YUAV UA CAS THIAJ KOV YEEJ KEV SIB NTXUB

2 | Txhob Ua Phem Pauj Phem

Phau Vajlugkub Qhia Tias:

Yog muaj leej twg ua phem rau nej, tsis txhob ua phem pauj. Nrog sawv daws nyob sib haum. ‘Kuv yog tus yuav ua pauj thiab kuv yog tus yuav rau txim, Yehauvas hais li ntawd.’—LOOS 12:17-19.

Nqe No Txhais Tias:

Peb yeej yuav chim thaum lwm tus ua siab peb. Txawm li los Vajtswv tsis xav kom peb pauj kua zaub ntsuab. Peb yuav tsum ua siab ntev tos nws. Thaum txog caij txog nyoog, nws yeej yuav rhuav tshem txhua txoj kev uas tsis ncaj ncees.—Phau Ntawv Nkauj 37:7, 10.

Peb Xyaum Nqe No Li Cas:

Nco ntsoov tias peb yog neeg txhaum. Yog peb ua phem pauj phem ces txoj kev sib ntxub yuav tsis paub xaus li. Yog ib tug ua rau koj chim los sis mob siab lawm, tsis txhob ua pauj. Ua siab txias txias thiab hais tej lus mos lus muag. Tej lub sij hawm zoo dua yog peb cia li zam luag xwb. (Paj Lug 19:11) Tiam sis yog muaj teeb meem loj xws li kev sib ntaus sib tua lawm ne? Thaum ntawd, peb yuav tau qhia rau tub ceev xwm paub.

Kev sib pauj yuav rov ua teeb meem rau yus

Ua li, yog peb twb ua txhua yam los daws ib qho teeb meem tiamsis daws tsis tau li nev? Peb yuav ua li cas? Tsis txhob maj pauj kev chim. Yog peb nrhiav kev los pauj kua zaub ntsuab ces yuav tsim teeb meem ntxiv xwb. Txhob cia txoj kev ntxub tswj tau koj. Peb yuav tsum tso siab rau Vajtswv ua tus daws tej teeb meem ntawd. Nws yeej yuav pab peb.—Phau Ntawv Nkauj 37:3-5.

EDEEM (ADRIÁN)—Piav Nws Lub Neej

Tso Kev Pauj Luag Tseg

Thaum Edeem yog ib tug tub hluas, nws txoj kev chim ua rau nws mus nrog luag sib ntaus tom tej. Leej twg thab nws ces nws ntaus kiag xwb. Nws hais tias, “Ntau zaus peb rho phom sib tua. Ob peb zaug lawv tua raug kuv los ntshav liab vog, pw ntawm kev tsheb tos tuag lawm xwb.”

Tiam sis thaum Edeem muaj 16 xyoo nws pib kawm Vajlugkub. Nws hais tias, “Kuv yim kawm Vajlugkub kuv yim pom tias kuv yuav tsum hloov kuv tus cwj pwm.” Edeem paub tias nws yuav tsum tso txoj kev ntxub thiab kev ua nruj ua tsiv tseg. Nqe Vajlugkub hauv Loos 12:17-19 pab tau Edeem heev. Edeem hais li no, “Thaum txog Yehauvas lub sij hawm nws yeej yuav kho txhua txoj kev uas tsis ncaj. Sij hawm dhau mus, kuv kuj tswj tau kuv lub siab uas heev heev.”

Muaj ib hmos, nws ib pab qub yeeb ncuab los muab nws ntaus thiab tus thawj coj ntawm pab ntawd nthe nqho tias, “Ntaus rov qab ma!” Edeem yeej hais kiag tias, “Thaum ntawd kuv lub siab npau dam xav ntaus lawv rov qab.” Tiam sis Edeem tsis ntaus lawv. Nws thov Yehauvas twj ywm thiab sawv mus lawm xwb.

Edeem hais ntxiv tias, “Hnub tom qab, kuv rov ntsib tus thawj coj ntawd dua tiam sis zaum no tsuas muaj nws tib leeg xwb. Kuv txoj kev chim puv npo tiam sis kuv rov thov Vajtswv pab kuv tswj kuv tus kheej. Tus thawj coj txawm ncaj nraim los rau ntawm kuv thiab hais ib los uas ua rau kuv xav tsis thoob li! Nws hais tias, ‘Thov txim peb ntaus koj nag hmo. Qhov tseeb tiag, kuv xav kawm Vajlugkub thiab coj li koj.’ Kuv zoo siab kawg uas kuv tau tswj kuv txoj kev chim. Vim kuv tswj kuv tus kheej, nws thiaj los kawm Vajlugkub lawm.”