Ib Tsab Ntawv Los Ntawm Pab Uas Ntaus Thawj

Nyob zoo txog Yehauvas cov Timkhawv:

Peb zoo siab sau tsab ntawv no tuaj rau nej sawvdaws, uas yog Yehauvas cov tub qhe ncaj ncees. Niaj hnub no cov timkhawv coob kawg li lawm, muaj coob tshaj li xya plhom leej. Thaum koj ntsib ib tug kwvtij twg nyob txawv tebchaws, koj yeej pom tseeb tias peb sawvdaws koom ib lub siab. (Yh. 13:34, 35) Thaum koj nyeem txog koj cov kwvtij nkauj muam hauv phau ntawv Yearbook, koj yuav pom tias lawv muaj kev ntseeg thiab muab siab npuab Yehauvas npaum li cas tiag. Yuav ua rau koj hajyam muaj kev hlub rau koj cov kwvtij nkauj muam nyob txawv tebchaws.

Pom tau tias nej coob leej mob siab heev los pe hawm Vajtswv ua ib tse neeg, tsis tu ncua. Nej cov uas muaj metub menyuam, tau siv tswvyim ntau yam los qhia nej cov menyuam, lawv thiaj xav kawm Vajlugkub. (Efx. 6:4) Vim muaj kev kawm Vajlugkub ua ke txhua lub lim tiam, ntau nkawm niam txiv tau hais tias lawv hajyam muaj kev sib raug zoo ntxiv. (Efx. 5:28-33) Yog li ntawd, coob leej ntau tus, tsis hais cov uas muaj pojniam tub se, thiab tsis muaj, twb txais ntau yam koob hmoov lawm, vim lawv tshawb nrhiav Vajtswv Txojlus tshab tshab ntxaws ntxaws.​—Ys. 1:8, 9.

Cov uas raug kev txom nyem lwj siab vim muaj tej huab cua phem raug, los peb kuj nrog nej mob siab kawg li thiab. Peb xav ua cov kwvtij uas pab kho vaj kho tsev tsaug ntau, vim lawv tso ib puas tsav yam tseg mus pab ua vaj ua tsev rau cov kwvtij uas raug kev nyuaj siab. (Ttx. 11:28-30; Klt. 6:9, 10) Tsis tas li ntawd xwb, muaj nej cov kwvtij nkauj muam uas xam pom tej uas lwm tus cheem tsum hauv lub koom txoos. Ib yam li Daukha, nej “ua zoo rau luag thiab pab cov txom nyem.” (Ttx. 9:36) Yehauvas yeej pom tes haujlwm zoo uas nej ua. Nws yuav foom koob hmoov rau nej raws li nej tau pub.​—Mth. 6:3, 4.

Muaj tej lub tebchaws, nom tswv kuj lem tej ‘kab ke los ua phem’ tsim txom nej. (Nt.Nk. 94:20-22) Txawm li ntawd los, nej ua siab tawv qhawv, sawv ruaj nreeg, thiab muab Yehauvas ua nej qhov chaw nkaum. Nej ua li ntawd vim Yexus twb hais tseg ua ntej lawm tias, nws cov thwjtim yuav raug tsim txom. (Yh. 15:19, 20) Cia li rau siab ntso “piav rau txhua tus uas xav paub qhov uas nej muaj siab vam.” (1Pt. 3:13-15) Nco ntsoov tias peb yeej thov Yehauvas pab nej tsis tu ncua.

Peb qhuas nej cov uas xyaum coj lub neej dawb huv, ib xyoos tas ib xyoos tuaj. Xatas lub qab ntuj ua phem ua qias tsis tseg, thiab niaj hnub xev tswvyim los haub ntxias kom sawvdaws ua phem li nws. Txawm li ntawd los, nej cov timkhawv muaj ntau plhom leej, tseem “muaj zog rau hauv tus Tswv.” (Efx. 6:10) Nej tau “muab Vajtswv cev cuab yeej huvsi los hnav” nej thiaj “tawm tsam yeej Ntxwg Nyoog tej tswvyim phem.” (Efx. 6:11, 12) Nco ntsoov tias Yehauvas pom nej tej qauv zoo. Nws thiaj muaj lus teb Xatas tej lus nkaug!​—P.L. 27:11.

Zoo siab kawg li rau qhov xyoo 2011, muaj 19,374,737 leej tuaj ua kevcai nco txog Yexus. Vim muaj coob leej ntau tus rau npe pab tho kev rau lub Plaub Hlis Ntuj, thiaj caw tau npaum li ntawd tuaj. Yehauvas cov Timkhawv tej lus qhuas Nws twb nrov ncha mus rau ntau plhom leej thoob ntiajteb tau hnov lawm! (Loos 10:18) Lub Plaub Hlis Ntuj ntawd, muaj 2,657,377 leej rau npe ua ib tug pab tho kev. Tej zaum koj kuj yog ib tug thiab. Lossis tej zaum koj kuj siv sijhawm ntau dua mus qhia Vajlugkub lub hli ntawd. Txawm li cas los, peb txaus siab kawg li rau nej sawvdaws tes haujlwm zoo, vim nej muaj lub siab kub lug ua Vajtswv tes dej num.​—Nt.Nk. 110:3; Khx. 3:23.

Tsaib no muaj 263,131 tug tau muab lawv tus kheej cob rau Yehauvas thiab ua kevcai raus dej. Peb ua Yehauvas tsaug vim Nws tau pab cov ntawd los cuag Nws. Thiab ua nej sawvdaws tsaug, uas nej tseem niaj hnub tshaj tawm li no: “‘Cia li los.’ Cia tus uas tau hnov hais tias, ‘Cia li los.’ Tus uas nqhis cia li los, thiab tus uas xav yuav cia li txais cov dej uas pub txojsia tsis txog them nqe kiag li.” (QTsh. 22:17) Xyoo 2011, cov rooj sib txoos loj muaj ntau zaj lus qhuab qhia ntsig txog Vajtswv lub Nceeg Vaj. Tej lus qhia ntawd yeej ua rau peb zoo siab hlo qw tias, ‘Thov cia Vajtswv lub Nceeg Vaj los!’ Yexus twb hais tseg lawm tias nws “yeej yuav los sai sai no tiag tiag li.” Peb thiaj koom siab teb ib yam li Yauhas, tias: “Amee. Tswv Yexus, cia li los lauj.”​—QTsh. 22:20.

Lub caij no, nej sawvdaws yeej tos ntsoov hnub tseem ceeb ntawd, thiab nej yog cov uas hlub Vajtswv los “ntawm tes haujlwm thiab ntawm qhov tseeb”! (1 Yh. 3:18) Thov nco ntsoov tias peb hlub tshua nej txhua leej txhua tus kawg li.

Nej cov kwvtij,

Pab Uas Ntaus Thawj ntawm Yehauvas cov Timkhawv