Muaj Sijhawm Ntxiv Rau Peb Qhuas Yehauvas
1. Lub koom haum tau npaj txojkev twg rau peb los tsa ncauj qhuas Yehauvas?
1 Lub 3 hlis dhau los no yog thawj lub hlis uas lub koom haum tau npaj ib txojkev los rau cov tshaj tawm ua tau ib tug pab tho kev qhia 30 teev rau lub 3 hlis thiab 4 hlis thiab rau lub hli uas tus saib xyuas thaj tsam tuaj xyuas lub koom txoos. Yog tus saib xyuas thaj tsam tuaj ncaj rau lub lim tiam uas 2 lub hlis los sib cob, cov tshaj tawm uas rau npe ua ib tug pab tho kev qhia 30 teev mam xaiv seb nws xav ua rau lub hli twg. Txhua tus uas ua ib tug pab tho kev mus koom tau tag nrho teev uas cov tho kev thiab cov tho kev tshwj xeeb sib txoos nrog tus saib xyuas thaj tsam. Yog li no, txawm tias peb ua tsis tau ib tug pab tho kev qhia 50 teev los, peb kuj ua tau ib tug qhia 30 teev 1 xyoos twg 4 zaug los tsa ncauj qhuas Yehauvas.—Nt.Nk. 109:30; 119:171.
2. Cov pab tho kev yuav tau txais tej kev txhawb zog twg thaum tus saib xyuas thaj tsam tuaj?
2 Thaum Tus Saib Xyuas Thaj Tsam Tuaj: Vim li no coob tus yuav ua tau ib tug pab thov kev rau lub sijhawm uas tus saib xyuas thaj tsam tuaj xyuas lub koom txoos thiab lawv ib leeg yuav txhawb tau ib leeg lub zog thaum lawv nrog nws ua Vajtswv tes num ua ke. (Loos 1:11, 12) Coob tus kuj npaj so ib hnub haujlwm kom tau nrog tus saib xyuas thaj tsam mus qhia Vajlugkub ua ke. Thiab cov uas ua ib tug pab tho kev es ua haujlwm hnub 1 txog hnub 5 kuj nug tau tus saib xyuas thaj tsam seb nws puas mus tshaj tawm tau nrog lawv hnub 6 thiab hnub 7. Tsis tas li ntawd xwb, cov pab tho kev yuav tau kev txhawb zog heev thaum lawv mus koom txojkev sib txoos nrog cov tho kev thiab cov tho kev tshwj xeeb.
3. Vim li cas ho zoo ua ib tug pab tho kev rau lub caij ua kevcai nco txog Yexus?
3 Thaum Lub 3 Hlis Thiab 4 Hlis: Cov uas twb ua ib tug pab tho kev qhia 30 teev rau lub hli uas ua kevcai nco txog Yexus dua los lawm, txij no mus yog lawv xav ua ib tug pab tho kev ntxiv lawv yuav muaj 2 lub hlis los “muab lawv tej lus qhuas ua yam uas xyeem rau Vajtswv.” (Hnpl. 13:15) Lub 3 hlis thiab 4 hlis yog ib lub caij zoo heev los ua ib tug pab tho kev mus tshaj tawm txoj xov zoo. Txhua xyoo lub caij no yog lub caij uas peb mus caw lwm tus tuaj nrog peb koom ua kevcai nco txog Yexus. Tsis tas li ntawd xwb, kuj yog ib lub caij uas peb yuav tau nrog coob tus mus tshaj tawm ua ke rau qhov sawvdaws yuav mus tshaj tawm coob heev rau lub caij ntawd. Tom qab ua kevcai nco txog Yexus, peb yuav rov mus xyuas cov uas tau tuaj koom peb rau hmo ntawd es mus txhawb lawv rov tuaj mloog zaj lus qhuab qhia tshwj xeeb. Yog li ntawd, koj puas yuav kub siab los ua ib tug pab tho kev rau 2 lub hlis no?—Lk. 6:45.