Mus Dua Rau Ib Lub Koom Txoos Tshiab

Ceg Npe-ee nyob rau Fab Kis muab tau ib teg hauj lwm tshiab rau Nikaulas (Nicolas) thiab Xilis (Céline) ua. Nkawd thiaj li tau tsiv mus rau ib lub koom txoos tshiab. Nkawd hais tias: “Thaum chiv thawj wb zoo siab kawg li tiam sis tom qab no wb tshua tshua wb tej phooj ywg. Wb haj tseem tsis tau paub cov kwv tij nkauj muam hauv lub koom txoos tshiab zoo pes tsawg.”a Txawm nyuaj npaum li cas los koj yuav ua li cas koj thiaj muaj kev zoo siab thaum tsiv mus rau ib lub koom txoos tshiab? Lwm tus yuav pab koj li cas? Koj yuav txhawb lwm tus li cas thiab lwm tus yuav txhawb tau koj li cas?

PLAUB LUB HAUV PAUS NTSIAB LUS UAS PAB TAU KOJ

1. Cia siab rau Yehauvas. (Phau Ntawv Nkauj 37:5) Nyob hauv Nyiv Pooj teb, Khaxumis (Kazumi) tus txiv tau ib txoj hauj lwm tshiab nyob rau lwm qhov. Yog li ntawd, nkawd yuav tau tso lub koom txoos uas nws twb nyob muaj li 20 xyoo lawm tseg. Nws yuav cia nws “txojkev rau [Yehauvas] coj” li cas? Nws hais tias: “Kuv phua siab hlo qhia ib puas tsav yam rau Yehauvas paub tias kuv kho siab thiab ntxhov siab npaum li cas. Txhua zaus kuv qhia rau nws mas nws yeej cuab kuv lub zog.”

Yuav ua li cas koj thiaj yuav cia siab rau Yehauvas? Zoo li ib tsob nroj yuav tsum muaj dej ywg thiab muaj chiv hauv av thiaj hlob taus, peb txoj kev ntseeg los yuav tsum tau ib yam li ntawd. Nikaulas xav txog Anplahas, Yexus, thiab Povlauj lawv cov yam ntxwv uas lawv tau tso tseg qho yam kom thiaj ua tau Yehauvas tes hauj lwm. Qhov no pab tau kom Nikaulas tso siab plhuav tias Yehauvas yuav pab nws ib yam nkaus. Yog tias koj kawm Vajlugkub tsis so ces yuav pab tau kom koj thev taus tej yam txawv txav hauv koj lub neej thiab koj yuav kawm tau tej yam tshiab los mus txhawb koj lub koom txoos uas koj tab tom mus tshiab ntawd.

2. Tsis txhob muab lub koom txoos qub thiab lub tshiab sib piv. (Tej Lus Qhia 7:10) Thaum Ntsus (Jules) ntawm teb chaws Npe-nis (Benin) mus nyob teb chaws Yunaithim Xatej (United States), nws xam pom tias tib neeg txoj kev xav txawv dua. Nws hais tias: “Kuv xav tias kuv yuav tau qhia txhua tus tib neeg uas kuv ntsib txog kuv lub neej.” Yog li ntawd, nws thiaj li tsis tshua nrog cov nyob hauv lub koom txoos ua ke lawm. Ntev mus ntev tuaj nws mam li paub cov kwv tij nkauj muam hauv lub koom txoos zoo zuj zus ces nws thiaj tsis xav li ntawd lawm. Nws hais tias: “Tam sim no kuv paub tias nyob thoob plaws ntiaj teb no tib neeg yeej coj zoo tib yam nkaus xwb. Tsuas yog lawv hais lus thiab coj sis zog xwb.” Yog li ntawd, tsis txhob muab lub koom txoos qub thiab lub tshiab coj los sib piv. Muaj ib tug tho kev hu ua Analis (Anne-Lise) hais tias, “Kuv tsiv vim kuv xav kawm thiab paub tej yam tshiab.”

