muaj ib hnub txoj kev ntxub ntxaug yuav dua mus?