Zaj Kawm 13

Ua Cas Koj Thiaj Nrhiav Tau Kev Ntseeg Tseeb?

Txhua txojkev ntseeg puavleej haum Vajtswv siab, los yog tib txog xwb? (1)

Vim li cas thiaj muaj ntau txojkev ntseeg qhuas tias lawv yog Khetias? (2)

Ua li cas koj thiaj zeem tau cov tseem Khetias? (3-7)

1. Yexus pib ib txojkev ntseeg ntseem Khetias. Yog li niaj hnub no yuav tsum muaj tib pawg xwb, uas yog cov tseem teev Vajtswv Yehau-vas. (Yauhas 4:23, 24, NW; Efexaus 4:4, 5) Phau Vajlugkub qhia tias tsuas yog tsawg leej taug txojkev nqaim mus tau txojsia.​—Mathais 7:13, 14.

2. Phau Vajlugkub tau qhia tseg tias tom qab cov aphaxaum tuag tas, kev qhia tsis tseeb thiab kevcai coj tsis raws Khetias tej kev xyaum yuav maj mam muaj tshwm tuaj rau lub koom txoos Khetias. Neeg yuav coj cov ntseeg raws lawv qab kom txhob raws Khetos. (Mathais 7:15, 21-23; Haujlwm 20:29, 30) Vim li ntawd peb thiaj pom ntau ntau hom kev ntseeg qhuas tias yog Khetias. Yuav ua li cas peb thiaj zeem tau cov tseem Khetias?

3. Qhov tseem ceeb tshaj plaws yog lub cim ntawm cov neeg Khetias mas yog qhov lawv muaj tseem kev sib hlub nyob ntawm lawv tus kheej. (Yauhas 13:34, 35, NW ) Lawv tsis qhia kom xav tias lawv zoo dua lwm haiv neeg los yog lwm xim nqaij tawv. Los yog tsis qhia kom ntxub cov neeg tuaj lwm lub tebchaws tuaj. (Haujlwm 10:34, 35) Li ntawd lawv thiaj tsis koom ua tsov rog. Cov tseem Khetias ib leeg thwm ib leeg zoo li kwvtij thiab nkaujmuam.​—1 Yauhas 4:20, 21.

4. Lwm lub cim ntawm kev ntseeg tseeb yog qhov nws cov neeg hwm phau Vajlugkub tshaj plaws. Lawv lees txais tias yog Vajtswv Lo Lus thiab ntseeg raws li nws hais. (Yauhas 17:17, NW; 2 Ti-mautes 3:16, 17) Lawv thwm Vajtswv Lo Lus yog ib qho tseem ceeb tshaj tib neeg tej tswvyim los yog kevcai. (Mathais 15:1-3, 7-9). Lawv xyaum ua lawv lub neej raws phau Vajlugkub txhua txhua hnub. Li ntawd lawv tsis qhia ib yam es mus coj lwm yam.​—Titaus 1:15, 16.

5. Kev ntseeg tseeb yuav tsum phimhwj Vajtswv lub npe. (Mathais 6:9) Yexus tau qhia tawm Vajtswv lub npe, Yehau-vas, rau lwm tus. Cov tseem Khetias yuav tsum tau ua tib yam li ntawd. (Yauhas 17:6, 26; Loos 10:13, 14, NW ) Leejtwg yog cov neeg nyob hauv koj zej zog uas qhia lwm tus neeg txog Vajtswv lub npe?

6. Cov tseem Khetias yuav tsum tau tshaj txog Vajtswv lub Nceeg Vaj. Yexus tau ua li ntawd. Nws tau niaj hnub tham txog lub Nceeg Vaj. (Lukas 8:1, NW ) Nws tau txib kom nws cov thwjtim tshaj tawm txog tib co xov xwm no mus kom thoob plaws lub ntiajteb. (Mathais 24:14, NW; 28:19, 20) Cov tseem Khetias ntseeg tias tsuas yog Vajtswv lub Nceeg Vaj xwb thiaj yuav muab tau tseem kev thajyeeb thiab kev nyab xeeb rau lub ntiajteb no.​—Phau Nkauj 146:3-5.

7. Yexus cov thwjtim yuav tsum tsis muaj feem nrog lub qabntuj phem no. (Yauhas 17:16) Lawv tsis txuam nrog lub qabntuj xaiv nom thiab neeg zej tsoom sib cav txog teeb meem. Lawv zam tej kev coj kev ua uas yuav raug mob, kev xyaum, thiab tej cwjpwm uas niaj hnub muaj nyob rau lub qabntuj no. (Yakaunpaus 1:27; 4:4) Koj puas zeem tau ib pawg ntseeg nyob hauv koj zej zog uas muaj cov cim uas yog cov tseem Khetias?

[Duab nyob sab 26, 27]

Tseem Khetias ib leeg hlub ib leeg, hwm phau Vajlugkub, thiab tshaj tawm Vajtswv lub Nceeg Vaj