Yuav Ua Li Cas Thiaj Muaj Taus Lub Siab Tus Txawm Muaj Kev Tsov Kev Rog?
Lis uas tau ua ib tug tub rog yav tas los hais li no tias, “Ua ntej kuv kawm Vajlugkub, kuv tsis paub vim li cas tib neeg yuav phem ua luaj, vim li cas ho muaj kev tsis ncaj ncees thiab ntau yam teeb meem thoob qab ntuj. Tiam sis tom qab no, kuv kawm Vajlugkub lawd, kuv tsis txhawj xeeb txog tej yam ntawd li lawm. Rau qhov kuv paub hais tias Vajtswv Yehauvas yuav muab tej yam ntawd rhuav tshem mus.”
Lis tsis yog tib tug uas xav li ntawd xwb. Phau Vajlugkub kuj pab tau lwm cov thiab. Saib seb phau Vajlugkub ho pab tau lawv li cas.
PHAU VAJLUGKUB HAIS TIAS: “Koj [uas yog Vajtswv Yehauvas] yeej ua zoo rau peb thiab zam peb lub txim.”—Phau Ntawv Nkauj 86:5.
NQE NO PAB TAU LEEJ TWG: Vimaj uas nyob teb chaws Khauloonpia hais tias, “Nqe no pab kuv pom tias Vajtswv Yehauvas muaj kev khuv leej thiab nws kam zam kuv lub txim, txawm tias kuv tau mus ua dua tsov rog los lawm.”
PHAU VAJLUGKUB HAIS TIAS: ‘Kuv yuav tsim dua lub ntuj tshiab thiab lub ntiaj teb tshiab. Nej yuav tsis nco txog tej uas twb muaj tas los lawm.’—Yaxayas 65:17.
NQE NO PAB TAU LEEJ TWG: Xafilas uas nyob teb chaws U.S.A. hais tias, “Thaum kuv mus ua tsov rog rov qab los txog tsev, ua rau kuv muaj tus mob nyuaj siab thiab puas siab puas ntsws. Tiam sis nqe no pab kom kuv nco ntsoov tias tsis ntev tom ntej no xwb tej yam uas kuv tau ntsib thaum kuv mus ua tsov rog, Yehauvas yuav muab tshem huv tib si mus. Lub sij hawm ntawd yuav zoo tshaj plaws li.”
PHAU VAJLUGKUB HAIS TIAS: ‘Thov kom tej kev ncaj ncees muaj nyob rau nws tiam, thiab thov kom muaj kev vam meej mus tsis tu ib yam li lub hli ci pom kev.’—Phau Ntawv Nkauj 72:7.
NQE NO PAB TAU LEEJ TWG: Aulexadia uas nyob teb chaws Yus Khees hais tias, “Nqe no yeej nyob rawv hauv kuv lub siab, vim tias tsis ntev tom ntej no xwb, yuav tsis muaj kev ua tsov ua rog li lawm. Thiab peb yuav tsis txhawj tias nyob tsam yuav muaj tej yam phem los raug cov uas peb hlub.”
PHAU VAJLUGKUB HAIS TIAS: ‘Peb cov neeg uas tuag lawm yuav rov muaj sia dua! Cov neeg uas pw hauv tej qhov ntxa yuav sawv los hu nkauj zoo siab.’—Yaxayas 26:19.
NQE NO PAB TAU LEEJ TWG: Maiv Liag uas nyob teb chaws Lavadam hais tias, “Thaum muaj lwm haiv neeg tuaj tua kom kuv haiv neeg tu noob nrho, kuv tsev neeg twb yuav luag tu noob thiab. Tiam sis nqe Vajlugkub no txhawb tau kuv lub zog heev kawg li, vim kuv paub hais tias muaj ib hnub kuv yeej yuav rov qab pom cov uas raug tua sawv rov los. Kuv tos tsis taus txog hnub ntawd es kuv yuav rov hnov lawv tej suab luag ntxhi.”
PHAU VAJLUGKUB HAIS TIAS: ‘Cov neeg siab phem yuav puas tsuaj mus. Tiam sis cov neeg txo hwj chim yuav muaj teb muaj chaw, muaj kev thaj yeeb thiab kev tau zoo nyob kaj siab lug.’—Phau Ntawv Nkauj 37:10, 11.
NQE NO PAB TAU LEEJ TWG: Ntaj uas nyob teb chaws Thatsikaxatees hais tias, “Tab txawm kev tsov kev rog twb xaus lawm los, yeej tseem muaj kev tsis ncaj ncees quj qees thiab tib neeg lub siab haj tseem phem heev. Tiam sis nqe Vajlugkub no pab kuv nco ntsoov tias Vajtswv Yehauvas pom txhua yam thiab paub tias kuv tau raug li cas. Nws cog lus tias tsis ntev xwb, yuav tsis muaj kev txom nyem li lawm.”
Cov uas tau hais tas los no tsuas yog ob peb leeg ntawm ntau leej uas yog Yehauvas Cov Tim Khawv xwb. Phau Vajlugkub tau pab lawv kom lawv rov muaj lub siab tus. Thiab kuj pab kom lawv txhob muaj kev ntxub thiab kev chim rau lwm haiv neeg. (Efexus 4:31, 32) Yehauvas Cov Tim Khawv tsis xaiv ib rooj nom tswv twg tog li. (Yauhas 18:36) Lawv kuj tsis kawm kev sib ntaus sib tua thiab.
Yehauvas Cov Tim Khawv zoo tam li ib cuab kwv tij uas nyob thoob plaws ntiaj teb. Lawv sawv daws yeej sib pab sib txhawb ib yam li ib tsev neeg. (Yauhas 13:35) Xws li thaum Aulexadia nrog nws tus niam laus khiav mus rau lwm lub teb chaws vim muaj kev tsov rog, nws hais tias, “Thaum wb hla ciam teb, wb txawm pom ib co Tim Khawv uas tuaj ntawd tos txais wb. Vim muaj lawv txoj kev pab, thiaj yooj yim zog rau wb swm ua neeg thoj nam.”
Peb caw koj tuaj koom peb tej kev sib txoos. Hauv tej kev sib txoos no, peb kawm coj li txoj xov zoo uas hais nyob hauv phau Vajlugkub. Yog xav paub seb yuav mus koom rau qhov twg mus rau hauv lub vej xaij jw.org/hmn. Yog koj xav kom Yehauvas Cov Tim Khawv ib tug tuaj qhia Vajlugkub rau koj, los mus rau hauv peb lub vej xaij no thiab. Peb qhia Vajlugkub pub dawb xwb thiab qhia nrog phau Nyob Kaj Siab Lug Mus Ib Txhis.