Pab Uas Ntaus Thawj Tsab Ntawv

Nyob zoo cov tub qhe uas koom nrog peb ua haujlwm:

Peb zoo siab sau tsab ntawv no tuaj rau nej txhua leej txhua tus. Xyoo 2014 no yog ib xyoos uas tseem ceeb heev. Rau qhov xyoo no yog xyoo uas peb tus Vajntxwv Yexus Khetos sawv kav tau 100 xyoo txwm nkaus rau thaum lub xyoo yuav xaus, uas nws cov yeeb ncuab tseem muaj nyob.—Nt.Nk. 110:1, 2.

Tsaib no thaum lub 10 Hli, peb tau mus koom kev sib txoos txwm xyoo uas Watch Tower Bible and Tract Society of Pennsylvania muaj, peb tau txais phau Vajlugkub Askiv uas kho tshiab los ntawm pab New World Bible Translation Committee los. Phau Vajlugkub no yog ib phau uas txhais tau zoo tshaj txhua phau huvsi. Rau caum xyoo dhau los, Yehauvas tau siv nws cov xaiv tseg los txhais phau New World Translation qub. (Loos 8:15, 16) Vim li no phau New World Translation thiaj yog ib phau Vajlugkub uas tshwj xeeb heev.

Tau ntau xyoo los, cov uas Pab Uas Ntaus Thawj tau tsa saib xyuas kev sau ntaub sau ntawv pom tias tseem ceeb heev uas yuav tau muab phau Vajlugkub txhais ua lwm yam lus. Yog li ntawd, niaj hnub no thiaj tau muab phau New World Translation txhais ua 121 yam lus lawm. Muaj tej yam lus tau muab phau Vajlugkub txhais tas huvsi lawm, tiamsis tej yam tsuas txhais tas phau Kilis xwb. Peb xav kom nej nco Yehauvas txiaj ntsig rau phau Vajlugkub uas nej tau txais. Muab coj los nyeem thiab xav txog tej ntawd txhua hnub. Yog koj ua li no, koj yuav txav ze rau Vajtswv Yehauvas.​—Yknp. 4:8.

Peb mob siab kawg li thaum peb hnov txog cov kwvtij nkauj muam uas raug kev sim siab. Peb paub tias tej thaum lawv yuav tsis muaj lub ntsej muag luag nrog lawv cov kwvtij nkauj muam. Piv txwv, nyuam qhuav tsis ntev los no muaj ib yig uas nyob rau sab Axia raug kev nyuaj siab heev thaum leej niam tuag tes tuag taw tag. Cov kws kho mob tsis paub xyov yuav kho nws tus mob li cas. Qhov no ua rau peb tu siab kawg li. Tamsim no leej txiv niaj hnub tu leej niam xwb. Tus tub thiab ob tug ntxhais kuj hlub thiab pab lawv niam lawv txiv. Cov menyuam no ua tau ib tug qauv zoo heev rau peb xyaum. Yim uas hais no thiab nej sawvdaws cov uas raug kev sim siab, vim nej thev tej kev sim siab ntawd, nej yuav zoo siab xyiv fab. (Yknp. 1:​2-4) Yehauvas tau cog lus tias yog nws cov xaiv tseg thiab lwm pab yaj thev tej kev sim siab kam tiag, ces lawv yuav muaj kev zoo siab xyiv fab, rau qhov Yehauvas yuav pub txojsia ib txhis tsis kawg rau lawv.​—Yknp. 1:12.

Tsaib no cov uas tuaj koom ua kevcai nco txog Yexus muaj 19,241,252 leeg. Peb zoo siab tias tseem muaj coob leej nco Yehauvas thiab Yexus nkawd txiaj ntsig es tuaj koom txojkev sib txoos uas tseem ceeb tshaj rau Vajtswv cov tibneeg. Lub caij ua kevcai nco txog Yexus uas yog lub 3 Hlis thiab 4 Hlis ntawd, muaj tsheej plhom leej tau pab tho kev los qhuas Yehauvas. Tej no txhawb tau peb zog kawg li! Nej puas zoo siab tias cov uas pab tho kev mus koom tau teev uas tus kwvtij saib xyuas thaj tsam ntsib nrog cov tho kev huvsi, txawm lub hli uas tus kwvtij ntawd tuaj tsis ncaj rau lub 3 Hlis lossis 4 Hlis? Cov uas muaj kev ntseeg yeej paub tias txojkev mus tshaj tawm txoj xov zoo thiab mus koom tej kev sib txoos nrog lub koom txoos yog tej uas tseem ceeb heev. Yog peb rau siab ua Vajtswv tes num ces peb yuav nyob khov kho tsis txav txawm peb raug Ntxwg Nyoog ntxias kom poob ntawm Vajtswv Yehauvas.​—1Khl. 15:58.

Tsaib no muaj 277,344 tug tau muab lawv lub neej cob rau Yehauvas es ua kevcai raus dej los nrog lawv cov kwvtij thoob ntiajteb taug txojkev uas coj mus txog txojsia. (Mth. 7:13, 14) Peb yuav tau pab cov uas los tshiab no kom “nyob ruaj hauv txojkev ntseeg.” (Khx. 2:⁠7) Ib leeg rau siab ntso txhawb ib leeg kom thev taus mus txog thaum kawg. (Mth. 24:13) “Txhawb cov uas siab yau lub zog, pab cov uas qaug zog, thiab ua siab ntev rau txhua tus.” (1Thxk. 5:14) Thaum kawg no, peb xav kom nej txhua tus “thov Vajtswv tsis tu ncua” li no: “Thov cia koj lub [Nceeg Vaj] los.”​—1Thxk. 5:17; Mth. 6:10.

Peb xav kom nej zoo siab xyiv fab nyeem phau Yearbook rau xyoo no, thiab xav kom nej paub tias peb hlub nej txhua leej txhua tus uas hlub Yehauvas.

Nej cov kwvtij,

Pab Uas Ntaus Thawj Ntawm Yehauvas Cov Timkhawv