Tib neeg ua tsis tau kom txhob muaj kev tsov rog
Yuav Ua Li Cas Thiaj Tsis Muaj Kev Tsov Kev Rog Li Lawm?
Phau Vajlugkub qhia tias Vajtswv yog tus uas yuav ‘ua rau tej kev tsov kev rog hauv ntiaj teb no tiaj tus.’—Phau Ntawv Nkauj 46:9.
VAJTSWV YUAV MUAB TEJ NOM TSWV HAUV NTIAJ TEB RHUAV TSHEM
Phau Vajlugkub qhia tias Vajtswv yuav muab tej nom tswv hauv ntiaj teb no rhuav tshem hauv ntsuj rog uas hu ua Amankedoos.a (Tshwmsim 16:16) Thaum ntawd, ‘txhua tus vaj ntxwv uas nyob hauv ntiaj teb no’ yuav tuaj sib sau ua ke ‘ua rog rau hnub tseem ceeb uas Vajtswv teem cia lawm.’ (Tshwmsim 16:14) Tom qab ntsuj rog Amankedoos, yuav tsis muaj kev tsov kev rog ib zaug ntxiv li lawm.
Thaum Vajtswv muab cov nom tswv hauv ntiaj teb no rhuav tshem tag, nws lub tseem fwv saum ntuj ceeb tsheej yuav los kav ntiaj teb. Lub tseem fwv no yog Vajtswv lub Nceeg Vaj uas yuav kav mus ib txhis. (Daniyees 2:44) Tus uas ua Vaj Ntxwv kav lub Nceeg Vaj no yog Vajtswv tus Tub Yexus Khetos. (Yaxayas 9:6, 7; Mathais 28:18) Txhua tus tib neeg yuav nyob hauv tib txoj kev kav no lawm xwb. Thaum Yexus tseem nyob hauv ntiaj teb, nws tau hais kom nws cov thwj tim thov kom lub Nceeg Vaj no los.b—Mathais 6:9, 10.
Yexus txoj kev kav yuav zoo li cas xwb? Nws yuav tsis kav li tej nom tswv hauv ntiaj teb uas lawv siv lawv lub hwj chim kav raws li lawv lub siab nyiam. Tiam sis nws yuav kav ncaj ncees. Nws yuav tsis xaiv leej twg ntsej muag, tab txawm lawv yuav yog haiv neeg twg los xij. (Yaxayas 11:3, 4) Yuav tsis muaj leej twg sawv tawm tsam nrhiav kev ncaj ncees li lawm, rau qhov Yexus yuav saib xyuas kom txhua leej txhua tus tau txais kev ncaj ncees. Nws yuav ‘cawm cov neeg pluag uas thov txog nws, thiab cov neeg txom nyem uas tsis muaj leej twg pab. Nws cawm lawv dim ntawm cov neeg lim hiam.’—Phau Ntawv Nkauj 72:12-14.
Vajtswv lub Nceeg Vaj yuav muab cov cuab yeej ua rog rhuav tshem kom tag nrho mus. (Mikhas 4:3) Cov neeg phem uas tsis kam tso kev sib ntaus sib tua tseg yuav tsis muaj chaw nyob hauv lub ntiaj teb no. (Phau Ntawv Nkauj 37:9, 10) Lub sij hawm ntawd txhua tus, tsis hais txiv neej, poj niam, thiab me nyuam tib si, yuav tau nyob kaj siab lug, tsis muaj kev txob kev ntshai li lawm.—Exekees 34:28.
Niaj hnub nim no, vim tsis muaj txaus noj txaus haus thiab tsis muaj vaj tse txaus nyob, tib neeg thiaj sawv tawm tsam thiab sib ntaus sib tua. Tiam sis Vajtswv lub Nceeg Vaj yuav muab tej no kho kom tag. Txhua leej txhua tus yuav muaj zaub mov txaus noj thiab nyias yuav muaj nyias vaj nyias tsev nyob. (Phau Ntawv Nkauj 72:16; Yaxayas 65:21-23) Thaum Vajtswv lub Nceeg Vaj los kav ntiaj teb, sawv daws yuav tau lub neej zoo tshaj plaws.
