Peb Raug Li Cas Thaum Muaj Kev Tsov Kev Rog
“Txij thaum Ntsuj Rog Thoob Qab Ntuj Zaum Ob, zoo li tsuas pom kev sib ntaus sib tua huaj vam ntxiv tuaj xwb. Nim no, muaj li ob txhiab plhom tus tib neeg thoob qab ntuj uas nyob rau tej teb chaws uas muaj kev sib ntaus sib tua.”
United Nations Deputy Secretary-General Amina J. Mohammed, lub 1 Hlis tim 26 xyoo 2023.
Kev tsov kev rog yuav pib thaum twg los peb yeej tsis paub li. Txawm peb tsis nyob rau tej thaj chaw uas muaj tsov rog los tej ntawd kuj raug peb thiab, vim peb pom thiab hnov txog tej ntawd saum huab saum cua. Thaum ua tsov rog tag lawm los, tseem yuav tau kho ntau yam kom thiaj rov qab nyob taus li qub. Kev tsov rog tsim tau ntau yam teeb meem xws li nram no:
Tsis muaj zaub mov txaus noj. “Vim muaj kev tsov rog, coob tus thiaj raug kev tshaib nqis. Cov tib neeg uas tsis muaj zaub mov txaus noj ces feem ntau nyob rau tej thaj chaw uas muaj tsov rog.”—World Food Programme.
Tib neeg raug mob thiab puas siab puas ntsws. Thaum yuav muaj kev tsov kev rog ces tib neeg pib ntxhov siab heev. Cov uas nyob rau tej thaj chaw uas muaj tsov rog tsis yog raug mob xwb tiam sis tom qab ntawd los lawv kuj muaj tus mob puas siab puas ntsws thiab. Ntxiv ntawd los, tej thaum tsis muaj kws kho mob txaus los pab lawv.
Tso vaj tse tseg. Txij xyoo 2023 lub 9 Hlis Ntuj, muaj tshaj li 114 plhom tus tib neeg thoob ntiaj teb yuav tsum tau khiav mus nyob rau lwm qhov vim muaj kev tsov rog.—United Nations High Commissioner for Refugees.
Tsis yooj yim khwv noj khwv haus. Thaum muaj kev tsov rog, khoom kim zuj zus tuaj. Tsis tas li ntawd xwb, vim nom tswv muab nyiaj faib mus ua rog lawm ces tsis muaj nyiaj txaus los siv rau kev kho mob thiab kev kawm ntaub kawm ntawv. Thaum ua tsov rog tag lawm los, tseem yuav siv nyiaj ntau heev los kho tej tsev uas puas tas.
Teb chaws raug puas tsuaj. Thaum kev tsov kev rog ua rau teb chaws puas tsuaj tag, ces tsis yooj yim rau tib neeg nyob. Kuj ua rau lawv muaj mob muaj nkeeg vim tej cua, tej dej, thiab tej av tsis huv lawm. Tsis tas li ntawd xwb, kuj tseem muaj tej hoob pob uas cuab tseg, yuav tawg thaum twg los tau, ua rau neeg raug mob.
Muaj tseeb tiag, kev ua tsov ua rog yeej kim heev thiab tsim tau teeb meem ntau yam.