Cov txwj laus yuav tau tsis txhob muab lub koom txoos qub piv rau lub tshiab. Yog cov kwv tij ua tej yam txawv dua koj lub qub koom txoos, qhov no tsis tau qhia tias lawv ua tsis yog lawm. Ua ntej koj yuav ua ib yam twg, koj yuav tsum paub vim li cas lawv ho ua li ntawd. (Tej Lus Qhia 3:1, 7) Yeej zoo dua rau koj ua yam ntxwv qhia cov kwv tij dua li yuam kom lawv mloog koj hais.​—2 Kauleethaus 1:24.

3. Kub siab lug ua hauj lwm hauv lub koom txoos. (Filipis 1:27) Txawm tias koj tsiv los txog ua rau koj sab thiab lim npaum twg los zoo rau koj mus koom lub koom txoos tshiab sai li sai tau. Yog tias mus tau, zoo rau koj mus tim ntsej tim muag. Cov kwv tij nkauj muam hauv lub koom txoos tshiab los yuav tau pom koj tuaj tas zog, lawv thiaj swm, ncawg thiab pab tau koj. Luxidas (Lucinda) thiab nws ob tug ntxhais tsiv mus nyob rau ib lub nroog loj hauv Afika Qab Teb. Nws hais tias: “Kuv cov phooj ywg txhob kom kuv mus ntaus phooj ywg nrog cov uas nyob hauv lub koom txoos tshiab, yaum lwm tus mus qhia Vajlugkub, thiab teb thaum mus kev sib txoos. Peb kuj hais rau cov kwv tij paub tias lawv siv tau peb lub tsev sib ntsib mus qhia Vajlugkub.”

Yog peb “koom tau ib lub siab ua tib txog hauj lwm” nrog cov kwv tij nkauj muam hauv peb lub koom txoos tshiab ces peb “ib leeg txhawb ib leeg ntseeg txoj xov zoo.” Cov txwj laus txhawb kom Analis nrog txhua tus mus qhia Vajlugkub ua ke. Nws hais tias: “Kuv xam pom tias ua li no ua rau kuv ncawg sawv daws sai dua.” Tsis tas li ntawd, pab tu thiab kho lub Tsev Nceeg Vaj qhia tau tias koj xam tias lub koom txoos ntawd yog koj lub. Yog koj yim pab lub koom txoos ces cov kwv tij nkauj muam yuav swm koj thiab koj yuav saib lawv tam li koj tsev neeg.

4. Zeem dua phooj ywg. (2 Kauleethaus 6:11-13) Yog tib neeg paub tias koj hlub tshua lawv ces yuav yooj yim dua rau koj nrog lawv ntaus phooj ywg. Thaum muaj kev sib txoos, tuaj kom ntxov thiab nyob kom ntev xwv koj thiaj muaj sij hawm nrog sawv daws tham. Nug kom paub lawv npe thiab cim cov tib neeg koj ntsib tej npe. Yog koj nco ntsoov lawv tej npe, ua ntsej muag luag ntxhi, thiab hais lus luag nyav ces yuav ua rau lawv ncawg koj thiab xav ua koj cov phooj ywg.

Tsis txhob lam ua txuj ua kom neeg nyiam tiam sis cia lawv paub tias koj yog ib tug neeg coj zoo li cas tiag. Luxidas hais tias, “Peb muaj phooj ywg coob heev vim peb caw lawv tuaj xyuas peb hauv tsev.”

“IB LEEG YUAV TSUM ZOO SIAB TOS TXAIS IB LEEG”

Thaum mus rau hauv ib lub Tsev Nceeg Vaj uas yus tsis paub ib tug tib neeg twg li mas yeej ua rau yus txaj muag heev. Koj yuav ua li cas thiaj pab tau cov uas nyuam qhuav tsiv los rau hauv koj lub koom txoos? Tus tub txib Povlauj hais tias: “Khetos zoo siab tos txais nej li cas, nej ib leeg yuav tsum zoo siab tos txais ib leeg li ntawd.” (Loos 15:7) Yog cov txwj laus xyaum coj ib yam li Khetos tus yam ntxwv ces yuav pab tau cov uas tsiv los tshiab heev. (Saib lub ntsiab “Yuav Tau Ua Dab Tsi Thaum Tsiv Rau Ib Lub Koom Txoos Tshiab?”) Txhua leej txhua tus, tsis hais tus laus tus hluas tus hlob tus yau yeej cog tau phooj ywg nrog cov uas nyuam qhuav tsiv los.