Vajtswv lub Nceeg Vaj yuav ua dab tsi ntxiv thiab? Lub Nceeg Vaj yuav ua kom tsis muaj leej twg nco txog tej kev phem kev lim hiam hauv tsov rog li lawm, vim tej ntawd yuav “ploj tas” mus. (Tshwmsim 21:4) Tej kev mob kev nkeeg uas peb raug los ntawm kev sib ntaus sib tua kuj yuav tsis muaj ntxiv. Hais txog tej kev nyuaj siab uas peb ntsib vim kev ua tsov rog los peb yuav tsis nco qab txog li lawm. Cov uas tau tas sim neej los kuj yuav raug tsa sawv rov qab los nyob hauv lub ntiaj teb no. (Yaxayas 25:8; 26:19; 35:5, 6) Tej tsev neeg uas tau sib ncaim vim kev ua tsov rog yuav tau rov qab los nyob ua ke.
VAJTSWV YUAV MUAB KEV TXHAUM TSHEM MUS
Thaum Vajtswv lub Nceeg Vaj kav ntiaj teb, txhua tus tib neeg yuav teev tiam Vajtswv Yehauvasc uas yog “tus Vajtswv uas muaj kev hlub thiab kev sib haum xeeb.” (2 Kauleethaus 13:11) Vajtswv yuav qhia lawv tias lawv yuav tau ua li cas rau li cas, lawv thiaj nyob tau ua ke kaj siab lug. (Yaxayas 2:3, 4; 11:9) Thiab cov uas mloog Vajtswv lus yuav dim plaws ntawm lub cev uas txawj ploj txawj tuag.—Loos 8:20, 21.
VAJTSWV YUAV MUAB XATAS THIAB NWS COV DAB RHUAV TSHEM HUV SI MUS
Xatas thiab nws cov dab yog cov uas tshum kom muaj kev tsov kev rog. (Tshwmsim 20:1-3, 10) Tiam sis tsis ntev tom ntej no xwb, Vajtswv lub Nceeg Vaj yuav muab lawv rhuav tshem huv si mus. Lawv yuav dag ntxias tsis tau tib neeg li lawm thiab lub ntiaj teb yuav ‘muaj kev vam meej.’—Phau Ntawv Nkauj 72:7.
Peb tso siab tau tias Vajtswv yeej yuav rhuav tshem kev tsov kev rog, vim nws muaj peev xwm ua taus li no. Nws kuj tos ntsoov lub sij hawm ntawd thiab.
Vajtswv muaj hwj chim thiab tswv yim ua kom tsis muaj kev tsov kev rog li lawm. (Yauj 9:4) Yeej tsis muaj ib yam dab tsi yuav tav tau nws txoj hau kev.—Yauj 42:2.
Vajtswv tsis nyiam kom tib neeg raug kev txom nyem. (Yaxayas 63:9) Nws kuj “ntxub cov neeg uas nyiam ua nruj ua tsiv.”—Phau Ntawv Nkauj 11:5.
Vajtswv tsis dag li thiab nws yeej ua raws li nws hais.—Yaxayas 55:10, 11; Titus 1:2.
Yav tom hauv ntej, Vajtswv yuav ua kom muaj kev thaj yeeb thoob plaws hauv qab ntuj no.
Vajtswv yog tus uas yuav muab kev tsov rog rhuav tshem
a Nyeem zaj kawm “Ntsuj Rog Amankedoos Yog Dab Tsi?” hauv jw.org/hmn.
b Saib zaj yeeb yaj kiab Vajtswv Lub Nceeg Vaj Yog Dab Tsi? hauv jw.org/hmn.
c Vajtswv lub npe hu ua Yehauvas.—Khiav Dim 3:14 cov lus hauv qab taw qhia hauv phau Txoj Moo Zoo Uas Yog Vajtswv Txojlus Phau Txhais Tshiab xyoo 2000 hais tias, “[Tus Tswv] lub npe ua lus Henplais hu ua Yaves (lossis Yehauvas).”