Koj Puas Xav Ua Ib Tug Pab Tho Kev?
1. Vim li cas lub caij ua kevcai nco txog Yexus, zoo rau peb lauj sijhawm mus qhia Vajlugkub ntxiv?
1 Zoo rau peb lauj sijhawm mus qhia Vajlugkub ntxiv rau lub caij uas yuav ua kevcai nco txog Yexus. Lub caij no ua rau peb xav txog Yehauvas txojkev hlub, uas nws tau txib nws tus Tub los tuag txhiv peb. (Yh. 3:16) Thaum peb xav txog Yehauvas txojkev hlub ua rau peb hajyam kub siab mus qhia tibneeg txog Yehauvas thiab tej uas nws twb npaj tseg rau noob neej lawm. (Yxy. 12:4, 5; Lk. 6:45) Peb zoo siab tias peb muaj feem mus caw tibneeg tuaj nrog peb ua kevcai nco txog Yexus. Peb kuj zoo siab rov mus qhia Vajlugkub rau cov uas tuaj nrog peb koom hmo ntawd. Yog li, koj puas kam lauj sijhawm los ua ib tug pab tho kev rau lub 3 Hlis, 4 Hlis, thiab 5 Hlis no?
2. Vim li cas zoo rau peb rau npe ua ib tug pab tho kev rau lub 3 Hlis Ntuj no?
2 Lub 3 lis No Tshwj Xeeb Heev: Zoo rau peb rau npe ua ib tug pab tho kev rau lub 3 Hlis. Lub hli no, hauv paus loj tso cai rau peb xaiv seb peb yuav mus tshaj tawm 30 teev lossis 50 teev. Yog tus kwvtij uas ncig xyuas thaj tsam, tuaj xyuas lub koom txoos ncaj rau lub 3 Hlis, ces thaum nws nrog cov tho kev thiab cov tho kev tshwj xeeb sib txoos, cov uas ua ib tug pab tho kev kuj koom tau tag nrho txojkev sib txoos huvsi thiab. Peb yuav ua kevcai nco txog Yexus rau Hnub 2 (Tuesday), lub 3 Hlis, tim 26, 2013. Tiamsis pib lub 3 Hlis, tim 1 peb yuav pib caw tibneeg tuaj nrog peb ua kevcai nco txog Yexus. Thiab lub 3 Hlis Ntuj muaj ntau hnub so, koj puas xav lauj sijhawm mus qhia Vajlugkub ntxiv rau lub hli no? Yog tias koj npaj li ntawd, ces lub 3 Hlis Ntuj yuav yog ib lub hlis tshwj xeeb tiag!
3. Peb yuav npaj mus qhia Vajlugkub ntxiv li cas?
3 Npaj Tamsim No: Siv sijhawm tamsim no npaj seb koj yuav ua li cas koj thiaj muaj sijhawm txaus ua ib tug pab tho kev. Hmo uas koj thiab koj tsev neeg pe hawm Vajtswv ua ke, nej yuav tsum tham seb nej yuav npaj li cas rau lub caij ua kevcai nco txog Yexus. Yuav tau sib koom siab, sawvdaws thiaj ua tau raws li lawv tau npaj tseg. (P.L. 15:22) Txawm tias koj tsis muaj sijhawm ua ib tug pab tho kev los, txhob xav li cas. Koj mus qhia Vajlugkub ib nyuag ntev zog, puas tau? Lossis ib lub lim tiam twg, koj teem ib hnub ntxiv mus qhia Vajlugkub, puas tau?
4. Yog peb mob siab qhia Vajlugkub ntxiv rau lub 3 Hlis, 4 Hlis, thiab 5 Hlis, peb yuav tau koob hmoov dabtsi?
4 Yog tias peb hajyam mob siab mus qhia Vajlugkub ntxiv rau lub 3 Hlis, 4 Hlis, thiab 5 Hlis, ces peb yuav hajyam zoo siab xyiv fab tias peb tau los pe hawm Yehauvas thiab tau mus pab lwm tus. (Yh. 4:34; Ttx. 20:35) Tiamsis qhov tseem ceeb tshaj yog qhov uas peb ua rau Vajtswv Yehauvas zoo siab xyiv fab.—P.L. 27:11.