KEV PAB RAU THAUM KHOOM KIM ZUJ ZUS TUAJ

Txaus Siab Rau Tej Uas Koj Muaj

Cov uas txaus siab rau tej uas lawv muaj tsuas siv nyiaj raws li lawv khwv tau xwb.

YOG KOJ TXAUS SIAB RAU TEJ UAS KOJ MUAJ, YUAV PAB TAU KOJ LI CAS?

Ntsexika Kaulawm (Jessica Koehler) yog ib tug uas kawm txog tib neeg txoj kev xav. Nws pom hais tias cov uas txaus siab rau tej uas lawv muaj, yog cov uas tsis ntshaw luag tug thiab xav mus rau qhov zoo xwb. Twb yog vim li no, lawv thiaj muaj kev zoo siab dua thiab tsis tshua muaj kev txob kev txhawj. Tsis tas li ntawd xwb, cov uas siv sij hawm nrog lawv tsev neeg thiab lawv tej phooj ywg kuj muaj kev zoo siab dua thiab. Tej no yog tej yam uas nyiaj txiag yuav tsis tau. Cov uas muaj kev zoo siab tshaj plaws kuj yog cov uas tsis tshua muaj ub muaj no.

“Yog li ntawd, yog peb muaj noj muaj hnav lawm, peb cia li txaus siab rau tej ntawd xwb.”—1 Timautes 6:8.

KOJ YUAV UA LI CAS XWB?

Tsis txhob muab koj lub neej piv rau lwm tus. Yog koj pheej ua li ntawd ces yuav ua rau koj tsis txaus siab thiab ntshaw tej uas luag muaj. Tej zaum koj xav tias lawv nplua nuj vim hais tias lawv muaj tej yam khoom kim kim tiam sis tiag tiag, lawv tshuav luag nuj luag nqis xwb. Ib tug poj niam hu ua Nikhau (Nicole) uas nyob teb chaws Xenenkos (Senegal) hais li no tias, “Txawm kuv tsis muaj npaum li luag los kuv yeej txaus siab rau tej uas kuv muaj.”

Yog li, koj yuav ua li cas xwb? Tsis txhob saib tej yam saum haub saum cua los sis tej vej xaij ntaus phooj ywg uas qhia tias lawv muaj npaum li cas.

“Txawm ib tug neeg muaj nplua mias los tej ntawd pab tsis tau kom nws tau txoj sia.”—Lukas 12:15.

Paub nco luag txiaj ntsig. Cov neeg uas paub nco luag txiaj ntsig yeej txaus siab rau tej uas lawv muaj. Thaum luag lwm tus muab ub muab no pub rau lawv los lawv tsis xav tias yeej tsim nyog lawv tau. Hos thaum lawv tsis muaj li luag los lawv tsis xav tias lawv yuav tsum ua kom tau xwb xwb li. Ib tug txiv neej hu ua Lanpawteem (Roberton) uas nyob lub teb chaws Hedis (Haiti) hais tias: “Kuv yeej xav txog tej uas lwm tus tau ua los pab kuv thiab kuv tsev neeg. Kuv ua lawv tsaug. Thiab kuv qhia kuv tus tub uas muaj yim xyoo kom nws ua ib yam li ntawd.”

Koj yuav xyaum coj li no li cas xwb? Sau rau hauv ib phau ntawv txog tej yam uas koj ntsib thiab pom txhua hnub uas ua rau koj ris txiaj ntsig rau tej uas koj muaj. Koj yuav sau txog tej yam twg xwb? Koj kuj sau tau tias koj zoo siab rau qhov uas koj tsis muaj mob muaj nkeeg, koj tsev neeg sawv daws nyob sib haum xeeb, koj muaj phooj ywg zoo, los sis koj pom lub hnub poob tim npoo ntuj ua zoo zoo nkauj heev.

Cov uas lub siab xyiv fab zoo tam li lawv muaj kev pam noj pam haus tsis tu li.—Paj Lug 15:15.

Tej thaum, yeej yuav nyuaj rau peb txaus siab rau tej uas peb muaj, tiam sis yog peb txaus siab ces peb yeej yuav muaj kev zoo siab dua. Txoj kev zoo siab yog ib yam ntxiv uas nyiaj txiag yuav tsis tau.