Kev Siv Nyiaj Txiag
Cov uas coj raws li tej hauv paus ntsiab lus hauv phau Vajlugkub tsis tshua muaj kev nyuaj siab txog nyiaj txiag.
PAUB TXUAG NYIAJ
VAJLUGKUB TEJ HAUV PAUS NTSIAB LUS: “Nquag thiab ua tib zoo npaj koj thiaj muaj nplua mias. Yog koj lam tau lam ua, koj yuav muaj tsis txaus.”—Pajlug 21:5.
YOG LI CAS? Yog peb siv nyiaj mus yuav ib yam dabtsi, peb yuav tsum mus yuav qhov ntawd xwb. Xav txog tej nuj nqis peb muaj ua ntej peb siv nyiaj. Peb yuav tsum paub tias peb yuav tsis tau txhua yam uas peb ntshaw. Yog li ntawd, paub ceev nyiaj kom zoo.
KOJ YUAV UA LI CAS?
Them nuj nqis ua ntej. Muab peb cov nuj nqis sau tseg, xws li yuav zaub yuav mov, yuav khaub ncaws hnav, thiab them vaj them tsev. Saib seb peb cov nyiaj hli yog li cas ces muab faib los them. Yog peb siv tshaj li peb tau sau tseg los them ib qho nuj nqis ces muab lwm qhov los them. Piv txwv tias lub hli no, yog nyiaj tsis txaus sam roj ces peb yuav tau muab cov nyiaj yuav zaub yuav mov coj los siv.
Txhob mus luab nuj nqis. Muaj li cas siv li ntawd xwb, tsis txhob maj txais luag lwm tus. Tseg nyiaj peb thiaj yuav tau tej yam uas peb cheem tsum. Yog tias peb yuav qiv nyiaj, txhob tos ntev mam li them rov qab. Tiamsis yog peb tshuav luag nuj nqis, xav seb peb yuav them rov qab li cas ces them raws li ntawd.
Cov neeg uas pheej txais luag nyiaj, kheev siv nyiaj dua. Yog li ntawd, ua tib zoo xav ua ntej seb puas tsim nyog mus txais nyiaj.
XYAUM UA NEEG NQUAG
VAJLUGKUB TEJ HAUV PAUS NTSIAB LUS: “Tus tswv teb uas nkees laij nws thaj teb rau lub caij laij teb yuav tsis muaj qoob nrog luag sau.”—Pajlug 20:4.
YOG LI CAS? Txojkev tub nkeeg yuav ua rau peb txomnyem. Yog li ntawd, ua neeg nquag thiab paub txuag nyiaj peb thiaj li khaws tau mentsis rau lub neej yav tom ntej.
KOJ YUAV UA LI CAS?
Nquag ua haujlwm. Thaum peb nquag thiab rau siab ntso ua peb tes haujlwm, tus los pav yuav nyiam peb thiab yuav muab haujlwm ntxiv rau peb ua.
Ua neeg ncaj ncees. Tsis txhob ua tub sab tom haujlwm. Yog peb coj tsis ncaj ces yuav rhuav tau peb lub npe thiab yuav nyuaj rau peb nrhiav haujlwm.
Txhob ntshaw nyiaj. Yog peb pheej khwv kom nplua nuj ces yuav ua rau peb muaj mob los tau. Tej zaum kuj yuav ua rau peb tsis muaj kev sib raug zoo nrog peb tsev neeg thiab cov phoojywg. Nco ntsoov tias nyiaj txiag tsis yog yam tseem ceeb tshaj plaws hauv peb lub neej.
LWM TEJ HAUV PAUS NTSIAB LUS HAUV VAJLUGKUB
Nyeem phau Vajlugkub uas tau muab txhais ua ntau yam lus hauv lub vej xaij jw.org
TXHOB NKIM NYIAJ THIAB SIJHAWM RAU TEJ YAM TSIS ZOO.
“Cov neeg quav cawv thiab saib hlob yuav pluag. Yog nej noj tas pw xwb, tsis ntev nej yuav hnav khaub hlab.”—PAJLUG 23:21.
TXHOB TXHAWJ TXOG NYIAJ DHAU.
“Tsis txhob txhawj hais tias nej yuav tsum muaj zaub mov lossis yuav tsum muaj ris tsho hnav thiaj nyob taus.”—MATHAIS 6:25.
TXHOB KHIB SIAB.
“Cov neeg qia dub xav kom npluanuj sai, lawv twb tsis paub hais tias thaum twg kev txomnyem yuav los raug lawv.”—PAJLUG 28:22.