2 | Phau Vajlugkub Txhawb Tau Peb

PHAU VAJLUGKUB HAIS TIAS: Txhua yam hauv Vajtswv Txoj Lus uas sau puag thaum ub los yog sau los qhuab qhia peb. Vajtswv Txoj Lus pab kom peb thev taus thiab txhawb tau peb lub zog, peb thiaj muaj chaw vam rau yav tom hauv ntej.—LOOS 15:4.

Nqe No Qhia Li Cas

Thaum peb xav tsis tau mus rau qhov zoo, phau Vajlugkub muaj tej ntsiab lus uas nplig thiab txhawb tau peb. Ntxiv ntawd, phau Vajlugkub cog lus tseg tias tej kev puas siab puas ntsws yuav ploj mus.

Nqe No Pab Peb Li Cas

Muaj tej tswb tsam peb yeej ntxhov siab, tiam sis cov uas muaj tus mob nyuaj siab los sis tus mob txhawj xeeb ntshai rwg, yeej nyuaj rau lawv peem ib hnub dhau ib hnub. Ua li, phau Vajlugkub pab tau li cas?

Phau Vajlugkub muaj tej lus zoo lus txhawb siab los pab kom peb txhob xav ntsoov txog qhov phem. (Filipis 4:8) Tsis tas li ntawd, kuj pab kom peb tswj tau peb txoj kev xav thiab kom peb muaj lub siab tus.—Phau Ntawv Nkauj 94:18, 19.
Phau Vajlugkub pab tau kom peb txhob xav tias peb tsis muaj nuj nqis.—Lukas 12:6, 7.
Muaj ntau nqe Vajlugkub qhia rau peb tias Vajtswv yeej to taub txog peb tej kev nyuaj siab.—Phau Ntawv Nkauj 34:18; 1 Yauhas 3:19, 20.
Phau Vajlugkub cog lus tseg tias Vajtswv yuav rhuav tshem txhua yam kev nyuaj siab ntxhov plawv. (Yaxayas 65:17; Tshwmsim 21:4) Txawm peb lub siab lub ntsws puas tsoj puas tsus los, Vajtswv tej lus cog tseg yuav ntxiv dag ntxiv zog kom peb peem mus tsis tso tseg.

Phau Vajlugkub Pab Tau Ntsexikas (Jessica)

Kuv Tus Mob Nyuaj Siab

“Thaum kuv muaj 25 xyoos, kuv ntsib ib txoj kev nyuaj siab loj heev, ces txawm cia li ua rau kuv muaj tus mob nyuaj siab. Tej yam uas kuv raug yav tas los pheej ua rau kuv ntxhov siab tas li. Cov kws kho mob pab kom kuv to taub tias, tos kuv muaj tus mob nyuaj siab los, yeeb vim yog tej uas kuv raug yav dhau los uas ua rau kuv xav tsis tau mus rau qhov zoo. Txawm kuv twb noj tshuaj pab lawm los, kuv yuav tsum nrog cov kws kho mob nyuaj siab tham los pab kom kuv xyaum xav mus rau qhov zoo.”

Phau Vajlugkub Pab Tau Kuv

“Thaum kuv nyuaj siab heev, kuv cia li muaj qhov ntshai, muaj qhov txhawj, thiab pw tsis tsaug zog. Yav tsaus ntuj, kuv lub hlwb pheej xav ub xav no tsis tsum li. Phau Ntawv Nkauj 94:19 hais tias Vajtswv nplig tau peb thaum peb muaj kev ntxhov siab. Yog li, kuv yeej muab phau Vajlugkub thiab cov nqe Vajlugkub uas kuv muab sau tseg rau hauv ib phau ntawv, tso ze ntawm kuv lub txaj pw. Yog kuv pw tsis tsaug zog, kuv muab Vajtswv Txoj Lus los nyeem kom nplig tau kuv txoj kev xav.

“Phau Vajlugkub pab kom peb muab txoj kev xav tsis zoo txog Vajtswv tshem tawm mus. Yav tas los, kuv xav tias kuv tsis muaj nuj nqis thiab tsis muaj leej twg hlub kuv li. Tiam sis thaum kuv nyeem phau Vajlugkub, kuv pom tias txoj kev xav no tsis muaj tseeb, Vajtswv yeej hlub thiab mob siab txog kuv. Yog li, kuv mam li tswj tau kuv txoj kev xav zuj zus thiab tsis cia txoj kev xav phem tswj tau kuv lawm. Kuv thiaj pom kuv ib yam li Vajtswv pom.

“Kuv tos tsis taus txog hnub uas peb yuav tsis nco txog tej yam phem uas peb raug thiab tej kev xav phem yuav ploj ntais mus. Qhov uas kuv paub tias yav tom ntej kuv yuav tsis muaj tus mob nyuaj siab li lawm, pab tau kuv ua siab ntev thev.”