Paub Qhov Tseeb
Vim Li Cas Tibneeg Xaiv Ntsej Muag?
Tibneeg xaiv ntsej muag vim tsis paub qhov tseeb. Xws li:
Ib txhia thawj coj xav hais tias pojniam ua tsis tau haujlwm hnyav thiab tsis ntse txaus ua haujlwm.
Txheej thaum ub hauv tebchaws Yus Luv, tibneeg liam tias cov Yudais lom tej qhov dej thiab kis kab mob rau txhua qhov. Tom qab no, thaum cov Natxi (Nazi) kav los cov Yudais tseem raug liam quj qees. Tiamsis zaum no, lawv raug liam ntxiv tias lawv yog cov ua rau tej kev noj kev haus puas tsuaj nyob hauv tebchaws Ntsaws Mes Nis (Germany). Vim ob qho no, cov Yudais thiaj raug ntxub tshaj plaws li los txog niaj hnub nimno.
Ib txhia xav hais tias cov tibneeg xws li, cov cev tsis meej xeeb, tsis hnov lus, thiab tsis pom kev tsuas nyob nyuaj siab thiab lwj siab ntsuav.
Cov neeg xav li no tsuas xam pom qhov tsis zoo ntawm lwm tus xwb. Thiab lawv xav tias cov uas tsis xav ib yam li lawv twb yog tsis xav lees paub qhov tseeb.
Vajlugkub Tej Hauv Paus Ntsiab Lus
“Tus neeg siab kub tiamsis tsis muaj kev txawj ntse tsis zoo dabtsi.”—PAJLUG 19:2.
Nqi no qhia tias yog peb tsis paub qhov tseeb ces peb yuav ua tau tej yam tsis zoo. Yog peb ntseeg tej zaj tsis muaj hauv paus hauv ntsis, ces peb yuav txiav txim tsis ncaj rau lwm tus.
Zoo Rau Peb Paub Qhov Tseeb
Yog peb paub qhov tseeb txog lwm tus, peb yuav tsis ntseeg tej lus xaiv txog lawv. Thaum peb pom tseeb tias luag tej hais tej yam tsis tseeb txog ib pawg neeg twg, peb yuav tsis maj nrawm nroos mus mloog tej lus xaiv ntawd.
Koj Ua Tau Li No
Muaj ib txhia thuam txog tej pab tej pawg neeg tias lawv ua tsis tau zoo. Tiamsis nco ntsoov tias tej zaum cov tibneeg ntawd kuj tsis coj li ntawd.
Nco ntsoov rau nruab siab tias koj yeej paub tsis tag txhua pab txhua pawg tibneeg.
Nug thiab nrhiav kom tau qhov tseeb.