Vim Li Cas Ib Leeg Thiaj Ntxub Ib Leeg?

Kev Sib Ntxub Yog Li Cas?

Kev ntxub yog thaum yus tsis nyiam los sis xav ua phem rau ib tug los sis ib pab ib pawg twg. Yog ib txoj kev xav phem uas nyob rawv hauv yus nruab siab tsis ploj li.

VIM LI CAS IB TUG THIAJ PIB NTXUB IB TUG

Yeej muaj ntau yam uas ua rau tib neeg sib ntxub. Tej thaud ib tug twb tsis tau ua li cas los lwm tus cia li ntxub nws, vim nws yog nws ib pab ib pawg los sis ib haiv neeg. Lwm tus xav tias nws yog neeg phem, tsuas tuav hauv ua phem rau luag xwb, thiab yeej hloov tsis tau los ua neeg zoo li. Tsis tas li ntawd luag yuav saib tsis taus nws thiab xav tias, yog muaj nws ces yuav muaj teeb meem xwb. Tus uas raug luag ntxub li no tej zaum twb ntsib kev tsim txom, kev tsis ncaj ncees, los sis raug lwm yam xwm txheej uas ua rau nws pib muaj lub siab ntxub luag lawm thiab.

KEV SIB NTXUB SIB KIS LI CAS

Tej zaum peb twb tsis tau ntsib ib tug, tiam sis peb tsev neeg los sis tej phooj ywg tsis nyiam nws xwb ces peb cia li nrog lawv ntxub nws li lawm. Tib ntsais muag xwb, ib tug ua tau rau txhua tus muaj kev sib ntxub.

Thaum peb to taub tias kev sib ntxub muaj peev xwm ua tau li cas rau tib neeg lawd, peb thiaj yuav nkag siab tias vim li cas tib neeg sib ntxub ua luaj. Dua li ntawd, kuj zoo rau peb paub tias kev sib ntxub pib li cas los. Cia peb mus kawm seb phau Vajlugkub qhia li cas txog qhov no.

KEV NTXUB CHIV QHOV TWG LOS

THAUM PIB TIB NEEG YEEJ TSIS SIB NTXUB. Txoj kev sib ntxub pib thaum ib tug tub txib saum ntuj tawm tsam Vajtswv. Vim li ntawd, nws thiaj tau lub npe Xatas los sis Ntxwg Nyoog. “Nws yog tus tua neeg thaum chiv keeb,” thawj thawj tug uas dag thiab “yog txhua tus uas dag leej txiv.” (Yauhas 8:44; 1 Yauhas 3:11, 12) Nws txhob kom muaj kev sib ntxub thiab kev ua nruj ua tsiv. Phau Vajlugkub qhia ntxiv tias Xatas lub siab nyoos, siab luv, thiab nyaum heev.​—Yauj 2:7; Tshwmsim 12:9, 12, 17.

KEV TXHAUM UA RAU PEB SIB NTXUB. Thawj tug txiv neej hu ua Adas taug kiag Xatas tus hneev taw. Yog li no, txhua tus thiaj muaj kev txhaum thiab zoo tsis tiav. (Loos 5:12) Adas thawj tug tub Ka-ees ntxub nws tus kwv Anpees, nws thiaj muab Anpees tua. (1 Yauhas 3:12) Yeej muaj tseeb tias tib neeg feem coob muaj kev hlub. Tiam sis vim peb txhua tus yog neeg txhaum peb lub siab yuav txw kom peb xav txog peb tus kheej, khib lwm tus thiab ua neeg khav theeb. Thaum peb coj li no, peb yuav pib ntxub lwm tus.​—2 Timautes 3:1-5.

LUB SIAB NQAIM UA RAU PEB NTXUB LUAG. Vim ‛lub ntiaj teb huv si nyob hauv tus phem qab hwj chim’ tib neeg thiaj tsis paub sib zam thiab sib ntxub ua luaj. (1 Yauhas 5:19) Tos li ntawd tib neeg thiaj xaiv ntsej xaiv muag, thuam lwm tus, thab plaub, coj nqaim, hlawv thiab tsoo vaj tsoo tsev.

Phau Vajlugkub tsis yog qhia tias kev ntxub ntxaug pib li cas xwb, tiam sis tseem qhia tias yuav ua li cas thiaj daws tau kev sib ntxub.