Koj Nrhiav Tau Txojkev Ntseeg Tseeb Li No

Yog tias koj xav ua Vajtswv ib tug phoojywg, koj yuav tsum coj txojkev ntseeg uas Vajtswv pom zoo. Yexus hais tias “cov uas pe hawm tiag tiag” yuav pe hawm Vajtswv raws li “qhov tseeb.” (Yauhas 4:23, 24) Tsuas muaj tib txojkev tseeb los pe hawm Vajtswv xwb. (Efexau 4:4-6) Txojkev ntseeg tseeb coj mus tau txojsia ntev mus ib txhis, thiab txojkev ntseeg cuav coj mus raug kev puam tsuaj.​—Mathai 7:13, 14.

Koj yuav paub txojkev ntseeg tseeb thaum koj saib cov tibneeg uas coj raws li qhov tseeb. Rau qhov Yehauvas zoo heev, cov uas pe hawm nws tiag tiag yuav tsum yog neeg zoo thiab. Ib yam li tsob txiv kab ntxwv zoo yeej txi tau tej txiv zoo nkauj, txojkev ntseeg tseeb txi tau neeg zoo.​—Mathai 7:15-20.

Yehauvas cov phoojywg saib taus phau Vajlugkub heev. Lawv paub tias phau Vajlugkub yog los ntawm Vajtswv tiag. Lawv cia phau Vajlugkub coj lawv lub neej, kho lawv tej teeb meem, thiab pab lawv kawm txog Vajtswv. (2 Timaute 3:16) Lawv xyaum coj raws li tej uas lawv tshaj tawm.

Yehauvas cov phoojywg ib leeg hlub ib leeg. Yexus muaj kev hlub rau tibneeg los ntawm qhov uas nws qhia lawv txog Vajtswv, thiab kho cov neeg muaj mob. Cov uas coj txojkev ntseeg tseeb kuj muaj kev hlub rau lwm tus. Lawv coj ib yam li Yexus, lawv saib taus cov pluag thiab lwm haiv neeg. Yexus hais tias tibneeg yuav paub nws cov thwjtim los ntawm qhov uas lawv ib leeg hlub ib leeg.​—Yauhas 13:35.

Vajtswv cov phoojywg hwm Vajtswv lub npe, Yehauvas. Yog tias ib tug twg tsis kam hu koj lub npe, tus neeg ntawd puas yog koj tus phoojywg zoo? Tsis yog! Thaum peb muaj ib tug phoojywg, peb yeej hu nws lub npe thiab hais tej yam zoo txog nws rau lwm tus. Yog li ntawd, cov uas xav ua Vajtswv cov phoojywg yuav tsum siv nws lub npe thiab tham txog nws rau lwm tus. Yehauvas xav kom peb ua li ntawd.​—Mathai 6:9; Loos 10:13, 14.

Zoo ib yam li Yexus, Vajtswv cov phoojywg qhia tibneeg txog Vajtswv lub Nceeg Vaj. Vajtswv lub Nceeg Vaj yog lub tseem fwv saum ntuj ceeb tsheej uas yuav hloov lub ntiajteb ua ib lub vaj kaj siab. Vajtswv cov phoojywg qhia txoj xov zoo txog Vajtswv lub Nceeg Vaj rau lwm tus.​—Mathai 24:14.

Yehauvas Cov Timkhawv xyaum ua Vajtswv cov phoojywg. Lawv saib taus phau Vajlugkub thiab lawv ib leeg hlub ib leeg. Lawv kuj siv thiab hwm Vajtswv lub npe, thiab qhia lwm tus txog Vajtswv lub Nceeg Vaj. Hauv ntiajteb niaj hnub no, Yehauvas Cov Timkhawv coj txojkev ntseeg tseeb.