Kev Tsov Kev Rog Phem Heev Kawg Li
Ua neej nyob peb yeej raug ntau yam tiam sis thaum peb ntsib kiag kev tsov rog mas nws yog nws lawm ib yam. Cov tub rog thiab tej pej xeem uas tau pom kev tsov kev rog, lawv paub hais tias tej ntawd phem npaum li cas.
TUB ROG
Lis uas nyob teb chaws Askiv hais tias, “Hauv tsov rog ces kuv tsuas pom tib neeg raug mob thiab raug tua nyob pawg pes lug. Yeej tsis muaj ib zaug uas kuv dim pa tau li.”
Ib tug txiv neej hu ua Vimaj (Wilmar) uas nyob teb chaws Khauloonpia (Colombia) hais tias, “Kuv raug phom tua ntawm kuv lub nraub qaum thiab lub ntsej muag. Kuv pom coob tus raug tua tuag, tsis hais cov laus cov hluas tib si los kuj raug tua ib yam nkaus. Lub neej no cia li ua rau kuv tsis ceeb li lawm.”
Ib tug poj niam hu ua Xafilas (Zafirah) uas nyob teb chaws U.S.A. hais tias, “Thaum koj pom ib tug uas raug phom tua, qhov ntawd yeej nyob nraim hauv koj lub hlwb, tshem tsis tau li lawm. Koj yeej nco ntsoov nws lub suab quaj qw thiab suab ntsaj. Yeej tsis muaj ib hnub uas koj yuav tsis nco qab txog nws li.”
PEJ XEEM
Ib tug poj niam hu ua Aulexadia (Oleksandra) uas nyob teb chaws Yus Khees (Ukraine) hais tias, “Kuv xav tias ntshe yuav tsis muaj ib hnub uas kuv yuav rov qab muaj kev zoo siab dua li lawm. Kuv ntshai tuag kawg li tiam sis qhov kuv ntshai tshaj ces yog nyob tsam kuv tsev neeg thiab cov phooj ywg raug tua tuag.”
Ntaj uas nyob teb chaws Thatsikaxatees (Tajikistan) hais tias, “Thaum peb zov tos cov zaub mov uas lawv yuav nqa tuaj pub rau peb, peb kam tos ntev li 20 tawm txoos teev. Yeej ua rau peb ntshai kawg li, vim nyob tsam muaj tej lub mos txwv lam tau lam tua tuaj raug peb.”
Maiv Liag uas nyob teb chaws Lavadam (Rwanda) hais tias, “Thaum muaj kev tsov rog, kuv niam kuv txiv raug tua, nkawd tso kuv tseg ua ib tug me nyuam ntsuag uas tsis muaj leej twg hlub li.”
Txawm cov no tau ntsib kev nyuaj siab vim tsov rog los nim no lawv kuj muaj taus kev zoo siab lawm thiab lawv muaj kev cia siab tias ib hnub twg yuav tsis muaj kev tsov kev rog li lawm. Phau Tsom Faj no yuav muab phau Vajlugkub los piav seb yuav ua li cas thiaj muaj taus li ntawd.