Qhov uas tos txais lwm tus yog caw lwm tus tuaj saib koj rau hauv vaj hauv tsev thiab seb muaj dab tsi koj pab tau. Xws li muaj ib tug muam coj tus muam uas nyuam qhuav tsiv los mus ncig xyuas zej zog thiab qhia seb yuav caij npav thiab caij tsheb nqaj li cas. Qhov nws ua li no pab tau tus muam uas nyuam qhuav tsiv los ntawd heev thiab ua rau tus muam ntawd zoo siab kawg li.

UA NTAU YAM NTXIV

Ib tug kooj txig yuav tsum plhis tawv ob peb zaug ua ntej nws muaj tis ya taus. Zoo ib yam li ntawd, thaum ib tug twg tsiv mus rau ib lub koom txoos tshiab, nws yuav tau muab nws tej kev txhawj xeeb tso pov tseg nws thiaj ua tau Yehauvas tes hauj lwm. Nikaulas thiab Xilis hais tias, “Tshais chaw yeej cob qhia ntau yam. Yuav kom swm ib co tib neeg tshiab thiab ib thaj chaw tshiab, wb yuav tau coj tus cwj pwm tshiab thiab.” Ntsis Tshalau hais tias: “Nyob rau hauv lub koom txoos tshiab no pab tau wb cov me nyuam txoj kev ntseeg kawg li. Ob peb lub hlis tom qab ntawd xwb, wb tus ntxhais kam ua yeeb yam saum sam thiaj thiab wb tus tub ua ib tug tshaj tawm uas tsis tau raus dej.”

Koj ua tau dab tsi ntxiv xwb yog hais tias koj tsiv tsis tau mus pab lwm qhov chaw xws li tej thaj tsam uas tsis muaj cov Tim Khawv coob pes tsawg? Koj kuj siv tau tej yam uas hais nyob rau hauv zaj no los pab koj lub koom txoos. Cia li tso siab plhuav rau Yehauvas es kav tsij nrog lwm tus mus tshaj tawm txoj xov zoo, nrog lwm tus sib raug zoo, los sis lauj sij hawm kom paub cov uas koj niaj hnub nrog ua ke zoo zoo. Tsis tas li ntawd, koj kuj lauj sij hawm mus pab tej tug uas nyuam qhuav tsiv los, los sis tej tug uas xav tau kev pab. Vim cov tseem Khixatias yuav tau muaj kev hlub, qhov uas koj pab lwm tus yuav ua rau koj yim huab nrog Yehauvas sib raug zoo. (Yauhas 13:35) Nco ntsoov tias tej uas koj ua “haum Vajtswv siab.”​—Henplais 13:16.

Txawm muaj tej yam nyuaj los coob leej ntau tus Khixatias yeej xam pom tias tsiv mus rau ib lub koom txoos tshiab yeej pab tau lawv. Qhov no kuj qhia tias peb ib tug twg los yeej tsiv tau mus! Analis hais tias: “Tsiv mus rau lwm lub koom txoos pab kom kuv paub lwm tus thiab.” Khaxumis xam pom tias tsiv mus rau lwm lub koom txoos “pab tau kom yus pom Yehauvas txoj kev pab uas yus ib txwm tsis tau paub.” Ntsus hais tias: “Zeem phooj ywg pab tau kom kuv tsis txhob nyob ib leeg. Qhov uas kuv swm lub koom txoos tshiab ua rau kuv tsis xav ncaim mus rau qhov twg li.”