THAUM MUAJ KEV KUB NTXHOV

2 | Ceev Rawv Tej Yam Tseem Ceeb

VIM LI CAS?

Twb nyuaj qees rau coob tus khwv kom txaus noj txaus haus. Yog li, yuav haj yam nyuaj thaum lub qab ntuj no muaj teeb meem ntxhov hnyo.

Thaum muaj xwm txheej ti tes ti taw, tej khoom noj khoom haus thiab vaj tse yuav nce zuj zus.
Thaum muaj xwm txheej los raug kev ua lag ua luam, tib neeg kuj poob hauj lwm zom zaws, los sis khwv tau nyiaj tsawg tsawg xwb.
Tej huab cua phem kuj ua rau tib neeg tej lag luam, tej vaj tse thiab khoom tseem ceeb puas.

Nco Ntsoov Tias

Yog koj txawj txuag nyiaj ces thaum muaj xwm dab tsi los, koj thiaj yuav tsis nyuaj siab.
Tej khoom thiab nyiaj txiag uas koj muaj txawj poob nqi.
Nyiaj txiag muas tsis tau txhua yam, xws li kev zoo siab thiab ib tse neeg.

Koj Ua Tau Li Cas

Phau Vajlugkub hais tias: “Yog peb muaj noj muaj hnav lawm, peb cia li txaus siab rau tej ntawd xwb.”—1 Timautes 6:8.

Peb muaj li cas lam siv li ntawd. Tsuav peb tseem muaj noj muaj haus xwb ces cia li txaus siab rau tej ntawd.

Peb yuav tau txhob siv nyiaj loj loj thiab mus lob tej niag tog nqi tsam ces peb them tsis taus.

TEJ YAM UAS YUAV—Pab Tau Koj

Txawm muaj kev kub ntxhov los, yog koj ua tej yam no yuav pab tau koj

TXUAG NYIAJ

Txuag Nyiaj

Yog tej khaub ncaws tseem zoo hnav thiab khoom vaj khoom tsev tseem zoo siv, txhob rawm maj mus yuav cov tshiab. Xav seb, ‘Puas yog kuv yuav tsum muaj ib lub tsheb?’ los sis ‘Kuv cog puas tau zaub noj?’
Ua ntej yuav muas ib yam dab tsi, xav seb koj puas cheem tsum tiag tiag thiab koj puas muaj nyiaj yuav.
Yog tseem fwv muaj kev pab li cas, mus rau npe thov.

Kim hais li no: “Peb tsev neeg los tham seb yuav tseg tej kev lom zem twg thiaj txuag tau nyiaj. Peb kuj ua zaub mov noj hauv tsev lawm xwb.”

SAU SEB KOJ MUAJ LI CAS THIAB YUAV SIV LI CAS

Sau Seb Koj Muaj Li Cas Thiab Yuav Siv Li Cas

Phau Vajlugkub hais tias: “Nquag thiab ua tib zoo npaj koj thiaj muaj nplua mias. Yog koj lam tau lam ua, koj yuav muaj tsis txaus.” (Pajlug 21:5) Yog koj sau seb koj muaj npaum li cas thiab yuav siv li cas ces koj thiaj yuav tsis siv tshaj qhov uas koj muaj.

Xub sau seb ib hlis no koj khwv tau pes tsawg.
Xam seb ib hlis no koj rho nyiaj mus yuav thiab them dab tsi koj thiaj paub tias koj siv nyiaj npaum li cas.
Saib seb koj siv puas tshaj koj cov nyiaj hli. Yog siv tshaj lawm no, xyuas seb puas muaj tej yam twg uas tsis tsim nyog yuav.

Kuam hais li no: “Txhua hli kuv poj niam wb yeej sau seb wb khwv tau npaum cas thiab yuav siv npaum cas. Ua li no wb thiaj tsis nyuaj siab rau qhov wb twb paub tias wb yuav siv nyiaj li cas lawm. Wb yeej khaws ib qho cia tsam muaj xwm ceev, thiab npaj ib qho tseg tsam lwm hnub ho yuav tau siv.”

TSEG NYIAJ TXHOB LOB NQI

Tseg Nyiaj Txhob Lob Nqi

Ua tib zoo npaj thiaj tsis tiv nuj tiv nqi. Yog ua tau, txhob tiv nuj nqis haj yam zoo. Yog xav yuav yam twg tseg kom tau nyiaj tso mam yuav.
Khaws nyiaj cia es thaum muaj chaw siv thiaj tau siv.

RAU SIAB KHWV TUAV HAUJ LWM KOM KHOV

Phau Vajlugkub hais tias: “Ua neeg nquag koj lub neej thiaj li muaj nplua mias.”—Pajlug 14:23.

Rau Siab Khwv Tuav Hauj Lwm Kom Khov

Xav rau qhov zoo. Txawm txoj hauj lwm koj ua tsis yog txoj koj nyiam los tsuav pab them tau nuj nqis.
Ua neeg nquag thiab ua dab tsi los ua kom tiav. Yog koj coj li no, koj thiaj yuav muaj hauj lwm nrog luag ua mus ntev. Yav tom ntej yog koj mus nrhiav hauj lwm ua los, luag thiaj xav txais koj.

Nruas hais li no: “Kuv yeej tsis xaiv hauj lwm. Txawm lawv tsis them npaum li qhov kuv xav tau los, kuv yeej ua txoj hauj lwm ntawd zoo li zoo tau cuag li lub hauj lwm ntawd yog kuv li.”

Yog koj tab tom nrhiav hauj lwm . . .

Rau siab ntso nrhiav. Txawm tej lub lag luam tsis tiv qhia tias lawv nrhiav neeg los, koj yeej hu tau seb lawv puas txais neeg ua hauj lwm. Hais qhia rau tej txheeb ze thiab phooj ywg paub tias koj tab tom nrhiav hauj lwm.
Txhob xaiv hauj lwm. Yeej tsis muaj ib txoj hauj lwm uas koj yuav nyiam tag siab nrho.